Ditzionàriu in línia
de sa limba e de sa cultura sarda

arrísu , nm: errísiu, irrisu, risu* Definition alligria chi si paret aperindho is lavras o fintzes faendho una genia de boghe a iscracàlliu, a bortas po cuntentesa, po cosas curiosas, a bortas a befa / min. arrisixedhu Synonyms e antonyms befa, bischíglia | ctr. piantu Idioms csn: ischiríngiu de a. = risitu; poderai s'a. = no ríere, istaresindhe de ríere; mòrriri, crepai, isbarraisí, pisciaisí de s'a. = ríere meda, itl. sbellicarsi dalle risa; faisí una passada de a. = fàgheresi una bentre o una pasta de risu; a. sen'e pisu = a fortza, chentza bi àere de ríere; a. grogu, cun croxolu = risu de malàidu (de malària), risu marigosu (pro cosas chi… bi ndh'at de prànghere); s'arrisu de is crabitus de Pasca (chi parent rindhe candho sunt mortos)= pro cosa chi dispiàghet, pro dannu; s'a. de is carrus furriaus = risu chi própiu no bi deghet, ríere pro dannu anzenu; s'a. de s'arenada arruta a terra e iscuartarada! = zenia de frastimu; èssiri s'a. de totus = èssere leados a befe de totugantos; fai una cosa candu su muenti est mortu de s’a. = tropu a irmasionu, a distempus; èssiri s'arrisu de sa genti = unu chi totugantos leant a befe, a risu Sentences no si podiat poderai a s'arrisu ◊ e benimindi arrisu candu dha bint cun su bistiri de ortigu! ◊ tui ses s'arrisu de sa genti! 2. de innòi a ti movi tui su cuadhu est mortu de s'arrisu 3. s'arrisu de tzia Bacuca, chi iat lassau is barras in sa fruca! Translations French sourire, rire English smile Spanish risa, sonrisa Italian sorriso, riso German Lächeln, Lachen.

risichédhu , nm: arrisixedhu, risighedhu Definition min. de risu, genia de errisu, ischiríngiu de errisu, apertura pagu pagu de is lavras erriendho; segundhu comente est nau, errisu meda Synonyms e antonyms risitu Sentences isse est de bonumore, sempre cun su risighedhu in laras ◊ risighedhu su chi s'at fatu, candho li apo contadu su contu… pro che troulare a terra! Translations French sourire English smile Spanish sonrisa Italian sorriso German Lächeln.

risitàre , vrb Definition apèrrere unu pagu is lavras po erríere, èssere alligru, coment'e erriendho Synonyms e antonyms arriri, risulare 2. risitat a su sole su beranu, s'isparghent sos fiores in s'arzola (L.Mudadu)◊ Paret chi no - narzeit sa Giana, risitendhe Etymon srd. Translations French sourire English to smile Spanish sonreír Italian sorrìdere German lächeln.

risítu , nm Definition ischiríngiu de errisu, errisighedhu Synonyms e antonyms risichedhu / cdh. risaredha Sentences sas laras coradhinas apenas torradas isganzant unu risitu ◊ sa mere at rispostu totu tosta, ma cun d-unu risitu ca sa pisedha aiat cumpresu sa briga Etymon srd. Translations French sourire English smile Spanish sonrisa Italian sorriso German Lächeln.

rísu , nm: arrisu, errísiu, irrisu Definition alligria chi si paret aperindho is lavras o fintzes faendho una genia de boghe a iscracàliu, a bortas po cuntentesa, po cosas curiosas, a befa; a logos est fintzes pps. / min. risichedhu, risighedhu, risedhu, risitu / genias de errisu: r. a iscàsciu, a iscracàlliu, a lódhuru (de orrúere a terra, de no ndhe pòdere prus), r. matzoninu (falsu, befandho, faendho fintas), r. de sa melagranada (su corgiolu si tzacat, totu, e faet a bíere su granu), de sos crabitos de Pasca (chi parent erriendho a buca aperta, mortos, nau cun tzacu) Synonyms e antonyms befa, bischíglia / rísidu | ctr. piantu Idioms csn: èssere a risu de ccn., de cada unu = èssere o fàghere a manera chi àtere si ndhe potat befare, ríere; fàghere una mata, una pasta de risu = ríere a piaghere; fuíreche su r. = no arrennèsciri a poderai s'arrisu; èssere a tróulu de risu = arriri a rúmbulu, ríere gai meda de si rúere Sentences fateit fàghere una mata de risu fentra ai cussu muduleu (N.Musso)◊ sas carrelas fint un'andha e beni de zente e de iscàscaros de risu ◊ totus si ne fachiant su risu de su travàgliu suo, ca fit merderi ◊ bae chi deo no so a risu tou e si ti abbaidaias a carrones!…◊ bidindhe cussa funtzione mi ch'est fuidu su risu ◊ za si ndhe at a fàghere de su risu bidindhe chi mi at fatu dannu e leadu in ziru puru!… 2. at risu unu pacu a malaggana ◊ deo mi ndhe fui risu Etymon ltn. risus Translations French sourire, rire English laugh Spanish sonrisa, risa Italian sorriso, riso German Lächeln, Lachen.

risulàre , vrb Definition erríere unu pagu, apèrrere unu pagu is lavras po erríere Synonyms e antonyms risitare Etymon srd. Translations French sourire English to laugh Spanish sonreír Italian sorrìdere German lächeln.

scaríngiu , nm: ischiríngiu, schiríngiu, schirríngiu, sciríngiu Definition illargada de lavras po erríere (fintzes po befa) Synonyms e antonyms arrisixedhu, scaràngiu, schirighíngiu Sentences cun su schiríngiu in lavras, pigamindi cun tui e mi siat tébidu su sinu de sa terra chi mi arricit! ◊ iat atuau is pentzamentus suus chen'e sciríngius de arrisu me is larbas (G.P.Mura) Etymon srd. Translations French sourire, ricanement English smile, sneer Spanish sonrisa, sarcástica Italian sorriso, sogghigno German Lächeln, Hohnlachen.