Abbreviations Legenda | Symbols Legend

cunsòlza , nf: cunsorza, cussòglia, cussolza, cussòrgia, cussorja, cussorxa, cussorza Definition prus che àteru, su logu a ue faet fúrriu unu pastore, ue tenet su bestiàmene a pàschere; si narat fintzes de totu unu logu, unu sartu o fintzes de tantos sartos, de una o de tantas bidhas Synonyms e antonyms ammindha, segadu / leada Idioms csn: sbaratzamí sa cussòrgia! = essimiche dae cue!, baidindi allestru!, sbordígia!; essíreche foras de cussorza (in carchi chistione) = fai contus macus, isbagliaus Sentences est sempre cun sa tasca a pala girendhe sa cussorza ◊ su pastore at cambiadu sa cunsorza ca, ue fit, su logu fit manigadu ◊ is pastoris de sa cussorxa nosta est totu genti chi fait a si fidari 2. s'annu si nch'est issiu ponendhe postema de dolore a sa zente de totu sa cussorja ◊ falat unu ribu chi abbat totu sas cussorjas 3. s'abbocau Pirina fit de sos penalistas prus balentes de sa cussorja 4. tandho arresonaus, ma chena che essire foras de cussorza! Scientific Terminology pst Etymon ltn. cursoria Translations French pâture English country, grazing Spanish terreno de pasto Italian zòna adibita a pàscolo, contrada German Weideland, Gegend.

farràghine , nf, nm: erràine, farràina, farràini, farràinu, farrani, farràniu, ferràghine, ferràina, ferràinu, ferrani, forràina, forràini, forrani, forrània Definition erbaju semenau po is animales a foràgiu, mescamente órgiu; fintzes fenarzu o fenumurru Synonyms e antonyms pamenta Idioms csn: bruja ferràina = limbi malu, limbi mala; andai a forrani = andhare a linna (fine, faschinas) pro su fogu; cambas, bratzus de forrani (nau a menisprésiu)= filivili, tropu fines; cuadhu miu no mòrxasta ca gei crescit su forràini! = itl. campa cavallo chè l'erba cresce; launedha de forrani = pipiriolu de fenu Sentences sunt créschidos che farràina in corcadorzos de crapas ◊ in su cungiaredhu su pastori dhoi tenit ferràinu po su bestiàmini ◊ Gavinu teniat cos'e arroghedhu de terra e dh'iat arada a forràini 2. cambas de giuncu, bratzus de forrani, ses tui sa chi tocat su sentidu miu!…(R.Locci) Scientific Terminology msg Etymon ltn. farragine(m), ferragine(m) Translations French fourragère English grass-land Spanish herbazal, pasto, centenal Italian erbàio German Grünland.

mínda, míndha , nf: ammindha, minna Definition su terrenu tentu a pàsculu, su pàsculu puru (su chi creschet a solu e fintzes su semenau); a logos est una fune longa po acapiare su cuadhu a manera de pòdere pàschere / min. mindhighedha; prèndhere (su mannale) a mindha = trobeire o prèndhere a cadena de no istesiare; nàsciri a minda = a meda Synonyms e antonyms cunsolza, musungili, paschidórgiu, pastura Sentences no dhue iat mancu unu cantu de minna pro amminnare s'àinu ◊ su pastore deviat dare contu a unu fiotedhu de fiados berveghinos in sa mindha 2. in citadi nascint is domus coment'e su cardulinu a minda! Scientific Terminology pst Translations French pâture English grazing (land) Spanish pasto, dehesa Italian territòrio a pàscolo German Weideland, Trift.

paschimènta, paschiméntu , nf, nm: pascimenta, pascimentu Definition su pàschere, su istare paschendho, fintzes s'erba de pàsculu; sa paga chi si giaet a su pastore (pruschetotu de pegos mannalitzos po dhos portare a pàschere) Synonyms e antonyms paschera, paschinzu Sentences su pastore fit cun su tazu in paschimenta ◊ su cadhu fit in paschimenta in sa tanca ◊ s'abe est in paschimenta ◊ su bestiàmini nostu fut a duas bortas de cussu de su cumpàngiu e su pascimentu torràt duas a una Etymon srd. Translations French pâturage English grazing Spanish pasto Italian pàscolo German Weide.

paschínzu , nm Definition su pàschere; su logu ue paschet su bestiàmene, fintzes su pàsculu, s'erba / èssere in p. = paschendho Synonyms e antonyms paschera, paschimenta / pàsculu, pastura Sentences cue bi at púlighe in paschinzu! ◊ sas arveghes a masone sa mandra dassant umpare pro su paschinzu beranile ◊ sa gama est andhèndheche a su paschinzu nou ◊ non bi at paschinzu in sas pasturas Etymon srd. Translations French pâturage English pasture Spanish pasto Italian pàscolo German Weide.

pastúra , nf Definition su logu e s'erba a pàschere / p. franca = pàsculu francu, genia de cuntratu (unu ponet is pàsculos, s'àteru su bestiàmene e su trebballu: su frutu est a mesapare) Synonyms e antonyms ammindha, erba, paschinzu, pàsculu Sentences sunt bichinos de pastura ◊ sos pastores pregant s'abba pro chi crescat sa pastura ◊ truvat su masone a sa ínnida pastura ◊ cussas tancas las tenent issos in pastura ◊ cufromma a sa pastura sa rassura Etymon ltn. pastura Translations French pâturage English graze Spanish pasto Italian pàscolo German Weide.

«« Search again