Ditzionàriu in línia
de sa limba e de sa cultura sarda

castagnàrza , nf, nm: castanàgliu, castanàrgiu, castanarju, castanarzu, castangiàrgiu, castannanzu, castannarju, castannarzu, castanzàlgiu, castanzarzu, castenàgliu, castennàgliu, castennalzu, castennàrgiu, castennarzu, catannàgiu, costennàrgiu Definition castannanzu mannu, iscoba màsciu, o màscina, e fintzes iscoba fémina: duas calidades de linna chi no faent tanti mannas, ma a cotzina grussa, bona po crabone e a fàere pipas, cun sa fògia pitichedhedha Synonyms e antonyms cantentarzu, ghidhostra, idhostra, salina 1, salinavémina, sechintrese, túfera Sentences rios e rosas intritziant tramas ismeraldinas de chercos e suèglios, lidones e castennàglios, ghiníperos e chessa Scientific Terminology mt, Erica arborea, E. scoparia Etymon srd. Translations French bruyère English heather Spanish brezo Italian èrica da ciòcco, scópa gentile German Besenkraut.

framíu, fràmiu , nm: frammiu, fràmmia, fràmmiu, frumiu Definition iscoba fémina, genia de linna chi abbarrat a tupa, a fògia finevine, minuda, fioredhu piticu biancu: faet un’arraighina grussa bona po fàere pipas e carbone; framiu dhu narant fintzes a css. linnighedha fine po allumiare fogu o inchèndhere su forru, e frumiu po ogiastedhu bàsciu Synonyms e antonyms cantentarzu, castagnarza, ghidhostra, idhostra, salina 1, túfera Sentences de s'arraegina de su fràmmiu faent is pipas Scientific Terminology mt, Erica scoparia Etymon ltn. flammeus Translations French bruyère English heather Spanish brezo de escobas Italian scópa gentile German Besenkraut.

iscòba , nf: iscopa, iscova, scova Definition genia de aina chi s'intrat in punta de unu bàculu, totu a fròngias cracas e fines po mundhare àliga passandhodha in terra a frigadura; sa carena, su chi abbarrat de unu gurdone de àghina apustis bodhiu su pibione; in su giogu a cartas, genia de bínchia chi si faet pinnigandhondhe totu is cartas chi funt in terra; a logos iscopa est una tupighedha bona po meighina, sa Ephedra nebrodensis)/ crezes de iscoba: de risu (lada), de parma (tundha), de castannarju, de matricúsia (pro arga de fora de domo); Bernardu mi at bistu, iscovas de forru = si narat de su tramposu chi no pagat o no torrat su chi depet; min. iscovighedha Synonyms e antonyms iscóbulu Sentences at a tocai a giai una passada de iscova innòi puru ◊ tratant s'iscoba pro mundhare sas alzolas Etymon ltn. scopa Translations French balai English broom Spanish escoba Italian scópa German Besen.

iscóbulu , nm: iscópulu, iscóvulu Definition iscova de domo, aina de pramma o de àtera cosa finevine acapiada a matzu tundhu e intrada in d-unu fuste po mundhare o pinnigare àliga passandhodha a tragadura / sa parte de s'i. ue s'intrat su bàculu: tanaxi; su pl., iscóbulos, itl. saggina, calidade de Sorghum vulgare, genia de laore chi faet artu che a su moriscu (e dhi assimbígiat puru) ma cun su frore a iscoba, totu a chimas finedhedhas e longas ue faet su sèmene a meda, e bonu po fàere iscobas mannas ciatas a sa parte de mundhare; lassare a ccn. chin s'iscóbulu in mesu domo = in campu e in crachi (itl. piantare in asso) Synonyms e antonyms iscoba Sentences inoghe che cheret dadu una colada de iscóbulu a che collire s'arga ◊ fue in lestresa o ti bisestro a corpos de iscóbulu! ◊ dadhi una passadedha de iscóvulu po ne arregòllere sa lana! ◊ si intrat unu póveru ndhe lu vocant a corfos de iscópulu Etymon srd. Translations French balai English broom Spanish escoba Italian scópa German Besen.

salína 1 , nf Definition una calidade de ghidhostre Synonyms e antonyms framiu Scientific Terminology mt, Erica scoparia Translations French bruyère English heather Spanish brezo, escobilla Italian scópa gentile German Besenkraut.

túfera , nf: túvara, túvera, túvura Definition iscoba màsciu, màscina o túvara bera, iscoba fémina o vera e fintzes iscova burda, tres calidades de sa matessi linna chi faet fògia pitichedhedha, frore biancu, arraighina bona po fàere pipas e pitica coment'e mata, prus che àteru a tupa / túvara vitània = napu o fintzes tapu tamburru, genia de erba chi narant fintzes patata americana (benit de s'América: nms. Helianthus tuberosus), faet unu cambu finedhedhu e longu meda e in s'arraighina faet una genia de nodos mannos e longos, una patata, ma prus tostada e druche, a pigiolu orrubiastu; túvera a logos est una genia de codrolinu chi faet asuta de terra a bisura de patata: itl. tartufo Synonyms e antonyms cantentarzu, castagnarza, ghidhostra, idhostra, lòstiri, salina 1, scovitzi Sentences custa tanca est prena de ozastros, de túvera e de lidone ◊ curres a ispantu tra túveras e chercos poderosos e castanzas e ílighes Scientific Terminology mt, Erica scoparia, E. terminalis Translations French bruyère English heather Spanish brezo Italian èrica da ciòcco, scópa gentile German Besenkraut.