Ditzionàriu in línia
de sa limba e de sa cultura sarda

allampàre , vrb: allampiai, allampiare Definition apèrrere bene is ogos abbaidandho; arrennèscere a bíere o connòschere fintzes de atesu Synonyms e antonyms illampiare, ispalpedhare / allampiociare, apubai, assebeltare, bídere, iscerai, semodare Sentences giómpidu a s'incraradorza, ndh'at pódidu allampiare sos carabbineris ◊ in s'ispricu de su poju che allàmpio sa figura de mene etotu ◊ cudhos si fint girados a l’abbaidare allampiandhe sos ogos ◊ Tziu Missente, comente nos nche allampiabat, nos mutiat a nos cumbidare Etymon srd. Translations French apercevoir English to perceive Spanish divisar Italian scòrgere, intravedére German erblicken.

apuài, apubàe, apubài, apubàre , vrb Definition abbaidare e arrennèscere a bíere, fintzes cun paga lughe o atesu o a dónnia modu cun dificurtade, giustu coment’e candho totu su chi si podet bíere est una puba, una figura pagu crara, calecuna cosa chi no si biet e ne cumprendhet bene it'est; si narat fintzes in su sensu ebbia de bíere, abbaidare disigiandho Synonyms e antonyms abbistare, assebeltare, illampiare, impubai / bídere Sentences cussa luxixedha apenas si podit apubai ◊ apo apubadu un'iscritura antiga ◊ de atesu arrennesciat a apubai sa spéndula ◊ comenti orbescit si apubat su colori de is cosas ◊ no apubu nudha, sa vista mi est cumentzendi a mancai ◊ fut iscuriu che in buca ma apo apubau is porcos 2. fai chi su tzurpu apubit! ◊ su pastoredhu at apubau unu trunchedhu de ollastu liuru ◊ mi pòngiu innòi, chi mi apubint! ◊ sa màchina noa dha tenis giai apubada ◊ si cravat che unu lupu candu apubat su pistoni! Etymon srd. Translations French apercevoir English to perceive Spanish divisar, ver Italian scòrgere, avvistare German erblicken, sichten.

assebeltàre , vrb: assebertare, assebestare, sebeltare* Definition arrennèscere a bíere, a intèndhere, a distínghere, a cumprèndhere Synonyms e antonyms allampare, apubai, illampiare, iscerai, semeschiare / assabèschere, assaborire Sentences sos titones li faghiant paga lughe e assebertaiat petzi carchi cosa ◊ in mesu de s'abba che apo assebeltadu una moneda ◊ tue lu miras, ma no assebertas de ite colore est Translations French apercevoir English to perceive Spanish divisar Italian scòrgere German erblicken.

distínghede, distínghere, distínghiri , vrb Definition agatare is diferéntzias inter duas cosas; bíere crara una cosa de dha pòdere connòschere bene, fintzes arrennèscere a bíere una cosa chi si biet male, cun dificurtade Synonyms e antonyms apubai, issebertare, scerai Sentences fipo totu sa die illughinau: ne crapas ne crapitos distinghio ◊ s'ómine tzecu e gadhighinosu non distinghet su bonu de su malu 2. dae tesu goi no resesso a distínghere su chi mi ses ammustrendhe Etymon itl. Translations French distinguer English to distinguish Spanish distinguir Italian distìnguere, discèrnere German unterscheiden, erkennen, erblicken.

iscampiàre , vrb Definition andhare o essire a bíere, o fintzes po si giare a bíere (nau de s'aera, ispalatare, iscrarire); bíere de atesu / iscàmpia sa conca! = boga sa conca!, incàradi a bídere! Synonyms e antonyms acarare, acerare, acherare, acontrare, acrarare, afacare, bídere, cumparire, essire, imbraconare, incarai, inciarare, ingiarare / ispalaciae Sentences si est aperta sa zanna e tandho est iscampiada issa ◊ erisero est iscampiada un'ànima dolimorjosa a mi nàrrere de bènnere ◊ sas crocas iscàmpiant apenas cumintzat a pròghere ◊ su sole onzi tantu iscampiabat dae palas de sas nues ◊ ti torras a iscampiare e ti amus a dare sa risposta ◊ si s'aera s'iscàmpiat in bonu essimus 2. mai in sa vida si torret a iscampiare! ◊ mai s’iscàmpiet su triballu: como mi paso! ◊ las ant iscampiadas dae tesu, a issas Etymon srd. Translations French se montrer, apercevoir dans le lointain English to lean out, to perceive in the distance Spanish asomarse, divisar Italian affacciarsi, scòrgere da lontano German sich zeigen, erblicken.

scerài , vrb: iscerai* Definition coment'e chirriare, seberare, arrennèscere a bíere, a bíere crara, distinta, una cosa de un'àtera Synonyms e antonyms chirrare / allampare, assebeltare, distínghere, isceberai, semodare Sentences po fai carrus tocat a scerai s'ílixi prus bellu ◊ as a scerai a plaxeri tuu un'arti o unu mestieri ◊ luxi de vida mia, isceti istedhus de òru in celu ti ndi sceru! ◊ scera totu custu lori e poni a parti a muntoni a muntoni! ◊ donna Cristina scerendi scerendi est abarrada bagadia! 2. in su murriadrosu càstiant pubas chi aditzu si scerant (D.Maccioni)◊ no s'iscít ita maladia tenit: po immoi no si scerat nudha ◊ Deus bit fintzas su chi no si scerat ◊ su campanibi dh'eus a tingi in biancu po si scerai de atesu fintzas a su noti ◊ ajaju no mi scerat de is atrus piciochedhus ◊ est príngia ma no si scerat ancora nudha Translations French choisir, apercevoir English to choose, to make out Spanish elegir, divisar Italian scégliere, scòrgere German wählen, erblicken.

sebeltàre , vrb: assebeltare, sebertare, sebestare Definition arrennèscere a bíere, a intèndhere, a cumprèndhere, mancari cun dificurtade Synonyms e antonyms allampare, apubai, iscerai, semeschiare, semodare / assabèschere, assaborire Sentences so duas oras chirchendhe a mamma e no la seberto in logu ◊ de cudhu no ndhe sebestaiat mancu su fiagu ◊ est sebeltendhe sa trata de sa fera ◊ dàemi sos ortzales, chi no ndhe seberto de custa cosa goi minuda! ◊ a s'iscuru sas cosas no si podent bene sebeltare 2. sa vida no at piús valore: paret chi no sebestet su chervedhu! ◊ a cantu ndhe sebertaia deo, unu fit de importu si ischiat a leare sa màchina ◊ mi che so sebertadu atesu, in su pessamentu Etymon ltn. sequestrare Translations French apercevoir English to perceive Spanish divisar Italian scòrgere German erblicken, bemerken.

semeschiàre , vrb Definition arrennèscere a bíere o connòschere fintzes de atesu, in mesu de àtera cosa Synonyms e antonyms allampare, assebeltare, iscerai Sentences suta de una fasche de sida, fozisina e cherchizu, si semeschiaiat unu pitu de zancheta Translations French entrevoir English to glimpse Spanish vislumbrar Italian intravedére German erblicken.