méndhula , nf: méndua,
méndula,
ménnula,
míndula Definitzione
genia de linna chi faet a mata manna e bogat unu frutu a duos corgiolos chi si arregollet sicau, bonu po su chiu maduru, impreau mescamente po fàere druches e de duas calidades principales: druche (manigiada meda) e marigosa (pagu pagu po amaretos) / min. mendhuledha; mendhuledhu = cucuja, sa méndhula candho zughet su chiu maduritu ma sa corza russa galu modhe; sa méndhula (upm) = su frutu; sas méndhulas = sas àrbures de méndhula / partes de sa méndhula: chiu o papu, pizolu, corza russa, corza fine (chi sichendhe si abberit sola e ispítzigat de sa russa); crezes sardas de méndhula durche: arrúbia, basili, bianca, cavaliera, conca de cani, cossu, croxu de ferru, farci, folla de préssiu, frantzesa, ghironi, malíssia/mauríssia, niedha, nuxedha manna, olla, perra, piricocu, ischina de procu, tundha, trexentina, vàrgiu; creze rànchida: pressiana; m. tidéntile = a corza pagu tosta chi faghet a segare fintzas a dentes
Maneras de nàrrere
csn:
iscúdiri, bodhiri, iscroxai, segai, limpiai o ispapai méndula; sa méndula de su gúturu = su fundu de su paladari; secare sa m. chin su culu = èssiri susuncu, limidu a s'úrtimu etzessu
Frases
sas méndhulas fiorint premediu ◊ un'istria, sentz’e sonu perunu, si est apatada in d-una nai de méndua ◊ ingudheni dhoi at una bia in pesada chi pretzit is olias de is méndulas ◊ sa genti is matas de méndula ndi dhas ant segadas po dhas poni in su fogu e aici non ndi teneus una mancu po fai unu gatou!
2.
bi at ménnula a duos chivos ◊ po ndi arragolli s’olia e sa méndua cicàt piciochedhus ◊ si at manigadu pagas méndhulas cun càriga ◊ sa méndhula dha ponent meda po fàere druches ◊ sa méndula de Cibirus fiat totu a duus papus ◊ sa méndhula si segat a martedhu
Sambenados e Provèrbios
smb:
Mendula
Terminologia iscientìfica
frt, Prunus dulcis
Ètimu
ltn.
amyndala
Tradutziones
Frantzesu
amandier (arbre),
amande (fruit)
Ingresu
almond (tree)
Ispagnolu
almendro,
almendra
Italianu
màndorlo,
màndorla
Tedescu
Mandelbaum,
Mandel.
