Legenda Abbreviazioni | Legenda Simboli

ispariméntu , nm: esperimentu, isperimentu, sparimentu Definizione cosa chi si faet provandho a bíere comente arresurtat o ite efetu faet, mescamente su chi faent is iscentziaos controllandho totu is variàbbiles de unu fatu o fenòmenu a manera de fàere dipèndhere s'efetu de sa variàbbile (càusa) chi decidint issos o de istabbilire cale est sa càusa de un'efetu Sinonimi e contrari iscumbata, proa, provajolu / isperiéntzia Frasi a lu faghimus un'isperimentu, giaghi deo a lu fagher prontu so? (Tuccone)◊ po is montis ant fatu is isperimentus e s'Everest arresurtat su prus artu de su mundu 2. de sas gherras ndhe amus bidu malu isperimentu ◊ como apo leadu isperimentu e isco su chi fato ◊ tue ca ses mannu as isperimentu Traduzioni Francese expérience, essai Inglese test Spagnolo experimento Italiano esperiménto Tedesco Versuch.

isperiénscia , nf: esperiéntzia, isperiénscia, isperiéntzia, ispiriéntzia, spariéntzia Definizione su connòschere sa faina, is cosas, is chistiones po dhas àere bistas, connotas, provadas, fatas Frasi su pani podit abarrai atellau e matzosu, ma is féminas chi tenint bona isperiéntzia de raru arruint in custa fadhina ◊ chin s'isperiéntzia de sos otant'annos isse intrat a s'ánima sua misuràndheli s'istripile ◊ fit iscadhau e s'isperiéntzia lu fachiat pessare a su malu ◊ s'isperiéntzia narat ca custu mali benit de su bentu marinu ◊ issu at isperiéntzia e aio fatu bene si l'aio iscurtau Traduzioni Francese expérience Inglese experience Spagnolo experiencia Italiano esperiènza Tedesco Erfahrung.

pràtica , nf: pràtiga Definizione su ischire fàere bene e cun facilidade calecuna cosa po dh'àere fata àteras bortas, ca si connoschet bene; totu is paperis de una dimandha Sinonimi e contrari pratichesa / dimandha, dochimentu 2. sa pràtiga pro sa pentzione est frimma in carchi ufíssiu Traduzioni Francese expérience Inglese practice Spagnolo práctica, expediente Italiano pràtica Tedesco Praxis, Erfahrung, Akte, Dokument.

pratichèsa , nf: pratighesa Definizione su s'ischire manigiare bene faendho calecuna cosa po dh'àere fata àteras bortas, ca si connoschet bene, po dha tènnere a parusu Sinonimi e contrari ttrs. pratighétzia Frasi cun sos zóculos no at leadu ancora pratighesa a caminare in faladorza ◊ a fàghere fainas gai bi cheret pratighesa: no est a ischire duas o tres cosighedhas, no! ◊ no est nudha si unu est in betzesa, ca za si salvat cun sa pratighesa! (Màsala) 2. fatas a sa lestra custas letziones, falau est a pratichesas Etimo srd. Traduzioni Francese expérience Inglese experience Spagnolo práctica, experiencia, destreza Italiano pràtica Tedesco Praxis.

«« Cerca di nuovo