Ditzionàriu in línia
de sa limba e de sa cultura sarda

aviliméntu , nm Definition su avilire, su èssere abbàtios, dispràxios meda, afligios, iscoraos, a bregúngia Synonyms e antonyms avilidura, iscoramentu, mortificu Sentences essendhe allegros calchi bolta nos immentigamus de s'avilimentu ◊ est arrivadu a s'avilimentu cun su landhe cheríndhesi nutridu! ◊ a chircare mere su tzeracu fiat un'avilimentu ◊ so emigradu e so morinne de s’avilimentu! Etymon itl. Translations French découragement English dejection Spanish abatimiento, humillación Italian avviliménto German Entmütigung.

disconsólu , nm: discossolu, discunsolu Definition su no àere consolu o cunfortu, su èssere dispràxios meda Synonyms e antonyms isconnortu, isconsolu | ctr. conciolu Sentences píghidas nues ant iscorvuladu bírridos de piantu e disconsolu e posca de sa traschia dannu e dolu in bidhas e cussorzas ant lassadu (G.A.Salis)◊ sos minores fint pranghendhe a discossolu ◊ za ndh'at postu de zente in disconsolu a fagher bochire sa muzere pro un'àtera fémina!… Etymon spn. desconsol Translations French abattement, découragement English depression Spanish desconsuelo Italian sconfòrto, sconsolazióne German Trostlosigkeit.

isàlcu , nm: isarcu Definition mancamentu o pérdia de ispera, de coràgiu, su bènnere mancu in manera grave de s'idea de arrennèscere, su tímere o pentzare de no arrennèscere Synonyms e antonyms disisperu, isporu, scoramentu | ctr. aficu, ispera, isperànscia Sentences a bi ndh'at, totu, de isarcos: si no ti pones, si mancu proas est seguru chi no bi resessis a fàghere nudha! ◊ s'isarcu meu est comente apo a fàghere a istudiare cussu muntone de cosa in duas dies! ◊ isarcu mannu b'at pro fàghere cussa faina…: si ti fis postu, a cust'ora fit istada fata! Etymon srd. Translations French découragement English discouragement Spanish desaliento, desánimo Italian scoraggiaménto German Entmutigung.

isconnórtu , nm: iscunnortu Definition dispraxere mannu, tristesa, su èssere afrigios, chentza acunnortu Synonyms e antonyms acoradura, afrigimentu, disconsolu, pesari, scoramentu, triltura | ctr. aconnortu, conciolu Sentences aite custu iscunnortu? aperi su coro e nara, no nos lasses in tribbulia! ◊ bortzis est naturale chi cada artista at urdos de isconnortu e de tristura ◊ sos fizighedhos fint totu in iscunnortu pro sa morte de su babbu Etymon srd. Translations French découragement English discouragement Spanish desaliento, desánimo Italian sconfòrto German Trostlosigkeit.

isconsólu , nm: iscossolu, sconsolu Synonyms e antonyms disconsolu*, dispiachere | ctr. conciolu, cuntentesa Sentences sa pitzinna pranghet a iscossolu, impudada de abbarrare sola Translations French découragement English dejection Spanish desaliento Italian sconsolazióne German Betrübnis.

isporónzu , nm Definition su s'isporare, su pèrdere de ànimu, su pentzare de no si dha pòdere fàere a bínchere is dificurtades Synonyms e antonyms isarcu, isporu Etymon srd. Translations French découragement, abattement, effarement English discouragement, dismay, dispair Spanish desaliento, desánimo Italian sconfòrto, disperazióne, sgoménto German Trostlosigkeit, Verzweiflung.

ispóru , nm Definition mancamentu o farta de coràgiu, de ibertu, genia de isarcu malu, a s'apretu, de no pòdere arrennèscere in calecuna cosa Synonyms e antonyms dirrenu, disisperu, isalcu, isporamentu, scoramentu Sentences sa soledade m'imbelat sas pupias chin tadharanos de isporu ◊ làcrimas de isporu in pupias de àstragu nighedhu murghendhe est su dolore ◊ dae intzidu e ispera pro no tzèdere a s'isporu! Etymon srd. Translations French démoralisation, abattement, découragement, consternation English demoralization, dejection, dismay Spanish desaliento, desánimo Italian demoralizzazióne, scoraménto, costernazióne German Entmutigung, Niedergeschlagenheit.