Ditzionàriu in línia
de sa limba e de sa cultura sarda

gròdhe, gròdhi , nm: grodho, grodhu Definition genia de cane areste connotu po is trassas chi portat e ca si betat a is angiones, ma tenet fama mala (sa béstia maledita, apesta, rusta) peus de sa chi meritat: po su prus papat animaledhos dannàrgios (sórighes), nimales mortos o andhaos male; in cobertantza, chie tenet unu fàere de trasseri po si papare s'angenu Synonyms e antonyms animabi, apesta, arresi, bucamala, fraíciu, gallíciu, giommaria, leori, lodhe, lodhosu, magliane, matzone, mastinu, peiganu, rulta, tzerpi, zosepe / imbovadori, tramperi, transosu Sentences su grodho abbenenat sa vida de sos pastores, ca s'anzone chi acatat irvenat ◊ s’ómine no est naschidu pro istare intanadu e catziadu che grodhe ◊ est pessamentosu e sériu, ma sempre a oju biu che a su grodhe ◊ su grodhi est castiendi is angionis… 2. no semus totu grodhes ne anzones ca tenimus unu coro e una mente! ◊ pro apedhare sos catedhos nanos no ndhe sentint sos grodhes antzianos! ◊ sunt gai imboligosos chi su grodhe che colant che anzone Scientific Terminology anar, vulpes vulpes ichnusae, v. v. crucigera Etymon srdn. Translations French renard English fox Spanish zorro Italian vólpe German Rotfuchs, Fuchs.

gúrpinu , agt Definition de gurpe, de margiane, chi faet che a su margiane Synonyms e antonyms gródhinu, maciuninu Idioms csn: pompiare a g. a unu = abbaidàrelu, bíderelu a mal'ogru, chentza li dare fide meda; rídere a g. = ríere cun malíssia, a befe, gorpeggorpe; prànghere a supedhos gúrpinos = a sa muda, chirchendhe de no lu dare a bídere; canna gúrpina = zenia de bardu (Dipsacus fullonum) Sentences est unu tempus gúrpinu irghiliniu de pistoléssia (F.Satta)◊ sa franchesa sua no fit a totus chi fachiat cracu bonu e pro cussu fit pompiau a gúrpinu de tzerta zente ◊ sa bidha li ridiat a gúrpinu ◊ si los pompiabat a gúrpinu iscanzandhe de labras a unu risitu chi pariat de befe Etymon srd. Translations French de renard English foxy Spanish zorruno Italian volpino German Fuchs…

magliàne , nm: margiane, margiani, mariane, mariani, marjane, martzane, marxani, marzane, marzani, mergiani, merxani Definition genia de cane areste connotu po is trassas chi portat e ca si betat a is angiones: ma tenet fama mala (sa béstia maledita, apesta, rusta) peus de sa chi méritat: po su prus papat animaledhos dannàrgios (sórighes), animales mortos o andhaos male; in cobertantza, chie tenet unu fàere de trasseri po si papare s'angenu: in custu sensu, e sèmpere candho si pigat s'animale che unu cristianu, su númene si narat chentza s'artículu, coment'e númene de persona (chi dhu'est puru: Marianu) e si est cmpl. ogetu si faet prepositzionale / coa de margiani = zenia de erba chi narant pabulosu (Echium italicum); innòi morit margiani = itl. qui casca l'asino, pagu bi faghent sas trassas! Synonyms e antonyms animabi, apesta, arresi, bucamala, fraíciu, gallíciu, giommaria, grodhe, leori, lodhe, lodhosu, matzone, mastinu, peiganu, rulta, tzerpi, zosepe Sentences margiani iat fatu votu de fai unu conillu: candu at fatu su fillu fiat margiani etotu! ◊ margiani portat càrigas finis ◊ s'anzone mi ndhe at furadu marzane! ◊ si no buscat un'archivusada, mariani che ponet su pè in sa matzonera ◊ bi at marianis e sirvones ◊ mergiani no est de fidai!◊ in su munnu dhue at ómines ci funt peus de is lupos e de is maglianes!◊ una note su mere isparat, su teracu andhat e acatat a mariane mortu in s'annile 2. margiani mannu imparat a is margianedhus ◊ mergiani ses de nòmini e de trassas ◊ si ponit peri a fai su mortu margiani, po mi ponni timória Surnames and Proverbs smb: Margiani, Mariane, Mariani / prb: marxani càmbiat a piu ma no a trassas Scientific Terminology anar, vulpes vulpes ichnusae, v. v. crucigera Etymon srd. Translations French renard English fox Spanish zorro Italian vólpe German Rotfuchs, Fuchs.

matzòne , nm Definition genia de cane areste connotu po is trassas chi portat e ca si betat a is angiones, ma tenet fama mala (sa béstia maledita, apesta, rusta) peus de sa chi meritat: po su prus papat animaledhos dannosos (sórighes), animales mortos o andhaos male; in cobertantza, chie tenet unu fàere de trasseri po si papare s'angenu Synonyms e antonyms animabi, apesta, arresi, bucamala, fraíciu, gallíciu, giommaria, grodhe, leori, lodhe, lodhosu, magliane, mastinu, peiganu, rulta, tzerpi, zosepe / cdh. macioni, ttrs. matzoni Idioms csn: matzone canu, fioridu = zenia de colore biancu chi leat su pilu in zerru (nadu in suspu: pessone chi zughet malíssia meda, chi tenet fama de trasseri); allegru che matzone in cabidanni = prexau meda Sentences matzone no faghet anzone ◊ su matzone est a úrulos ◊ sas trassas de su betzu no las binchet su matzone ◊ cun matzones no est cosa de si fidare! 2. fit inzeniosu e ispavillu che unu matzone ◊ sos matzones a nou sunt essidos cun prumintas de onzi calidade Surnames and Proverbs smb: Maccione, Maccioni, Mazzone / prb: su matzone podet pèrdere su pilu, ma sas trampas mai! ◊ no bi at matzone chi no fetat fine mala Scientific Terminology anar, vulpes vulpes ichnusae, v. v. crucigera Etymon srd. Translations French renard English fox Spanish zorro Italian vólpe German Fuchs, Rotfuchs.

travonéri , agt, nm Definition nau de ccn., chi est o portat trassas malas Synonyms e antonyms ammalisciadu, malisciosu, trassadori, trasseri Translations French rusé, vieux renard English old fox Spanish zorrón Italian scaltro, volpóne German schlau.