Ditzionàriu in línia
de sa limba e de sa cultura sarda

castagnàrza , nf, nm: castanàgliu, castanàrgiu, castanarju, castanarzu, castangiàrgiu, castannanzu, castannarju, castannarzu, castanzàlgiu, castanzarzu, castenàgliu, castennàgliu, castennalzu, castennàrgiu, castennarzu, catannàgiu, costennàrgiu Definition castannanzu mannu, iscoba màsciu, o màscina, e fintzes iscoba fémina: duas calidades de linna chi no faent tanti mannas, ma a cotzina grussa, bona po crabone e a fàere pipas, cun sa fògia pitichedhedha Synonyms e antonyms cantentarzu, ghidhostra, idhostra, salina 1, salinavémina, sechintrese, túfera Sentences rios e rosas intritziant tramas ismeraldinas de chercos e suèglios, lidones e castennàglios, ghiníperos e chessa Scientific Terminology mt, Erica arborea, E. scoparia Etymon srd. Translations French bruyère English heather Spanish brezo Italian èrica da ciòcco, scópa gentile German Besenkraut.

cocína , nf: cotzina, cucina Definition su fundhale cun totu is arraighinas, mescamente de una mata, de una tupa (in sa bide est fintzes su fundhu a fora, su truncu foras is pudas e sa pértiga noa); nau de unu, chi est malu a cumprèndhere o chi no bolet cumprèndhere Synonyms e antonyms cossighina, cotzigone, cotzinàrgiu, mola, tzompa 2. tocadhi sa manu, cotzina! ◊ cun totu custu tussi seu surda che cotzina Surnames and Proverbs smb: Coccina, Cotzia, Cozzia Scientific Terminology rbr Etymon srd. Translations French bûche English log Spanish cepa Italian ciòcco German Baumstumpf.

cossighína , nf: cotichina, cotighina, cotzichina, cotzighina, cotzigina, cutzichina, cutzighina Definition sa parte de is arraighinas, mescamente de una mata, de una tupa (bona fintzes po fàere pipas, segundhu sa linna); bufóngiu a tropu de pigare sa conca Synonyms e antonyms cocina, coighina 1, mola, motzighina, tzompa / coichina, imbreachera Sentences cotichina de castannarju, de chessa, de ghidhostre ◊ su linnaresu essit in chirca de linna bregadina: chimuza, cotichina, frastamaza 2. a unu tusorzu Bodale at leadu una cotzighina gai forte chi ancora ndhe faedhant, in bidha ◊ s'at picau una cotichina e andhabat a rodinu che gradharone Scientific Terminology rbr, upm Etymon srd. Translations French bûche, souche English log Spanish cepa Italian ciòcco, ceppàia German Strunk.

morciòne , nm: murcione, murcioni Definition trunchedhu curtzu, orrugu de truncu mescamente de fundhale de mata; in cobertantza nau de unu, chi est mudurcu, de pagos foedhos, chi abbarrat meda citiu Synonyms e antonyms múciu, mulcione*, muncioni, mutzichina, trunchedhu / titone / mudigone, muduleu, mutricone Sentences si callentat ananti de tres murcionis allutus ◊ sa furmica tenet sa cala in murciones e tróculos ◊ niedhu che unu murcioni 2. a chini no chistionat e non ci dhi fuit s'errisu naraus ca est cosa de murcioni Surnames and Proverbs smb: Murcioni Translations French bûche English log Spanish tocón Italian ciòcco German Strunk, Baumstumpf.

túfera , nf: túvara, túvera, túvura Definition iscoba màsciu, màscina o túvara bera, iscoba fémina o vera e fintzes iscova burda, tres calidades de sa matessi linna chi faet fògia pitichedhedha, frore biancu, arraighina bona po fàere pipas e pitica coment'e mata, prus che àteru a tupa / túvara vitània = napu o fintzes tapu tamburru, genia de erba chi narant fintzes patata americana (benit de s'América: nms. Helianthus tuberosus), faet unu cambu finedhedhu e longu meda e in s'arraighina faet una genia de nodos mannos e longos, una patata, ma prus tostada e druche, a pigiolu orrubiastu; túvera a logos est una genia de codrolinu chi faet asuta de terra a bisura de patata: itl. tartufo Synonyms e antonyms cantentarzu, castagnarza, ghidhostra, idhostra, lòstiri, salina 1, scovitzi Sentences custa tanca est prena de ozastros, de túvera e de lidone ◊ curres a ispantu tra túveras e chercos poderosos e castanzas e ílighes Scientific Terminology mt, Erica scoparia, E. terminalis Translations French bruyère English heather Spanish brezo Italian èrica da ciòcco, scópa gentile German Besenkraut.

tzòmpa , nf Definition tzitzonedhu, su tretu ingrussau de s'arraighina ingrussau, pruschetotu de unas cantu matas, pagu pagu asuta de terra, a pígiu Synonyms e antonyms cioca 1, cocina, cossighina, cotzigone, mola, soca 1 Sentences depiat andhare a bogare tzompas ◊ sa chessa, s'ozastru, su castanzarzu faghent a tzompa, suta ◊ apo tribbulau tirandhe tzompas e carrendhe chessa Scientific Terminology rbr Etymon srd. Translations French bûche English log Spanish cepa Italian ciòcco German Baumstumpf.