Ditzionàriu in línia
de sa limba e de sa cultura sarda

fundàbi , nm: fundali, fundhale, funnale Definition su tretu de fundhu (mescamente su tretu prus bàsciu in su truncu de matas mannas, fintzes de domos), su tretu prus atesu (fintzes de unu possessu, su tretu a s'àtera bandha de s'intrada), sa parte prus in fundhu de su mare, de unu muru, in terra, e su fossu puru; logu chi faet a badhe, bàsciu e in paris che a sa cea, ma prus úmidu, peale de monte; sa síngia o erriga chi si paret tra terra e aera, atesu (si narat prus che àteru pl.); in sa carena, su tretu de is nàdigas; su fundhurúgiu, mescamente su chi faent unas cantu cosas postas in istrégiu; logu de matas (fundhos) Synonyms e antonyms fundhache, fundhera, fundhu / imbasamentu / badhe / feche / padente / ttrs. fundari Idioms csn: fundali de àcua = poju, paule de abba, garropu, fundagu; fundhale de àrbure = su chi abbarrat in terra, paris cun sas raighinas, de un'àrbure pustis segada; su fundhale de s'ulicra = su fossighedhu suta de s'origra; su fundali de sa massa (laore) = su trigu de fundhu, in terra, in s'arzola Sentences tue depes èssere issiu dae su fundhale de s'iferru, ghetadommos! ◊ sos fundhales de su mare sunt fungudos cantu prus si andhat a mesu ◊ ant fatu is fundhales de sa domo a picu e a pala ◊ eus bíviu in cussu frius de su fundabi de sa funtana ◊ pigai s'ànima sua e ghetaincedha a fundali! 2. est in su fundali pascendi is brebeis 3. sos fundhales sunt rujos ◊ a iscurigadroxu su fundali no s'iscerat prus ◊ s'ispacat s'aera che melagranada, fundhales biaitos s'iscavacant ◊ su funnale cara a Tíana est inniedhigannosi 4. non papat pisci po no s'isfundi su fundali ◊ custas mudandas parint piticatzas po su fundali tuu 5. chin s'ape issos cherent isfrutare sos frores de su fundhale pro buscare leu e chera, papa e mele Scientific Terminology slg, crn Etymon srd. Translations French vallée, horizon, souche English valley, horizon, stump Spanish valle, horizonte, cepa Italian vallata, orizzónte, céppo German Talebene, Horizont.

orizònte, orizònti , nm Definition s'orale de sa terra atesu comente si podet bíere ororu ue paret de si tocare cun s'aera, mescamente a sa bandha chi essit su sole; nau in cobertantza, ideas, cosa a ue unu cricat de punnare, de bíere coment'e iscopu Synonyms e antonyms orizu Sentences in s'úrtimu orizonte su sole grogo isterriat un'arcu de àghera asulina ◊ in s'aera anneulada aizu si bidiat s'orizonte ◊ miràt a parti e atra totu cantu andàt s'orizonti Translations French horizon English horizon Spanish horizonte Italian orizzónte German Horizont, Aussicht.

orízu , nm Definition totu su tretu prus in fora de una cosa, de unu trastu o de unu logu; s'oru de s'orrobba comente si pinnigat e cosit a manera de no s'isconciare sa tessidura, de no istramare; sa línia chi acabbat sa vista; genia de trebballu in fine coment'e po bellesa Synonyms e antonyms oru / indorladura, oruladura, órulu 1 / orizonte | ctr. mesu Sentences at comintzadu s'orizu de sa tela pro fàghere su ballitu in sa mustra ◊ su casu friscu, faghindhe sas seadas, si ponet in sa pasta illadiada tundha dassendhe bagante un'orizu a inghíriu 2. su sole fit altu a calchi paju de cannas dae s'orizu de sos montes 3. apo iscritu comente si faedhat in bidha pro resessire a coglire sos orizos piús fines de sa faedhada Etymon srd. Translations French ourlet English hem, hemming Spanish borde, orilla, dobladillo, ruedo Italian órlo, orlatura German Rand, Saum, Horizont.