Ditzionàriu in línia
de sa limba e de sa cultura sarda

atachedhài , vrb: tachedhai* Definition fàere intacas, genia de segadedhas prus che àteru po singiale Synonyms e antonyms intachedhai, intatzare, tacai, tacullare Translations French encocher English to notch Spanish hacer muescas Italian intaccare German einschneiden.

incràsta , nf Definition genia de segada o síngia chi si faet lassandho coment'e unu canaledhu; genia de buidedhu tra duas o prus cosas Synonyms e antonyms imbaga, intaca, tachedha Translations French entaille, encoche English notch Spanish acanaladura, ranura Italian intacco, scanalatura German Einschnitt, Auskehlung.

incràva , nf Definition genia de segada manna po fàere a incàsciu calecuna cosa Synonyms e antonyms arragata, intaca, intatzu, taca 2 / angina, argadóriu, àrgheda, elgatzu, gàrgaru, incartzu, ràglia 1 Scientific Terminology fst Etymon ctl. enclava Translations French entaille, jable English notch, croze Spanish gárgol, jable Italian intaccatura, caprúggine German Einschnitt, Gargel.

intàca , nf, nm: intacu Definition síngia fata a incàsciu o marcada fintzes a tinta mescamente po singiale e cun critériu precisu (es. sas i. de s'istadea, de su metro, de su càlibbru); dannu a sa salude, a s'onore, vítziu puru Synonyms e antonyms tachedha / arragata, incrasta, incrava, intatzu, taca 2 / aciàchidu, màcia, taca 3 / peca Idioms csn: fàghere i. in carchi faina o chistione = fai meda, produsi un'efetu chi si bit, mannu de si biri; rispòndhere a s'intacu = a puntinu, bene meda Sentences in s'istadea donzi intaca est chimbanta grammas, pesendhe a sa fine, e mesa líbbera a sa russa ◊ cadramissat fatendhe in terra tres palmos de intacu ◊ manos de atzàgliu mi ant prenu sa carena de intacos 2. torramus in palas ca est proghendhe, chi oje ndhe picamus intacu mannu! ◊ no apo mai furadu e ne mi che cherzo pònnere cuss'intacu! 3. bi ndhe faghet de intaca, cussu, seghendhe una roca a martedhu!…◊ bi ndhe faghet de intaca una criadura in totu cussa cosa de fàghere!… Etymon srd. Translations French gravure, égratignure, entaille, cran English incision, notch, scratch Spanish incisión, muesca, tacha Italian incisióne, scalfitura, tacca German Einschnitt, Schramme, Kerbe.

intacài, intacàre , vrb Definition fàere intacas, a intacas; fàere male tocandho s'onore de s'àteru, ponendho in giru numenada mala Synonyms e antonyms atachedhai, intatzare Translations French encocher, entamer English to notch Spanish mellar Italian intaccare German kerben.

tachèdha , nf Definition genia de segadedha, a incàsciu longhitu fatu in cosa tostada segandhondhe un'apenas a istúturu Synonyms e antonyms intaca, trapada Idioms csn: comporai a t. = a dépidu (a marcare in libbereto); agatai a unu sa t. sua = agatàreli su pecu, su puntu débbile Sentences po allistai su chi bendiat usàt is tachedhas ca no fiat bellu a iscriri ◊ is tachedhas mannas in s'arromana funt is chilus, is piticas duxentus grammus Translations French gravure English notch Spanish entalladura Italian intàglio German Schnitzerei.

trapadúra , nf Definition su trapare; su trapai; genia de segada, de aperta, de istampu, fintzes puntu de ricamu (t. a àrgias, a culurgionedhos, de filei a naischedhas, a s'ingresa) Synonyms e antonyms secada, trapada / istampadura Sentences zughet sos pes insambentados dae sas trapaduras de sos zelones Etymon ctl. trepadura Translations French fente, coupure English notch, piercing Spanish incisión, agujero Italian incisióne, strafóro German Einschnitt, Bohrung.

trapàre , vrb Definition fàere segadas o trincos a lepedha, a gurtedhu, o fintzes segare a sola si est cosa tostada o frida Synonyms e antonyms intacugliare, ispitighedhare, sacai / trapai* Sentences si trapat s'olia pro la cufetare, sa castanza pro l'arrustire ◊ su fritu mi at trapadu totu sas manos ◊ s'impastu tropu rassu si trapat, comente assutat, si no est abbadu meda 2. adhae si bidet una lughe atzesa tremulendhe che oju lagrimosu in tundhu in tundhu trapendhe sa note (G.Fiori)◊ su dolore punghet e trapat carres e sentidu Translations French graver, entailler, fendre English to engrave, to notch, to cleave Spanish incidir, hendir Italian intagliare, incìdere, fèndere German schnitzen, einschneiden.