Ditzionàriu in línia
de sa limba e de sa cultura sarda

arruínu , nm: orroghina, roghina* Definition dannu mannu, meda Synonyms e antonyms desacatu, isciàsciu Sentences sa campagna est tota un'arruinu: àlvures istratzadas, trigos chi parent apeigados Translations French ruine English ruin Spanish ruina Italian rovina German Verderben.

derrúere, derrúghere , vrb: derrúiri, dirrúere, dirrúghere Definition su si lassare andhare de male in peus, chentza si tènnere contu; batire o lassare andhare una cosa, unu logu o a unu de male in peus, fàere andhare male, fintzes isconciare Synonyms e antonyms arroinare, atzimare, derrocai, dirruire, dissantarare, ifasciare, irderrúere, iscalabrare, isciarrocai, isciusciai, ispèldere, istrossare Sentences sa pitzoca est derrughèndhesi de su totu chi no fachet a la bíere! ◊ sa domo chi no b'istat neune si che derruet ◊ mortu su mere, s'ortu si ch'est derrutu, irbandhonadu ◊ màniga ca sinono ti derrues peus cun custas meighinas! 2. cussa cosa derrughet sa pessone piús sana ◊ custos canes arestes nos sunt dirruinne ◊ dirruo sos camasinos chi apo e ndhe fràigo piús mannos Etymon ltn. deruere Translations French tomber en ruine, ruiner English to ruin Spanish arruinarse, arruinar, derrumbarse Italian andare o mandare in rovina, dissestare German verfallen, ruinieren.

derrúta , nf: dirruta Definition s'efetu de su derrúere Synonyms e antonyms arruinu, desacatu, sderrocu, sderrota, sderruimentu | ctr. benefíssiu, mezoru Sentences pariat zente nóbbile, ma unu pagu coment'e in derruta Etymon srd. Translations French ruine English ruin Spanish ruina Italian rovina German Ruin.

derrútu , pps, agt: dirrutu, disurrutu Definition de derrúere; chi est totu andhau male Synonyms e antonyms derruidu, irderrutu 2. a su babbu no l'at abbandhonadu, candho l'at bidu derrutu de fortzas ◊ no azis sa carena gai derruta pro istare semper in su cuzolu! ◊ custas domos sunt dirrutas ◊ cussa crésia est de azustare ca est disurruta Translations French tombé en ruine English ruined Spanish arruinado Italian andato in rovina, dissestato German verfallen.

dissàntara , nf, nm: dissàntaru Definition su bogare de pare sa cosa Synonyms e antonyms arruinu, derruta, desacatu, destrossa, gastu 1, iscunsertu, istrópiu, sderrocu, sderrota, sderruimentu Etymon srd. Translations French dégât, ruine English damage, ruin Spanish daño, ruina Italian guasto, rovina German Verfall.

irderrúere , vrb: sderrúiri Definition andhare o fàere andhare male, de male in peus, fàere andhandho e peorandho Synonyms e antonyms abbotinare, arroinare, atzimare, azinare, decaire, derrocai, derrúere, ifasciare, isberrúere, iscalabrare, iscempiai, isciarrocai, isciusciai, ispèldere, istrossare Etymon srd. Translations French être en décadence, tomber en ruine, se ruiner English to decay Spanish decaer Italian decadére, andare in rovina German verfallen.

ispérdidu , pps, agt: ispérdiu, spérdiu Definition de ispèrdere; chi no si agatat prus; a logos, guastu, malu, totu andhau male, abbandhonau Synonyms e antonyms ispéirtu, isperevunniu Sentences su logu irbandhonadu, chentza bi colare prus neune a bi triballare, si ch'est ispérdidu 2. assimbillat a una bidha ispérdia 3. cussu casu non fut ispérdiu, ansis fut peri bonu! (G.C.Mameli) Translations French disparu, ruiné English lost, destroyed, gone to ruin Spanish desaparecido, destruido, estar echo una ruina Italian scomparso, distrutto, andato in rovina, desolato German verschwunden, zerstört, verfallen.

istrassàre , vrb: istrassiare Definition batire a malu puntu, de su dannu meda, orruinare Synonyms e antonyms arroinare Sentences ahi, Sardigna, comente ses tue, dae cantos canes ses istrassiada! Translations French ruiner English to ruin Spanish arruinar Italian mandare in rovina German Zugrunde richten.

roghína , nf, nm: arruinu, roina, rughina, ruina, ruinu Definition dannu mannu, meda; ruinu si narat fintzes po ruinzu, orruina Synonyms e antonyms bisorruta, desacatu, iscalabru, isciàsciu Sentences si unu contr'a s'àteru si parat, de domo sa ruina si preparat ◊ in s'istiu sa Sardigna est un'inferru de focos, de roghina, de morte ◊ cussu est sa rughina de sa domo! ◊ est diventada piena de dogni ruinu, custa pàtria mischina ◊ si bi mancat su trigu, ozu e casu finas pro nois est una ruina! (Màsala) Surnames and Proverbs smb: Ruina, Ruinas Etymon ltn. ruina Translations French ruine English collapse, ruin Spanish ruina Italian rovina German Ruin.

sciàsciu , nm: [scià-sciu] Definition su sciasciai, su distrúere totu Synonyms e antonyms arruinu, desacatu Sentences eis biu totu su sciàsciu chi ant fatu is Tedescus in custa guerra? ◊ eus a intendi su sciàsciu: sàbudu dhus depint interrogai in tribbunali ◊ it'est su sciàsciu chi as fatu andendi a su buju a cicai cosa? ◊ agabbadha, deghinou sutzedit caincunu sciàsciu mannu! ◊ candu at a sutzedi totu su sciàsciu de sa fini de su mundu? Etymon srd. Translations French destruction English ruin Spanish destrucción, ruina Italian distruzióne, rovina German Zerstörung, Zerfall.

sderrócu , nm: irdorrocu*, sdorrocu Definition su ndhe orrúere o betare calecuna cosa, meda, a cropu coment'e isconciandho e distruendho totu; s'efetu de su sdorrocai, sa moida manna, su tzàcurru o fragassu chi faet Synonyms e antonyms arruinu, derruta, desacatu, sderrota, sderruimentu / isciarrocu, mamudinu, sciumbullu, sculumerdu, stragambullu, torrocaxa, torrocu Sentences apu inténdiu su sdorrocu de comenti est arrutu in s'aposentu de letu: at móviu fintzas su letu e si at fatu un frincu in conca! Translations French écroulement, grondement English ruin, rumble Spanish derribo, fragor Italian rovina, boato German Einsturz, Getöse.