Ditzionàriu in línia
de sa limba e de sa cultura sarda

cadínu , nm: carinu, curinu Definition istrégiu mannu, artu e largu impreau fintzes po binnennare, pònnere abba e àteru; àtera genia de istrégiu prus mannu, fatu de canna isperrada intéssia o àteru cadinu po orrobba)/ min. cadinedhu Synonyms e antonyms gofa, cavagna / lóssia, paneri Idioms csn: c. de arremustai = ispétzia de iscartedhu mannu chi serbit pro ndi bogai su mustu de is tinas candu est ancora cun sa binatza; c. de preta = lússia, isterzu mannu de canna intéssida a pònnere laore; c. de pannus = paneri; pisci ’e c. = chistiones o cosas personales, prus díligas; seguru che àcua in c. = seguru nudha; fai iscartedhu e c. = nàrrere, fàghere totu unu, dimandha e risposta, no chèrrere azudu; cadinu isfundau (nadu de unu) = chi no assutat mai, sempre faedhendhe Sentences at segadu su cadinu torrendhe dae s'abba ◊ unu cadinu de àxina podit pesai de binti a bintixincu chilus ◊ candu si binnennàt a carinus is portarois portànt totu su suci in sa camisa 2. fit betendhe abba a cadinos ◊ custa cosa est segura che abba in cadinu… 3. totu bollit fai issu, iscartedhu e cadinu! ◊ chini ti at nau nudha? totu ses fendi tui, iscartedhu e cadinu! Surnames and Proverbs smb: Cadinu Scientific Terminology stz Etymon ltn. catinus Translations French panière English big basket Spanish cesta, cestón Italian cestóne German großer Korb.

caistèdha , nf, nm: canestredha, canistedha, canistedhu, canistredha Definition de s'istrégiu de fenu (est fata de iscaria), est cussu a costaos bàscios e piticu (unos barantas centímetros de diàmetru) impreau a pònnere prus che àteru cosa de papare, fintzes in mesa (es. su pane) Synonyms e antonyms cherrighedha, palinedha, palini, pobinu Sentences pone duos orzatos in sa caistedha ca immurzamus! ◊ pitzinnu minore ma, si li bocas canistedha, sa parte sua si la fachet che pessone manna! ◊ assupreint sas féminas a ndhe acabidare in cólvulas e canistredhas piatos, istelzos, pane e dulches restados Scientific Terminology stz Translations French corbeille, manne English small basket Spanish panero Italian canestrino German kleiner Korb.

caistédhu , nm: canistedhu 1, cranistedhu, canistredhu Definition su cherrigu, de s'istrégiu de fenu (est fatu de iscaria) est cussu a costaos bàscios (ma prus artos de cussos de sa canistedha) e prus mannu meda (largu mancari unu metro e prus de diàmetru); in calecunu logu dhu narant a sa canistedha (de matessi genia e bisura ma meda prus pitica)/ canistedhu de allàciu = istrexu de fenu a puntu longu Synonyms e antonyms banastra, carrigu, coladòrgia, irgrandiola Sentences su pani si poniat in canistedhus e palinis e si lassàt axedai in callenti o imbussau ◊ dónnia chida is massajas prugànt e faiant sa farra in sedatzu e canistedhu ◊ tia Tatónia issunniat su trigu de maghinare, dhu lassàt a sicutare unu pagu e pois che dhu betàt in duos canistedhos Scientific Terminology stz Etymon ltn. canistellum Translations French grande corbeille English wicker basket Spanish canasta, harnero Italian canèstra, gròsso canèstro German großer Korb.

cavàgna , nf, nm: cavània, cavànna, cavànnia, cavànniu, gavagna Definition istrégiu mannu de càrrigu, a usu de cascita, no tanti artu, fatu a tiras longas de linna ladas e intéssias Synonyms e antonyms cofa Sentences de sa butega est essiu unu piciochedhu cun d-una cavagna de pani ◊ at pigau sa cavànnia po arregòlliri canciofa Scientific Terminology stz Translations French panier, grande corbeille English shopping-bag, big basket Spanish cesta Italian spòrta, gròssa césta German Korb.

còfa , nf: gofa Definition genia de istrégiu mannu tundhu e artu, totu apertu in pitzu, fatu cun pertighedhas fines téssias, o fintzes de canna, po portare pedra pitica, carrare frutuàriu e àteru Synonyms e antonyms iscofa 1 Sentences in cussa ofelleria faiant su dinai a cofas ◊ cussa no est cosa de pigai a cofas: o ita est, giarra?! ◊ inchi ti ndi essit pigau una cofa de dimónius! Scientific Terminology stz Etymon ctl. cofa Translations French corbeille de vannerie English wicker basket Spanish cesta, canasta Italian césta di vìmini German Weidenkorb.

coignólu , nm: coinzolu, cuinzolu Definition genia de istrégiu mannitu fatu cun pertighedhas intéssias, de canna Synonyms e antonyms corbinzolu, pischedha, scartedha Sentences si at ammanitzadu su fusile, unu coinzolu cun binu, pane e casu, e ch'est essidu a catza ◊ su trigu l'at postu in su coinzolu ◊ at buscadu unu cuinzolu de figu Scientific Terminology stz Etymon ltn. cophinus Translations French panier, corbeille English basket Spanish cesto Italian bùgnolo, corbèllo, cestino German kleiner Korb.

còlbe , nf: colve, corbe, corva, corve, cove, crobe, crobi Definition istrégiu mannu de fenu (iscaria) a costaos artos, téssiu cracu meda de no lassare passare mancu sa farra prus fine: po su prus pigat unos binti chimbe litros; a logos sa corve est istrégiu fatu a pertighedhas e canna isperrada / min. corvitu, crobedha, corvezola = zenia de córbula, crobadhedha / piciocus de crobi = pisedhos chi in Castedhu mandhaiant a sos cumandhos a batire o portare cosa a córbula Synonyms e antonyms cólvula Sentences est passada Fulana cun sa colbe de trigu ◊ ndhe calat sa corve dae cúcuru e lis faghet assazare de su chi zughiat ◊ leade sa cove a che pònnere custa cosa! ◊ at afacau sa pudha in d-una crobe po criare ◊ porto as corbes chin us erregalus de us isposos Surnames and Proverbs smb: Corbe, Corbedda, Crobe, Crobedda, Crobis Scientific Terminology stz Etymon ltn. corbe(m) Translations French panier English large basket Spanish canasta Italian còrba German Korb.

corvítu , nm Definition genia de colve pitichedha Scientific Terminology stz Translations French panier English basket Spanish cesta Italian corbèllo German Korb.

cóvinu , nm Definition arretza po piscare ambidha, nassa fata cun pértiga Scientific Terminology pscd Etymon ltn. cophinus Translations French nasse pour pêcher l'anguille English eel basket Spanish nasa para anguilas Italian nassa per anguille German Aalreuse.

crobecàda , nf: crubecada Definition crobe, istrégiu de pramma o de fenu, cun covecu po pònnere o chistire pane, farra Sentences in sa crubecada allogu símbula grussa e frégula Scientific Terminology stz Etymon srd. Translations French panier English basket Spanish panera Italian zana, césta di fibre di palma German Korb aus Palmenfaser.

frossèlla , nf: fruscella, frussella Definition istrégiu piticu fatu de tzinniga intéssia (como de plàstica) po dhue pònnere s’arrescotu friscu chi si piscat faendhodhu; s’arrescotu chi dhue cabet aintru; istregighedhu de terra Synonyms e antonyms frúscia, piscedha Sentences at batiu una frossella de recotu pro si la rebbotarent ◊ nachi est andhadu a leare fruscellas de regotu Scientific Terminology stz. Translations French faisselle English small basket Spanish encella Italian fiscèlla German Weidenkorb, Handkorb.

irgrandiòla, irgrandizòla , nf Definition canistedhu mannu Synonyms e antonyms caistedhu, ingrandhajola Sentences si poniat sa sedatzadorja intro de s'irgrandizola ◊ leàdebbos una cogone dae s'ingrandiola mia! Scientific Terminology stz Etymon srd. Translations French corbeille English wicker basket Spanish canasta Italian canèstra German großer Korb.

ispòrta , nf: isportza, sporta Definition istrégiu de giuncu, coment'e un'iscartedha allonghiada, fata po pigare su trigu semenandho o pònnere in su bruncu a is animales candho tréulant po no papare laore / avb. a s'isporta (cun isporta)= nau de pantalones, istrintos in is cambas, de su benugu a su cambúciu, adatos po chie ponet is cambales, cicit a cuadhu Synonyms e antonyms panalza Sentences si fit istada cosa de manicare ndhe aviat cenu chimbe o ses isportas ◊ de mongixedhas ndi bodhiaiaus a isportas prenas ◊ cussa est una piscinàrgia e un'isporta isfundhà! 2. si unu si bestit in giancheta de billutu, gambales de corria e pantalones a s'isporta, est unu pastore Scientific Terminology stz Etymon ltn. sporta Translations French panier English basket Spanish espuerta Italian spòrta German Korb.

isportínu , nm: sportinu Definition genia de istrégiu tundhu e ladu a duos pígios apertos in mesu (po intrare in su fusu de sa prentza), fatu de crinu, fatu de crinu po pònnere s'olia mólia a dha prentzare / mata de i. (nadu de unu)= mataudhone, chi portat brenti manna Synonyms e antonyms iscartinu Sentences at cumintzau a carrare sos isportinos, los at prenaos e postos in sa supressa ◊ cada momentu umpriat una túrbia de abba budhia e la ghetabat a sos isportinos ◊ is isportinus si ponint unu apitzus de s'àteru intraus in su fusu de su bancu 2. mata de isportinu chi no est àteru! Etymon srd. Translations French scouffin English big round basket Spanish capacho Italian fìscolo German Beutel zum Auspressen der Oliven.

órriu 1 , nm: úrriu Definition cadinu de preta o tiras de canna, mannu meda, po pònnere laore chistiu / mannu cantu un'ó. = mannu meda Synonyms e antonyms cadinu, granale, lóscia Sentences su trigu est siguru in s'órriu ◊ annos de fadigas acolumant sos órrios de sos matimannos ◊ in nedhue bi at órriu seguru, sas incunzas sunt totu devastadas Scientific Terminology stz Translations French gros panier cylindrique à provisions English cylindrical basket of interlaced canes to keep grain Spanish hórreo Italian granàio cilìndrico di canna intrecciata German Strohkorb für den Weizen

palinèdha , nf: pallinedha, parinedha Definition min. de palina: de s'istrégiu ladu de fenu (est fatu de iscaria), est cussu piticu (unos baranta centímetros de diàmetru) e a costaos bàscios, prus largu in is oros Synonyms e antonyms caistedha Sentences Mariarosa at postu is cocòis e is modhitzosus in sa palinedha ◊ apicaus dhui at sedatzus po fai sa farra, parinedhas e crobedhas Scientific Terminology stz Translations French petite corbeille English small basket Spanish cesta pequeña Italian canestrino German kleiner Korb.

panéri , nm Definition cadinu de pannus, istrégiu matucu cun su fundhu de pértigas e is costaos fatos cun tiras de canna isperrada intéssia, cosa chi a logos narant corve (nf.); in cobertantza, su culu / min. paneredhu Synonyms e antonyms pischedhu, scartinna / colu 1, ciapanarju Sentences sa fémina po bogare a lughe sos fizos si est inzeniada a fàere crobes e paneris de iscraleu, frorizaos un'ispantu 2. dh'ant operau de murenas a paneri ◊ is piciochedhus si funt agataus currendi conca a bidha cun is peis atacaus a paneri, de sa timoria! Scientific Terminology stz Etymon ctl. paner Translations French panier English basket Spanish cesta, canasta Italian panière German Korb.

paneríta , nf: parinita, paronita Definition genia de paneri Synonyms e antonyms paneredhu Sentences iscurtzas, a munnedha cugudhadas, in dies caldas e in dies fritas, cun córvulas, cestinos, paneritas in Tàtari intrant a una trumada ◊ atzendhe sos pensamentos e arríbbalos in una paronita de seda (Z.Zazzu) Scientific Terminology stz Etymon srd. Translations French corbeille, panier English small basket Spanish cesta Italian cestèllo German kleiner Korb.

scartèdha , nf, nm: iscartedha, scartedhu Definition genia de istrégiu (fatu cun pertighedhas intéssias e canna) chi de su fundhu faet andhandho (artzandho) e aperindhosi de prus in artu, in is oros / partes de su scartedhu: su fundhu, is costaos, s'asa (una o duas), is oros; min. scartedhedhu Synonyms e antonyms coignolu, ispasa, piscedha, scartina Sentences sa scartedha est prena a cúcuru ◊ po fai is costas de su scartedhu imperant is tiras de canna isperrada ◊ no mi nd'ant giau e ndi seu torrau a scartedhu búidu Surnames and Proverbs smb: Scarteddu Scientific Terminology stz Translations French panier English basket Spanish cesta, canasta Italian césta, panière German Korb.