Ditzionàriu in línia
de sa limba e de sa cultura sarda

cantàda , nf Definitzione su cantare, ma fintzes sa manera de cantare / c. de sèi = a gara de improvisadores, a sa campidanesa Frases cantas cantadas fatas in cussas festas! ◊ calincunu at iscritu s'istória de sa cantada campidanesa Ètimu srd. Tradutziones Frantzesu action de chanter quelque chose Ingresu singing Ispagnolu acción de cantar Italianu cantata Tedescu Gesang.

càntara 1 , nf Definitzione càntigu o chistionu chi giaet ifadu / ómine de c. = ifadosu Sinònimos e contràrios làntara, laredha, mémula, taja Frases ne portat una de càntara, cussu!… Sambenados e Provèrbios smb: Càntara Ètimu srd. Tradutziones Frantzesu chant ou parler agaçants Ingresu singing Ispagnolu cantilena Italianu canto o parlare noióso, stucchévole Tedescu eintöniger Gesang.

cantarólu , agt, nm Definitzione chi o chie cantat fatuvatu Sinònimos e contràrios cantaredhu 1 Ètimu srd. Tradutziones Frantzesu chanteur, celui qui aime chanter Ingresu singing Ispagnolu cantarín Italianu canterino Tedescu sangeslustig.

cànticu , nm: càntigu Definitzione su cantare, su istare cantandho / genias de càntigu: a poesia, a chiterra, a tenore; c. de possè = gara poética Sinònimos e contràrios càntida Frases su cànticu de sa tonca, su murmutu lépiu de sos padentes ammudaos li poniant in s'ànima unu sensu de tristura ◊ l'intendho totaganta die a càntigu ◊ su càntigu sou za est bellu, ca tenet boghe bella ◊ su Cànticu de sos cànticos est de Salomone Tradutziones Frantzesu chant Ingresu singing Ispagnolu canto Italianu canto Tedescu Gesang.

càntida , nf, nm: càntidu, cantu 5 Definitzione su cantare, su istare cantandho Sinònimos e contràrios cantaxu, cànticu, cantonzu Frases deveras, su càntidu no mi donat errichesa e ne onori de gherreri ◊ at ancora in orijas sos càntidos issoro Ètimu srd. Tradutziones Frantzesu chant Ingresu singing Ispagnolu canto Italianu canto Tedescu Gesang.

cuncórdiu , agt, nm: cuncordu Definitzione chi est o chi istat in cuncórdia, chi est a su matessi tamanu, totu a un'origa, de sa matessi idea de un'àteru, chi faet o chi andhat impare cun àtere o àtera cosa, chi est apostu, chistiu a dovere; su istare a cumone e acórdiu, in paghe s'unu cun s'àteru; unas cantu personas (cantadores de c.) chi cantant impare a boghe diferente: cuntzertu, tenore (fatu de sa boghe, sa mesaoghe, su contra, su bàsciu) e fintzes su càntidu chi faet; s'oraria chi si donat a sa fidantzada, cosas de sa matessi genia arregortas impare; cosa o chistione po comente arresurtat cuncordada, comente si presentat, po sa bisura chi tenet / mòere su c. = comintzare su càntidu a tenore; is cuncordos = foedhandho de druches o àteru de papare, itl. gli ingrediènti Sinònimos e contràrios cuncordiosu / cussertu / cuncódria / cunsonu, cuntratu 1 / assorte | ctr. iscuncordu Frases si lu chircas, tantu za l'agatas cuncordu a ti fàghere faina!…◊ cussos duos sunt sempre cuncordos, bastus chi siat a fàghere cosa chi lis piaghet! ◊ za lu tenet cuncordu su logu: totugantu betadu apare tenet! ◊ in sa punta de su carru poniaus unu giuali cun duas frucidhedhas cuncodras chi serbiant po giú 2. che deris in dudas mi agatas inoghe cantendhe a cuncordu sos dillos de sa binnennera (G.Fiori)◊ su cuncordu de sos cunfrades a s'iscravamentu cantat su "miserere"◊ a noda de mediana su sulitu in cuncórdiu cun pitiolus e trinitus sonàst Ètimu srd. Tradutziones Frantzesu conforme, d'accord, chants chorals (à ténor) Ingresu choral singing, in accord Ispagnolu concorde, canto coral, configuración Italianu concòrde, unànime, canto corale (a tenores), configurazióne Tedescu übereinstimmend, Choralgesang, Gestaltung.

cunsónu , nm Definitzione cuncordu de cantores, su càntidu chi faent; su cunsonare, su torrare paris de una cosa cun àtera Sinònimos e contràrios coro 1, cuntratu 1 2. sa peràula depet esser sempre in cunsonu cun sa sustàntzia de sa chistione ◊ su tràgiu signalat finamentra su cunsonu de su poete cun su tenore, cantendhe ◊ intraiat in cunsonu cun sa zente Ètimu srd. Tradutziones Frantzesu chœur, chant choral Ingresu chorus, choral singing Ispagnolu coro, canto coral Italianu còro, canto corale Tedescu Chor, Choralgesang.