Ditzionàriu in línia
de sa limba e de sa cultura sarda

anchiàda , nf: Definitzione cropu de camba (anca), de pei (de ananti), nau de animales Sinònimos e contràrios anchionada Ètimu srd. Tradutziones Frantzesu coup de patte Ingresu blow with a paw Ispagnolu patada Italianu zampata Tedescu Pfotenhieb.

càlche , nf, nm: carce, carche, carci, cartze, crache Definitzione cracada o calada de pei, cropu giau cun su pei, mescamente nau de animales chi iscudent cun is peis de asegus Sinònimos e contràrios càlchida, càrcini Maneras de nàrrere csn: sas calches de sas laras = is corrus de sa buca; dàresi carches a culu (cosa chi no faghet!)= no ndh'àere perunu dispiaghere; sos úrtimos craches = corpos chi s'animale daet innantis de istirare sas ancas, morindhe; torrare su crache a ccn. = pagaresindhe, de un'ofesa; dare su calche de s'àinu a ccn.= torràreli male pro bene Frases a torrare su calche a su molente si restat de siéntzia chepare ◊ irighedha sas carches chi mi at dadu, cussu poledhu, comente li so acurtziadu!…◊ azummai mi aiat mortu cun cussu carche chi mi at dadu, s'ebba! 2. a mi ndhe dao de carches a culu si ti che andhas!…◊ de cantu istao bene mi tiraio calches a sa coa… (P.Pisurzi) Ètimu ltn. calce(m) Tradutziones Frantzesu ruade Ingresu kick Ispagnolu patada, coz Italianu càlcio Tedescu Fußtritt.

càlchida , nf, nm: càlchidu, càlchiu, càrchida, càrchide, càrchidu, càrciga, cràchida, cràchidu Definitzione cropu chi is animales giaent cun is peis de asegus Sinònimos e contràrios calche, càrcini Frases una corríncia, sendhe in pitzinnia, càrchidos si betaiat in sa coa ◊ cussu poledhu candho si sapit zente acurtzu si bortat a càrchides ◊ ti acurtzas a su molente e dhi pones sa fune, però chistionadhu, sinono ti che aporrit crachi cràchida. (M.Deiana)◊ su pastore est curtu a ischirriare su bitelledhu dae sos cràchidos de sa mama, chi no ndhe agguantat s’aggheju Sambenados e Provèrbios prb: a torrare su càrchidu a s'àinu dolet piús a tie Ètimu srd. Tradutziones Frantzesu ruade Ingresu kick Ispagnolu coz, patada Italianu càlcio Tedescu Huftritt.

càrcini , nm: càrcinu, cràcinu, crànciu (cràn-ci-u) Definitzione cropu chi is animales giaent cun is peis de asegus Sinònimos e contràrios calche, càlchida, cumerada Frases unu crànciu de ègua a barras!…◊ su muenti tirat càrcinus ◊ dhu portant una poriga de tzius: est a cràncius che unu mobenti! Ètimu srd. Tradutziones Frantzesu ruade Ingresu kick Ispagnolu patada Italianu càlcio Tedescu Huftritt.

farrancàda, farrancàra , nf: afrancada, farruncada, francada, franchiada Definitzione cropu de farranca; tanti de cosa chi istat in d-una o fintzes duas manos unias; unu tanti pagu precisu / francada de agiudu = betada de manu azuendhe Sinònimos e contràrios apuinada, brancada, frascada, manada / giunta / farranca 2. custa mi paret una francada de macos,sarvamentu! ◊ at ghiradu una bella francada de linna a su fogu ◊ pongat sa pingiada de s'àcua e ghetidinci una farrancada de sali! ◊ totu cudha cosa mi l'aggantzaia a franchiadas ◊ dèu a fusteti custa cosa si dha pagu cun su dinai totu a una farrancara 3. sunt andhados pro li dare una francada de agiudu Ètimu srd. Tradutziones Frantzesu coup de patte, poignée Ingresu blow with a paw, handful Ispagnolu patada, puñado Italianu zampata, manciata Tedescu Tatzenhieb, Handvoll.