Ditzionàriu in línia
de sa limba e de sa cultura sarda

púba , nf: pupa 2, pupia 2 Definitzione figura, comente si podet bíere cun paga lughe o de logu atesu, chi no si cumprendhet bene ite est, prus un'umbra chi no una cosa distinta; fintzes coment'e un'umbra po pecu a is ogos Sinònimos e contràrios aupa, fantàsima, impupa, mummutzoni, pabusina, pantama Maneras de nàrrere csn: esserebbei pro sa pupa = in debbadas, po nudha; pònnere a ccn. a puba = a càstiu, pro dare tocamentu si bidet cosa; a pupa de iscuru = a iscuriu, po comenti si podit biri a s'iscuriu; èssere a pup'a pupa = acanta e fàcia apari; ghetare pupa = portai carena, petza, corpus bistu po sa mannària Frases iat bistu in s'iscuriu duas pubas niedhas trogadas in dus sacus ◊ andhaiat che pupa in notes malas a compudare sa pastura ◊ a s'iscuru at bidu duas pupas ifatu de sos bitellos ◊ soe una pupa de umbras ◊ so biendhe una pupa in daesecus de su muru ◊ morzat chin totu sas pupias malas de sa cunsorza! 2. prima de iscanzare die si est ischituladu e, a pupa de iscuru, est isérghidu a sa festa ◊ coment'e ómine ghetabat pacu pupa, ma cantu fit minore de carena fit mannu de coro Ètimu srd. Tradutziones Frantzesu silhouette Ingresu shape Ispagnolu silueta, perfil Italianu sàgoma Tedescu Profil.

sàgama , nf Definitzione genia de forma po fàere a betu giustu calecuna cosa (de linna sa chi is muradores ponent po fàere guarnissas in is muros) Ètimu itl. Tradutziones Frantzesu modèle Ingresu shape Ispagnolu escantillón Italianu sàgoma Tedescu Form.

úpa , nf: aupa Definitzione genia de umbra, de cosa chi si biet de atesu ma no si cumprendhet bene ite est; fintzes tupa de linna, de matighedhas / esserebbei pro upa (nau de ccn.) = su dhu'èssere po debbadas, no serbire a nudha Sinònimos e contràrios puba / pantama / macra, moa 1, tupa Frases at bidu un'upa fine fine intrendhe in s'istampa de su frísciu ◊ ti fuent fizos tuos, terr'amada, pro chircare sidhados aterue, apozados a upas de tristesa ◊ si bident sas upas niedhas de sos suerzos ◊ sos minadores parent upas, in miniera 2. li pariat chi in custu mundhu isse che fit pro upa e chi no giuaiat a nudha 3. b'at una upa manna de lidone, de arradellu, de iscobalida Ètimu srd. Tradutziones Frantzesu ombre Ingresu shadow Ispagnolu sombra Italianu sàgoma scura, ómbra o figura indistinta Tedescu Schatten.