Legenda Incurtzaduras | Legenda Sìmbulos

cannúga , nf: cannúgia, cannugra, cannuja, chinnucra, chinnugra, conugla, crannuca, crannuga, cranuga, cronnuga, cronuca, crunnuca, crunuca, cunucra Definitzione genia de cannedhu de canna isperrau a manera de dhue pònnere unu chirrione mannu de lana o àteru a filare cun su fusu; canna isperrada in bàtoro, in punta, cun d-unu tapu de ortigu in mesu po mantènnere is corros apertos (ma acapiaos a istrintu de no si che sighire a apèrrere), po bodhire figu, figumorisca o àteru: sa cannuga de làuna est fata a pònnere in punta de una canna / cranuga de còscia = coscizola, guroni de s'ímbena; crannuchedha = tràmula de olia, portzedhu Sinònimos e contràrios prannuga, ruca 3 / bodhidore, pítighe 2, upu Frases e cantu cannugas e tzucas apo pintadu cun cussa lepa!…◊ cun chíndhalu, cannujas e pubadas de lana o linu, sedas e cotones falant filados…◊ sa cannuga e su fusu oi funt foras de usu 2. bodhestus sa mela a cannuga, sa chi fiat prus in artu Terminologia iscientìfica ans Ètimu ltn. conuc(u)la Tradutziones Frantzesu quenouille Ingresu distaff Ispagnolu rueca, rocadero Italianu rócca Tedescu Spinnrocken.

cherriòne , nm: chirrione, chirrioni, chirrone, cirrioni, cirroni, tzirrone Definitzione matzu de pilos, de lana, linu o cosas deasi, pilítzula; nae de sida / cirroni de linu, de cagnu Sinònimos e contràrios cirru, ciufu, cucuredhu, fiochedhu, mumulloni, pubusa, pubusone 1, tipisone Frases cun chíndhalu, cannujas e pubadas de lana o linu, sedas e cotones, fusos, músculas tundhas, chirriones falant filados…◊ cun su pètini de ferru si ndi bogat sa stupa e si aguantat su cirroni de su linu 2. nci donat is ogus in d-unu chirrioni de mata e si sbisogat! Sambenados e Provèrbios smb: Cerronis, Cirroni, Cirronis Ètimu srd. Tradutziones Frantzesu quenouillée, mèche, flocon, boucle Ingresu tuft Ispagnolu mechón Italianu pennécchio, ciòcca, biòccolo, cirro Tedescu Spinnrocken, Flocke.

cherrítzu , nm: chirritzu Definitzione frocu, chirrione o matucone de lana a filare, su tanti chi si ponet in sa cannuga e fintzes chirrione de pilos, is pilos / chirritzilongu = nau de ccn., chi portat is pilos longos meda Sinònimos e contràrios cannugada, cugusta, pubada / cabagliera 2. pro nois sos cherritzos sunt sos pilos ◊ si no faghes a bonu ti tiro sos chirritzos! (Z.Porcu) Ètimu srd. Tradutziones Frantzesu flocon, boucle de cheveux Ingresu tuft Ispagnolu mechón Italianu pennécchio Tedescu Spinnrocken.

incannugài, incannugàre, incannugràre, incannujàre , vrb: incronucare Definitzione pònnere in sa cannuga; arrennèscere a fàere una cosa; rfl. fuire, pentzandhosi cosa de tímere Sinònimos e contràrios incarrebai, intzodhai 2. fiat de diora sentza de fai tzípulas e timiat de no nd'incannugai una 3. candu apu biu ca mi castiàt cun idea mala, dèu, mischinu, mi dh'apu incannugada!…◊ candu at inténdiru aici si dh'at incannugara ca no dhi boremu fai su prexei Ètimu srd. Tradutziones Frantzesu garnir la quenouille Ingresu to put in the distaff Ispagnolu enrocar Italianu inconocchiare Tedescu auf den Spinnrocken wickeln.

pubàda , nf Definitzione chirrione de lana chi si ponet in sa cannuga po dha filare; nuighedha de fumu / falàrendhe sa p. = filare sa lana o su linu de una cannugada, filai sa cannugada Sinònimos e contràrios cannugada, cherrione, cherritzu, cugusta Frases sa betzighedha filaiat pubadas mannas de istupa e lana 2. sa pubada de su fumu chi faghet su pipadore ◊ ndhe lassaiant de pubadas de fumu, sos trenos de unu tempus, candho fint a vapore!… Ètimu ltn. pupa Tradutziones Frantzesu quenouillée Ingresu wool on the distaff Ispagnolu copo, husada Italianu roccata, pennécchio Tedescu Spinnrocken.

«« Torra a chircare