Ditzionàriu in línia
de sa limba e de sa cultura sarda

insàla , nf, nm: insalu, isciala, iscialu, isciaru, issalu, sciala Definitzione festa manna ue si brindhat e faet a papare e a bufare meda; si narat fintzes in su sensu de consumare tropu cosa chentza bisóngiu, a isperdítziu Sinònimos e contràrios iscialada 1, sarau, scialema / istrubberia Frases at batidu sos fiores chin ispaju e chena iscialu pispiados de lentore ◊ sos istranzos sighiant a andhare in iscialos, soguzados dae tiu Zuanne cun cudhu "Bufa!" e "Bufa!" ◊ no ses naschidu pro bívere in iscialos e dormidu! ◊ sa fígia at preténdhiu de fàere sa cójua a isciala manna Ètimu itl. scialo Tradutziones Frantzesu fête, banquet Ingresu rejoicing, banquet Ispagnolu convite, festín Italianu tripùdio, convito Tedescu Jübeln, Gastmahl.

iscialài, iscialàre , vrb: issalare, scialai Definitzione fàere festa manna cun papóngiu, bufóngiu, ispesa e àteru, a meda / i. su tempus = ispassaresila Sinònimos e contràrios diveltire, spadatzai / ispeldisciare, istravuciare, sparafiai Frases medas iscialant in sa pedhe anzena ◊ tanti sorresta tua no si est iscialada ballandho!… 2. tui ti divertis iscialendu Ètimu itl. scialare Tradutziones Frantzesu banqueter Ingresu to banquet Ispagnolu banquetear Italianu banchettare Tedescu an einem Bankett teilnehmen.

pichetàda , nf Definitzione su pichetai, papada chi si faet mescamente in cumpangia Sinònimos e contràrios abbicónia, ciampanella, ispuntinu, murrecada, pichetu 2, pranzete, rebbota, sciaballabata Frases cussu est prexau candu est in logu de pichetadas ◊ fiat fadendu sa pichetada cun d-una cedha manna de invitaus ◊ feus una pichetada de pisci Ètimu srd. Tradutziones Frantzesu banquet Ingresu banquet, snack Ispagnolu banquete Italianu spuntino, banchétto Tedescu Festessen.

pichetài, pichetàri , vrb Definitzione fàere sa pichetada, prus che àteru papare a meda, genia de festa, in cumpangia Sinònimos e contràrios arrebbotare, sbirrendai, sciaballabatai Frases tristu chi no podit pichetai, càstiat su pratu e lingit sa frochita ◊ andai a pichetai cun is amigus fut sinnu de libbertadi po is giòvunus Ètimu spn. picotear Tradutziones Frantzesu banqueter Ingresu to banquet Ispagnolu banquetear Italianu banchettare Tedescu an einem Bankett teilnehmen, schmausen.

rebbòta , nf, nm: arrebbota, rimbota Definitzione papada manna, de cosa meda Sinònimos e contràrios abbicónia, birrandada, ciampanella, ispuntinu, pichetada, pranzete / ttrs. ribbota Frases ammentat curreras, catziadas, rebbotas de tusorzos ◊ balente no est chie si leat imbreacheras a sichitura, ma chie annat a una rebbota e biet solu duas tassas de vinu ◊ su mere at créfiu fàere custu rebbotu in domo sua Ètimu itl. ribotta Tradutziones Frantzesu banquet, bombance Ingresu banquet, binge, guzzling Ispagnolu comilona Italianu banchétto, bisbòccia, gozzovìglia Tedescu Schwelgerei.

rebbotàre , vrb: arrebbotare Definitzione fàere rebbotas, prus che àteru papare a meda, genia de festa, in cumpangia Sinònimos e contràrios ispuntinare, pichetai Ètimu itl. ribottare Tradutziones Frantzesu gueuletonner Ingresu to banquet, to binge Ispagnolu banquetear Italianu banchettare, bisbocciare Tedescu schwelgen.

spadàgiu , nm: spadatzu, sparàgiu Definitzione festa manna in famíglia, su papare de is isposòngios Sinònimos e contràrios insala, spadalia Frases in su spadàgiu m'iat bófiu a costau casi in contu de babbu ◊ s'intendit peri is bias sa batalla, s'arrisu, s'ispàssiu de chini depit andai a is spadatzus (F.Onnis)◊ si est cojada filla mia e fatu eus su sparàgiu in Nuràminis ◊ si cojaus impressi mancai chena sparàgiu Ètimu ctl., spn. hospedatge, hospedaje Tradutziones Frantzesu banquet nuptial Ingresu wedding banquet Ispagnolu banquete nupcial Italianu banchétto nuziale Tedescu Hochzeitsbankett.

spadalía , nf Definitzione festa (de papare) Sinònimos e contràrios insala, pichetada, sciaballabata, spadàgiu Frases una borta unu rei iat donau incàrrigu a unu de is bastantis suus de cumbidai a una spadalia nodia is sàbius de su logu ◊ festa manna de spadalia, ajó totus a bufai! Tradutziones Frantzesu banquet Ingresu banquet Ispagnolu banquete Italianu banchétto Tedescu Bankett.

spadatzài , vrb Definitzione fàere spadatzus, isciala, fàere festa manna cun papares e bufóngiu a meda, mescamente comente si faet po un'isposóngiu Sinònimos e contràrios iscialai Frases s'arangiolu tessit sa tela e est prontu a spadatzai Ètimu srd. Tradutziones Frantzesu banqueter Ingresu to banquet Ispagnolu banquetear Italianu banchettare Tedescu bankettieren.