Ditzionàriu in línia
de sa limba e de sa cultura sarda

craròre , nm Definitzione su èssere craru, su dhue àere o fàere lughe meda Sinònimos e contràrios giaresa | ctr. iscuricore Frases su crarore de sa luna ◊ dazemila un'arbéschia de crarore, unu gupu de sole de mesudie chi mi torret su póchiu de sa bida! (G.Piga) Tradutziones Frantzesu clarté, lueur Ingresu glimmer Ispagnolu claridad Italianu chiaróre Tedescu Schein.

giaría , nf Definitzione su èssere craru, su dhue àere o fàere lughe meda, nau fintzes de su lúghere de unu logu, de una faina Sinònimos e contràrios giaresa, giarura, lucura | ctr. iscuricore Frases serra e piana ti dant tribbulia, a suore t'ispremit sa matzola, ma sa butega est tota una giaria (P.Casu)◊ sa giaria de su sole e de sas istellas ◊ s'idiat a levante una lugura fatu fatu andhendhe in aumentu in mannesa, in giaria e in bellura (P.Sulis) Tradutziones Frantzesu lueur, luminosité Ingresu brilliancy Ispagnolu claridad, luminosidad Italianu chiaróre, luminosità Tedescu Helligkeit, Klarheit.

grína, grínas , nf Definitzione su lugore chi si biet in is àrias, in su fundhale, candho est abbreschendho Sinònimos e contràrios grindha, nea, riga Maneras de nàrrere csn: pònnere grina, grinas = obrèsciri; mala grina = colore de chie est in cara mala; grina vona = cara bona, in colore, chi istat bene; giambare grina = cambiai bisura Frases connòschere ti cheria dae candho grina as postu in s'orizonte ◊ ealla sa grina imprelleada de lentore a prima lughe! ◊ est isetendhe sa grina de unu die prommissu e sonniadu ◊ candho ti pesas, grina, cun su sole chi potat ispannare custos oxos de fumu, de chixina? 2. cunzat torra sos ojos, perdet grina e si faghet a cara de chixina (P.Casu)◊ de grina det giambare dogni cosa, det alvèschere in coro s'isperàntzia ◊ unu mucatore niedhu l'imbólicat sa cara in grina de chera santa Sambenados e Provèrbios smb: Grina Terminologia iscientìfica sdi Ètimu srd. Tradutziones Frantzesu la clarté de l'aube Ingresu the first light of dawn Ispagnolu aurora Italianu chiaróre dell'alba Tedescu Morgendämmerung.

lucòre , nm: lugoi, lugore, lugori, luxori Definitzione lughe prus che àteru paga, bàscia, débbile, mescamente de sa Luna o de is istedhos, fintzes de su Sole apustis intrau, iscurigandho; in cobertantza, fintzes miglioria, su àere benes, interessu, in cantu est cosa chi si biet, chi lughet / betare, ghetare l. Sinònimos e contràrios giaria, luchidore, lughia / abantzamentu, richesa | ctr. iscuricore, iscuru / poberesa Frases sos seros si faghiant fainas a lugore de fogu ◊ seus pischendi mumungioni a lugori! ◊ a lucore de Luna che apo bidu tres pubas ◊ intro meu che zuto su lugore de mizas de istedhos de s'aera ◊ pro piedade, fàghemi lugore in cust'adhe! ◊ custu est lugori de sa Luna ◊ in d-una noti de lugori mannu iat portau su tallu a monti ◊ s'oro betat lucores de… oro! 2. catzat sàmbene su póveru e suore, e su ricu nachi est sou su lugore! Ètimu ltn. lucore(m) Tradutziones Frantzesu lueur, clarté Ingresu glimmer Ispagnolu claridad Italianu chiaróre, splendóre Tedescu Schimmer.