Ditzionàriu in línia
de sa limba e de sa cultura sarda

calafóju , nm: calavoju, colovoju, corovoju, corovozu, gorovoju Definition fossu mannu coment'e gruta, úrbidu malu; logu de tupas, de malesa craca Synonyms e antonyms calafossu, colovone, ingurtidorju, iscafada, iscaravossu Sentences si sunt isperrumados in sos calafojos (T.Rubattu)◊ apo trouladu in d-unu palinzu e rutu che so in d-unu corovozu chi aiat fatu s'abba (N.Motzo) 3. sas tantas cosas bellas chi mi nesint in s'onore mi ant fatu colovoju! Scientific Terminology slg Etymon srd. Translations French ravin, gouffre English gorge Spanish barranco Italian burróne, inghiottitóio German Schlucht.

calancòne , nf: coloncone Definition calanca manna, ma mescamente buidu mannu in logu de orrocas Synonyms e antonyms gruta, ispérruma, pèlcia, péntuma, scabiossu, strampafossu Sentences at cuau sa ciai in su calancone ◊ unu coloncone in su muru fachiat de armarju 2. Deus, chi salvat sos bonos ladrones, lassat perder sos Giudas ostinados, ch'etat sos tzegos in sos calancones (P.Casu)◊ crabitos e anzones che ruent in su calancone Translations French gouffre, antre English chasm Spanish vorágine, abismo Italian voràgine, antro German Abgrund.

garrópu , nm, agt: carropu*, goropu, gorropu, irgorropu, sgarropu Definition buidu mannu, mescamente inue dhue at orrocas, inue che intrat o ndh’essit s'abba, aperta manna o fintzes una genia de canale fungudu meda cun orrocas artas, fossu mannu prenu de abba in is errios; mulinete de bentu o de abba, abba apaulada e fossu fungudu; nau de gente, chi giughet is palas ingobbedhadas Synonyms e antonyms barrocu, isciusciu, ispéntimu, scabiossu, spérruma, trabentu, tuvone / bàtiga, fògia 1, gurgu 1, pógiu, trógliu / abbajonadu, aggobbedhau, giumburudu, rumbosu, tzumbosu Idioms csn: bènnere gorropu = essiri su tzúmburu, sa gobba (a unu); bufai a garropu = totu a unu corpu?, a bruncu?; paligorropu, paligorropa = palidortu, palidorta, dortu, dorta a palas Sentences su gorropu est totu istampos, galarias, ischinas intorticaas, locu iscussertu e male traganau ◊ istichiu interi montes, gorropu misteriosu, privau de orizontes, locu secretu e malu a l'acatare ◊ in custu logu su frúmmini est fundudu, nci at unu garropedhu ◊ camminàt a tzopu poita ndi fut arrutu de asuba de unu garropu 2. su tempus, is dis nci dhas ghetat a sa sighia a su garropu de sa memória 3. a betzu tue benis gorropu Translations French ravin, gouffre, crevasse English gorge, cleft whirlpool Spanish quebradura Italian fórra, górgo, crepàccio German Klamm, Strudel, Wirbel, Riß.

ingorropàre , vrb Definition betare in calecunu gorropu Synonyms e antonyms impelciare, incalancare, ingarghilare Etymon srd. Translations French jeter dans un gouffre English to sinkhole Spanish echar en un barranco Italian infoibare German in eine Doline werfen.

ingurtidórgiu , nm: ingurtidorju, ingurtidroxu, ungutidroxu, ingurtitorju Definition sa canna de su gúturu inue passat su chi si papat o bufat de buca a s'istògomo; gruta manna, buidu mannu chi che calat a fundhu in is orrocas Synonyms e antonyms aghentolu, bilguzu, gaigastolu, gorguzu, ingollidosu, ingrastolu, ingullidorzu, ugrullu, valgastolu / alguena, garguena / gorovoju, imberghidorju, impercadorzu Scientific Terminology crn, slg Etymon srd. Translations French œsophage, gouffre English esophagus, pothole Spanish esófago, donde afluyen las aguas Italian esòfago, inghiottitóio German Speiseröhre, Schlund.

irjacàda , nf Definition genia de buidu mannu in s'orroca Synonyms e antonyms calancone, ispéntimu Sentences in su paris ube fit istada cumposta sa piatza aiat acatau un'irjacada manna a ghetu de ch'intrare s'ómine Etymon srd. Translations French gouffre English abyss Spanish abismo, sima Italian voràgine German Abgrund.

ispéntimu, ispéntuma , nm, nf: ispéntumu, spéntima Definition prus che àteru, logu de orroca arta meda o fintzes buidu chi calat a fundhu, aintru de is orrocas, in sa terra Synonyms e antonyms calancone, gruta, gúrguru, iscafada, isperdicadorju, ispérrulu, ispérruma, istrunfu, péntuma, scabiossu, strampafossu, tràdhia, trocu, úbridu Sentences sa terra si li fit abberta innantis lassèndhelu in s'oru de un'ispéntumu ◊ fipo supra de un'ispéntumu artu annotendhe sa cane ◊ ne murus, tzirvas e ispéntimus ti firmint! ◊ nche los ant impercaos a s'ispéntuma Scientific Terminology slg Etymon srd. Translations French gouffre, précipice English crag, ravine, gulf Spanish abismo, barranco Italian voràgine, burróne, precipìzio German Abgrund.

isprefúndhu , nm: isprofundhu, sparavundhu Definition logu pentzau in fundhu meda, prus che àteru coment'e iferru, logu de ànimas malas; buidu mannu, fundhudu / sa missa de s'isprofundhu = sa missa chi narant a unu mortu chi a cantu paret no tiat àere tentu ancora pasu in s'àteru mundhu e tiat èssere in ziru che ànima mala… Synonyms e antonyms iferru, ispéntumu, paravundu Sentences che ndhe lampas medas in s'isprefundhu, tue! ◊ dai sos ojos mi fuit sa lughe e paret ch'isprofundha in s'isprefundhu (S.Casu)◊ sos montes si ant a isòlvere che sale in s'isprefundhu ◊ so pedindhe a Deus chi no mi che mandhet a s'isprofundhu 2. àteru bi as de bogare a pizu dai s'isprofundhu de sa faltzidade?! Etymon srd. Translations French gouffre, abîme English abyss Spanish abismo Italian bàratro, abisso German Abgrund.