Legenda Incurtzaduras | Legenda Sìmbulos

abbelàda , nf Definitzione su si abbelare Sinònimos e contràrios abbaradhada, abbeliada, indiosada Ètimu srd. Tradutziones Frantzesu ivresse, entichement, tocade Ingresu infatuation Ispagnolu enamoramiento, capricho Italianu invaghiménto Tedescu Sichverlieben.

acúcu , nm Sinònimos e contràrios acucada, bidhídhiri, meleda, muschinada Ètimu srd. Tradutziones Frantzesu fantaisie Ingresu whim Ispagnolu capricho, antojo Italianu ghiribizzo Tedescu Schrulle.

bischílliu , nm Sinònimos e contràrios arrennegu, tzacu Frases su cuadhu at cumentzau a pigai bischílliu e a su meri ndi dh’at isciusciau a terra! Ètimu itl.p bischiss Tradutziones Frantzesu caprice Ingresu caprice Ispagnolu capricho Italianu bizza Tedescu Grille, Laune.

bítzu 1 , nm Definitzione genia de vítziu, prus che àteru a imbérriu / betaresila in b. = pàrrere male, pigare calecuna cosa o fatu coment'e ofesa Sinònimos e contràrios imbérriu Tradutziones Frantzesu caprice Ingresu bad habit Ispagnolu capricho Italianu brutto vézzo, caprìccio Tedescu schlechte Gewohnheit, Trotz.

cadhína , nf Definitzione idea maca, musca Sinònimos e contràrios bidhídhiri, erredha, fumacera, iscrapitzada, zibbírriu Frases a cussu li cheret catzada sa cadhina! Tradutziones Frantzesu caprice, fantaisie Ingresu whim Ispagnolu capricho Italianu caprìccio Tedescu Laune.

cascabédhu, cascabéllu , nm: cascavèglia, cascavégliu, cascavellu Definitzione idea badhinosa, pistighíngiu, pentzamentu malu; nau de unu, chi dh'ant orróschiu o chi at orróschiu; a logos, genia de sonàgia pitichedhedha / ghetare cascavégliu a unu = ficare ódiu, tírria, menospretziai Sinònimos e contràrios bidhídhiri, bigirria, erredha, férnia, fumacera, irriolu, iscrapitzada, meleda, zibbírriu / ischiglitu Maneras de nàrrere csn: bogai (o bogaisindi) is cascavellus de conca = fàghere lassare (o lassare) sas ideas macas, sos machines; lassai su cascavellu, o is cascavellus; ghetai cascavellu a ccn. = leare a regelu Frases e no nci dh'essit su cascavégliu de conca! ◊ podides irmazinare su cascavellu chi mi at postu candho mi at allegadu de "sos àteros astros"! (A.Deplano)◊ issu at ghetau cascavellu a is barracellus e a is canis ◊ bogai su mediori e is cascavèglias! Ètimu ctl. cascavell Tradutziones Frantzesu fantaisie, idée fixe Ingresu fancy, oddness Ispagnolu capricho, antojo Italianu caprìccio, bizzarrìa, idèa fissa Tedescu Laune, fixe Idee.

crécu 1 , nm Definitzione una genia de vitziedhu, idea o pretesa de chie no ischit mancu issu ite bolet Sinònimos e contràrios arraghèscia, mendhea, pecu Frases chi si cojat, as a bí ca is crecus dhi passant! ◊ gei est unu bellu giòvunu, ma sa bellesa si guastat e is crecus essint a pillu! Tradutziones Frantzesu lubie Ingresu caprice Ispagnolu capricho Italianu fìsima Tedescu Marotte.

ingúlimu , nm: ingúlumu Definitzione abbitúdine o ingustu a cosas bonas o comodidades cunsideradas coment'e tropu, pagu necessàrias, de pagu importu; manera de fàere de chie bolet solu cosas bonas; fintzes bentranu, chi bolet tropu / zúghere ingúlumos; ingúlumu de bisionare = ?; fàghere una cosa a s'i. = a s'ingustu (nadu cun afuta própiu ca no si tenet s'abbitúdine de carchi cosa) Sinònimos e contràrios físsiu / bentrania, inguglionia, ingurtionia Frases su dinari est s'ingúlimu de totu: onzi cosa si manizat a fúria de dinari! ◊ assiat ingúlumos chi ti ant postu!…◊ sa fortza de s'ingúlumu est meda Ètimu srd. Tradutziones Frantzesu mauvaise habitude, caprice Ingresu bad habit, fancy Ispagnolu mala costumbre, capricho Italianu cattiva abitùdine, caprìccio Tedescu üble Gewohnheiten, Laune.

mendhèa, mendhèca , nf: mennea, mennega Definitzione calecuna cosa de male, chi no andhat bene, o fintzes chi no praghet, coment'e abbitúdine esagerada chi giaet importu a cosighedhas de perunu contu, vitziedhu / èssere unu mendheca = àere o zúghere mendheas a meda Sinònimos e contràrios abbenzu, abbétia, arraghèscia, atema, crecu 1, defeta, insemia, inzenzu, iscóticu, peca 1, piginu Frases a ndhe li agatades, totu, de mendheas a custa cosa: a pàrrere meu no tenet nudha e mendheosos sezis bois! ◊ no si bidet, ma sa mennega la giughet!◊ donzunu tenet sas mendheas suas! Sambenados e Provèrbios smb: Menneas Ètimu srd. Tradutziones Frantzesu défaut, caprice, lubie Ingresu defect, whim, caprice Ispagnolu defecto, capricho Italianu difètto, caprìccio, fìsima Tedescu Fehler, Marotte.

muschinàda , nf Definitzione genia de idea istrambeca, de disígiu, de aconcada chentza istare pentzandhodhoe meda meda Sinònimos e contràrios acucu, bibbirriu, bidhídhiri, bremmigorru, crichivellu, meleda, treca, tzelevriada, zibbírriu Frases li est vénnida sa muschinada de si che andhare ◊ li est vénnida sa muschinada de si cojuare (G.Ruju) Tradutziones Frantzesu fantaisie, lubie Ingresu freak Ispagnolu capricho, antojo Italianu ghiribizzo Tedescu Grille, Schrulle.

zibbírriu , nm Definitzione genia de idea maca, de disígiu, de gana pagu de giudu Sinònimos e contràrios bríbbidhi, bidhídhiri, birbillitzu, cadhina, erredha, foliatza, tzelevriada Frases irgusoladu fatu dai cudhos, est custrintu a pònnere mente a sos zibbírrios issoro Tradutziones Frantzesu caprice Ingresu caprice Ispagnolu antojo, capricho Italianu ruzzo, caprìccio Tedescu Laune.

«« Torra a chircare