Ditzionàriu in línia
de sa limba e de sa cultura sarda

bòcia 1 , nf Definition genia de fatura de unos cantu bestimentos de fémina, coment'e ufradas, a bòcia Etymon ctl. botxa Translations French bouillon English puff Spanish bullón Italian sbòffo German Puff.

búfida , nf, nm: búfita, búfiu Definition súlidu chi si bogat de buca unu pagu a moida, comente si faet sentindho ifadu Synonyms e antonyms assúpidu, bufada 1, irbúfida, súrbidu 1, súrfiu Sentences comente si est bidu iscapu, su sirbonedhu at iscutu búfidas de cuntentesa ◊ s'intenniat sa sughe a búfitas allatanne ◊ comenti mi apubànt, is procus betànt cos’e búfius e si nci fuiant Etymon srd. Translations French soupir d'ennui, d'impatience, mouvement d'ennui, d'impatience English snort, puff Spanish resoplido Italian sbuffata, sbuffo German Schnauben.

fumàda , nf Definition su fumare, su fàere fumu Synonyms e antonyms afumiada, fumiada Idioms csn: dare sa f. = fàghere unu sinnale cun su fumu; leare prestu sa f. = primmaisí luegus; èssere una f. = una furriada de ogus, un'iscutighedha 2. una fumada ebbia est custa vida! Etymon srd. Translations French fumée English puff of smoke Spanish humareada Italian fumata German Rauchen.

isúfiu , nm: isúnfiu Definition ària o alenu chi si bogat, nau mescamente de animales e fintzes in su sensu de fortza / leare a ccn. a isúfios = chentza crabbu Synonyms e antonyms ispaporada, isúlfida, súfiu 1, súlidu, tzúfiu / àlchida, impita Sentences aiat bidu su trenu a isúnfios, trazendhe una laghiza de vogones ◊ cussa batu mi est essida a isúfios ◊ a issa bi pranghet su coro bidindhe cudhu chena isúfiu perunu, lanzu che corru e cun sa cara groga 2. no tengu isúfiu, a fai cosa meda ◊ si est falendhe, est a punt'a mòrrere, ma de isúfiu ndhe zughet ancora! ◊ fit un'ominedhu de pagu isúfiu Translations French souffle, force English puff, strenght Spanish resoplido, fuerza Italian sbuffo, fòrza German Schauben, Kraft.

isufulàre , vrb: isulfulare Definition èssere o istare a isúlfidas, a súlidas, a búfidos Synonyms e antonyms irbufidare, isufiare Sentences su trau comintzat a irrúilos, a marrare in terra, isufulendhe cun sas tivas de su nare Etymon srd. Translations French souffler, haleter English to puff Spanish resoplar Italian sbuffare German schnauben.

rúschida , nf, nm: rúschidu, rúscida, rúscidu Definition su sonu a sorrogu chi faet cun s'ogroena, cun sa buca e su nasu unu dormiu chi arrespirat male; assúpidu de isalenadas mannas / rúscidu de refreu = sarragadura Synonyms e antonyms corróschiu, forróschiu, sarragu, sorroscru / irbúfida, isúlfida Sentences isse lasseit sos amigos a rúschida e che esseit a pònnere mente a su trabàgliu ◊ s'intendhiant sas rúschidas de cudhos duos drommidos ◊ fit drommida a rúschida 2. su pudhedru est cadredhendhe a brincos e a rúschidos ◊ a rúscidas sos pudhedros brincant dae mata in mata (B.Truddaju) Etymon srd. Translations French ronflement, ébrouement English snore, puff Spanish ronquido, el bufar del caballo Italian russaménto, sbuffo del cavallo German Schnarchen, Schnauben.

rusciàre , vrb Synonyms e antonyms roschidare, surbuschiare Sentences su cadhu si est pesadu a crabitinos ruscendhe che dimóniu Translations French haleter, s'ébrouer, souffler English to puff Spanish bufar Italian sbuffare German Schnauben.

sulàda , nf Definition su sulare; fintzes genia de súrbiu chi faent unos cantu animales coment'e arrennegaos o timendho Synonyms e antonyms isufulada, sulvilada Sentences sa pampa a dógnia sulada de bentu tzacat e cincidhat ◊ a s'anzone mortu li at dadu duas o tres suladas pro l'iscolzare menzus 2. in sos beranos, candho bigiaiant sas bachitas, sas bórridas poniant sa paura a colpos de ramuzu e a suladas Etymon srd. Translations French souffle, ébrouement English puff, snort Spanish soplo, bufido Italian sóffio, sbuffata German Blasen, Schnauben.

sulvàre , vrb: surbare, surbiai, surbiare, survare, surviare Definition bogare súlidu, fintzes súrbiu; arrespòndhere a súlidas, a ufas, cun ifadu; fintzes nàrrere cosa a ccn., unu pagu coment'e cossigiandho, osservandho, abbetiandho Synonyms e antonyms suai / ammuinai 1, fruscidare, frusiai, frusitai, moidare, múere, sulietai, surbiai, zumiai Sentences sos minores s'incrunant, ufrant sos cavanedhos e surbant supra de sa bràsia ◊ candho uchidiant su mannale a sos pitzinnos lis davant s'ambesuca a la survare ◊ su focu est tenendhe ca su ajaju cada tantu l'est surbandhe ◊ si survavat sos pódhiches cancaratos dae su fritu 2. "Priucosos irrichitos!" - mi aiat survatu in s'oricra mutzere mea ◊ "No est neche nostra si su binu fit tropu forte!" surbant sos cumpanzos Etymon ltn. *subilare Translations French souffler English to puff Spanish soplar Italian soffiare German blasen.