Legenda Incurtzaduras | Legenda Sìmbulos

diveltèra , nf: divertera Sinònimos e contràrios arrecreu, desogu, dirvagu, diveltimentu, irbelegu Frases istaiant ciasconendhe de s'unu e de s'àteru e de sas diverteras de carrasegare ◊ pro su tusorzu si fateit una grandhe divertera ◊ sa diveltera fit manna meda e nos naraiant "pitzinnos puzones" Ètimu srd. Tradutziones Frantzesu amusement Ingresu fun Ispagnolu entretenimiento Italianu divertiménto Tedescu Vergnügen, Spaß.

diveltiméntu , nm: divertimentu Definitzione totu su chi si faet passandho ora cun alligria, chentza pentzamentos foras de trebballu Sinònimos e contràrios arrecreu, desogu, dirvagu, diveltera, giogu, irbelegu, ispàssiu, ispidientu | ctr. pelea, ifadu, traballu Frases chi siant a contu de centus custus divertimentus! Tradutziones Frantzesu amusement Ingresu amusement Ispagnolu entretenimiento Italianu divertiménto Tedescu Vergnügen, Spaß.

irbelégu, irbeléu , nm: irvelegu, isbeleu, ispeléigu, isperegu Definitzione cosa chi si faet po passare ora, po gustu, a giogu; nau in cobertantza, infestu, cosa matanosa, trebballosa Sinònimos e contràrios arrecreu, desogu, dirvagu, diveltimentu, giogu, ispàssiu, ispidientu / ifestu, inaventu | ctr. impelegu Frases sa catza est irvelegu? ◊ sa beste sua a sorte amus tiradu pro irvelegu ◊ s'ortu, su ribu fint s'irbelegu de sos pitzinnos ◊ sias ghia e irvelegu a s'irventuradu! (G.Ruju)◊ sos irvelegos nostros: cantare, sonare ◊ s'ispelegu allegrat sa tristura ◊ inie bi teniat amigos e ispeléigos ◊ sunt addurados in mare una chida godíndhesi s'ispeléigu che duos isposos 2. bellu ispelegu tenet, mih, a ndhe collire s'olia a una a una dae mesu de s'erba!…◊ si lu leat s'ispelegu a istudiare totu cussu muntone de líbberos!… Ètimu srd. Tradutziones Frantzesu passe-temps, distraction, amusement Ingresu pastime, entertainment Ispagnolu pasatiempo Italianu passatèmpo, sollazzo, svago Tedescu Zeitvertreib, Vergnügen, Zerstreuung.

piachère , nm: piaghere, piagheri, plagere, plaxeri, plexeri, pragere, pragheri, prasere, praxere, praxei, praxeri, pregheri, prexei, prexere, prexeri Definitzione genia de cuntentesa chi si provat po calecuna cosa chi andhat in bonu, su pràghere, su gustu chi si pigat tastandho o faendho calecuna cosa; css. cosa de si ndhe alligrare, chi giaet cuntentu o chi si faet po giare cuntentu, po currespòndhere a su disígiu o a sa volontade de unu Sinònimos e contràrios aggradu, gosa, gustu, praximentu, zéniu / pavore | ctr. dispiachere Maneras de nàrrere csn: tènnere piaghere de una cosa = aggradèssiri una cosa; a piaghere de unu = acomenti iat a bòlliri ccn.; fàghere una cosa de piaghere meu, tou, sou e gai = ca dh'apu bófia geo, tue, issu, chentza chi dh'apat cumandhada àtere; pro piaghere = po fai prexeri, po cumpraxi; fàghere piaghere = pràxiri; fàghere unu piaghere = fai ccn. cosa po acuntentai a unu; a su piaghere tou siat! = zenia de augúriu; manigare, ríere a piaghere = itl. "di gusto", de ndi abarrai própiu cuntentus Frases apo arretziu su regalu cun pragere ◊ bieus cun pregheri chi is matas funt ponendi linna noa ◊ immoi mi fais su santu prageri e dha iscàbulas! ◊ chi est a prasere tua, sa cózua si faet ◊ no andho mancu po prexere! 2. bennie annongi po plagere! ◊ ma faghe su piaghere e fróbbidi su lorodhu! ◊ Giuanni Batista no si est incantau ni a is onoris ni a is prexeris ◊ si fit istadu a piaghere meu aia distrutu sas armas de fogu ◊ nos amus fatu una manigada de frenugu própiu a piaghere!◊ a mi lu faghides unu piaghere? ◊ me in bidha mia nisciunus prus mi fait custu prexei Sambenados e Provèrbios prb: a mali mi benit e prexeri ndi agatu Tradutziones Frantzesu plaisir, faveur Ingresu delight, favour Ispagnolu placer, favor Italianu piacére, favóre Tedescu Freude, Vergnügen, Gefallen.

recréu , nm: arrecreu, ricreu Definitzione cosa chi giaet consolu, praghet, chi faet godire, istare cuntentos Sinònimos e contràrios desogu, godimentu, gosa, ispàssiu | ctr. patimentu, patiscione Frases o Deus meu, cuntzédimi un'istante de recreu! ◊ s'abe agatat recreu in sos fiores ◊ ti ndhe ses riendhe: paret chi ndhe apas recreu! ◊ in tanta paghe sa mente assereno e mi est durche recreu sonniare ◊ cussu locu fit su recreu de sos minores ◊ issos in custu tribàgliu bi agatant recreu ca est a sa idea issoro Ètimu spn. Tradutziones Frantzesu plaisir, délassement Ingresu delight, recreation Ispagnolu recreo Italianu dilètto, piacére, ricreazióne Tedescu Vergnügen.

«« Torra a chircare