A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Abbreviations Legenda | Symbols Legend

cantepennò, cantepennòno , avb Definition si no àteru, a su nessi Synonyms e antonyms assumancu, nensi Sentences baebbei tue a fàghere cussu, o cantepennono ispiegabbilu comente depet fàghere! ◊ faghe a manigare, o cantepennono ammanitza sa cosa, za bi pesso deo! ◊ làssami pasare, o cantepennono torrare àlidu! ◊ si faghet totu, o cantepennò si comintzat ◊ cheriat a los lassare líbberos de si che torrare a domo, o cantepennò a los pagare! Etymon srd. Translations French au moins English at least Spanish al menos, por lo menos Italian alméno, quantoméno German wenigstens.

canterànu cantarànu

cantérgiu cantèlza

cantéria , nf Synonyms e antonyms marmutu, mummúchiu Etymon srd.

canteríle cantalíre

cantèrja cantèlza

canterjàle cantargiàre

cantérju, cantèrza cantèlza

canterzàda , nf Definition cropu giau a su canterzu, a trempas Synonyms e antonyms iscantargiara Etymon srd.

canterzàle , nm Definition una parte de su frenu chi si ponet a s'animale, intrau in conca e in murros, cussa chi calat in su canterzu o trempa Synonyms e antonyms cavanale Etymon srd. Translations French montants de bride English bit-strap Spanish quijera Italian sguància della brìglia German Backenstück.

cantérzu cantèlza

canterzúdu , agt Definition chi portat trempas mannas, canterzos mannos Synonyms e antonyms trempudu Etymon srd.

cantiapàri cantepàre

cantichinòno , avb Synonyms e antonyms assinuncas, candeghinò, chiscussu, deghinò, diacussu, sinono Sentences chi su pitzochedhu arrespundiat "Perdonu!" che dhu faiaus calare abbellu, cantichinono pighiat iscartinada mala! ◊ candho faiant su pane, s'isposa non dhu podiat tocare, cantichinono dhi podiant naschire fígios lorodhosos Etymon srd.

cànticu , nm: càntigu Definition su cantare, su istare cantandho / genias de càntigu: a poesia, a chiterra, a tenore; c. de possè = gara poética Synonyms e antonyms càntida Sentences su cànticu de sa tonca, su murmutu lépiu de sos padentes ammudaos li poniant in s'ànima unu sensu de tristura ◊ l'intendho totaganta die a càntigu ◊ su càntigu sou za est bellu, ca tenet boghe bella ◊ su Cànticu de sos cànticos est de Salomone Translations French chant English singing Spanish canto Italian canto German Gesang.

càntida , nf, nm: càntidu, cantu 5 Definition su cantare, su istare cantandho Synonyms e antonyms cantaxu, cànticu, cantonzu Sentences deveras, su càntidu no mi donat errichesa e ne onori de gherreri ◊ at ancora in orijas sos càntidos issoro Etymon srd. Translations French chant English singing Spanish canto Italian canto German Gesang.

cantidàde, cantidàdi , nf Definition su tanti de una cosa / in cantidade = in cantis, a meda Synonyms e antonyms tantu Sentences sa cantidade de s'olia fit meda, ma sa calidade fit metzana ◊ umiliaus e afligius bàsciu sa cantidadi de is pecaus nostus si presentaus a bosu cun grandu pentimentu ◊ oe si papat prus in cantidade, peroe gei est s'istògomo guastu! Etymon spn. cantidad Translations French quantité English quantity Spanish cantidad Italian quantità German Anzahl.

càntidu càntida

cantiéri , nm Definition logu inue dhue at gente trebballandho, is trebballadores etotu, su trebballu matessi pigau coment'e manera de dhu fàere, prus che àteru fatu no a impresa privada ma in economia a cumandhu de una Comuna o àteru ente púbbricu Sentences cussu triballu l'ant fatu a cantieri ◊ cun cussos cantieris no ndhe atúliant de triballu: sunt cosas pro ammandronare sa zente! Translations French chantier English yard Spanish obras Italian cantière German Baustelle.

cantighédhu , nm: cantzichedhu Definition min. de càntigu e de cantu 1 (orrugu, bículu) Synonyms e antonyms arroghedhu, cantedhu 2. mi apo segadu unu cantighedhu de casu tantu de l'assazare.