A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Abbreviations Legenda | Symbols Legend

interrigonàre interighinàre

interrogài, interrogàre , vrb: intorrogare Definition pregontare, fàere dimandhas po bòllere ischire, po averguare, nau pruschetotu de chie dhu faet cun autoridade (giustítzia, maistos) Synonyms e antonyms porrogare, precontare Sentences professore e assistentes sunt a betiapare intorrogandhe sos candhidaos Etymon itl. interrogare.

interrogassiòni , nf: interrogatzione, interrogatzioni Definition su interrogare, su fàere pregontas pruschetotu nau de su chi si dimandhat in iscola a is istudentes po averguare si connoschent un'argumentu, o a chie guvernat po ischire comente est una chistione chi pertocat s'amministratzione, si torrat cun sa beridade ccn. cosa ischípia de àtera manera.

interrogatívu , agt Definition chi serbit po dimandhare, faendho dimandhas, pregontas, nau mescamente de una genia de puntu /?/ chi si ponet a singiale iscriendho fràsias chi ammostant unu bisóngiu de ischire (cosa chi foedhandho si faet a cumprèndhere faendho sa boghe a bessu o intonu de pedidura).

interrogatóriu , nm Definition su interrogare, su fàere pregontas, is pregontas etotu candho funt medas Synonyms e antonyms perrogu.

interrogatziòne, interrogatziòni interrogassiòni

interrógu , nm: intorrogu Definition su interrogare, su fàere pregontas, is pregontas etotu candho ndhe faent medas e benint iscritas cun is arrespostas de s'acusau; fintzes dimandha, documentu, paperi iscritu a un'amministratzione po ccn. bisóngiu Synonyms e antonyms perrogu / dimandha Sentences s'intorrogu replicadu subra de un'idénticu argumentu bene faghiat su riferimentu a Pedru ch'iat a Cristos rinnegadu (A.Loy)◊ a cantu dimandhadu in s'intorrogu dimustras de passare in logu anzenu ◊ sos cussizeris ant presentadu interrogos, motziones e pedidu de faedhare ◊ altru creu chi non ci siat: s’interrogu dh’apu fatu interu! (Bitiredha Melis) 2. ia a bolli isciri ita at iscritu cussu cordogu de dotori candu mi at fatu s'interrogu po sa pensioni! Etymon srd. Translations French interrogatoire English interrogatory Spanish interrogatorio Italian interrogatòrio German Verhör.

interrorídu , agt Definition chi dh'ant fatu a tímere meda, chi dh'ant fatu ispaurigare o chi est timendho meda Synonyms e antonyms apantamau, istremuntiu, spreluxiu Sentences sa zente fit interrorida, bidindhe totu cuss'abba, proindhe.

intérru , nm Definition su interrare is mortos, ma nau prus che àteru po s'acumpangiamentu chi dhis faent fintzes a campusantu Synonyms e antonyms tuda / acumpagnu, interràgiu, interramentu / cdh. intarru Sentences totu cussa zente in campusantu… ite bi at, interru? ◊ cantu tocos as inténdhiu de interru e de agonias!…◊ sa fanfarra de miniera fiat provendu sa màrcia po s'interru, coment'e dogna borta Etymon ctl., spn. enterro Translations French inhumation, enterrement English burial Spanish entierro Italian inumazióne, seppelliménto German Beerdigung.

interrutòre, interrutòri , nm Definition aparíciu (de manigiare prus che àteru a incracadura) chi si ponet pruschetotu in is impiantos elétricos po apèrrere e serrare sa passada de sa currente Sentences fit chilchenne a s'apàlpidu s'interrutore pro atzènnere sa lampadina ◊ incraca cuss'interrutori e alluimí sa luxi! 2. giughiat sa conca bóida che unu moitedhu, pariat chi ndhe li aiant istudadu s’interrutore de su pensamentu (N.Falconi).

intertàntu , avb: intretantu Definition inter tantu, in su tempus chi acontesset calecuna àtera cosa / in s'intertantu = sughestantu Synonyms e antonyms impeltantu, intere, interistantis, iscantonis, istantonis, istepetantis, paristantu, pestantu, sughestantu Sentences e intertantu si filat sa beste chi det portare in s'àula celeste in s'últimu viàgiu aventurosu (P.Casu)◊ milla s'ora de sa note ch'istirriolat traza traza èsseres chena isetu e intrestantu abbiat caras a s'ispera de un'ora menzus de vida (T.Tedde) Etymon spn? Translations French en attendant, entre-temps English meanwhile Spanish entretanto Italian frattanto, intanto German inzwischen, mittlerweile.

interteniméntu , nm: Definition su abbarrare, su s'istentare cun passiéntzia a ispiegare, agiudare a cumprèndhere, a fàere ccn. cosa Synonyms e antonyms apentu, stentu, tratenimentu Sentences in sa Comuna no si lu leant s'intertenimentu de t'ispiegare comente depes fàghere! Etymon itl. intrattenimento.

intertènnere , vrb rfl: intretènnere, intretènniri Definition fàere una cosa cun apentu, cun passione, cun incuru e passiéntzia Synonyms e antonyms apentare, interessai / istare, abbarrare Sentences isse s'intertenet a fàghere sas cosas bene ◊ sa morte fit intrada a bisitare sos betzos de s'ereu e sa bísita si fit intertesa peri a sos prus zòvanos ◊ mi apo a intertènnere pro fàchere intrare un'ómine sàpiu a sa cumpanzia nostra 2. tres annos sunt intretesos, ancora semus gherrendhe cun sos Corsos e Frantzesos (M.Baule).

interténniu , pps Definition de intertènnere Synonyms e antonyms intertesu.

intertésu , pps Definition de intertènnere; nau de fémina, chi est impedia, príngia, ibertandho pipiu Synonyms e antonyms interténniu Sentences a fàchere sa paradura si est intertesu s'amicu.

intertzèdere, intertzèdiri , vrb Definition foedhare a ccn. a favore o profetu de un'àteru Sentences po fai afaris cun paxi depis intertzedi tui!

intertzessiòne , nf Definition su chi si faet foedhandho a unu a profetu po su bene de un'àteru.

intertzessòre , nm Definition chi s'interessat e intertenet a foedhare a unu a profetu de un'àteru, nau mescamente de is santos Sentences reina de su chelu soberana e de totu su mundhu intertzessora.

intértzu intéltzu

intéru , agt: intregu, intreu Definition nau de cosa po su tanti, chi dhu'est totu, chi no ndhe mancat nudha; chi no est segau; nau in cobertantza de ccn. chi si credet meda, chi faet su tostau, chi si bolet pregau, no saludat, no s'indruchet / avb. a note intrea, a die intrea = note note, tota note, a totu noti, die die, tota die, a totu dí Synonyms e antonyms intregadu 1 | ctr. arrogau, secau, truncadu Sentences deo olvido onzi duda, onzi piantu e torro interu e forte a su chi fia ◊ chie cheret imparare cuss'arte traballat chin issu annos intregos 2. custa tatza est intrea, cussa est afilada ◊ unu piatu irbicadu no est intreu 3. za ses intreu, chi mancu bi saludas! ◊ candho essis cun ricos ses intreu, cun pòberos no faghes amistade! Etymon ltn. integru(m) Translations French entier (tout) English whole Spanish entero Italian intéro, ìntegro German vollständig.