Ditzionàriu in línia
de sa limba e de sa cultura sarda

ambrúi , nm Definitzione cosa a bufare, prus che àteru in su foedhóngiu de o cun is pipios Sinònimos e contràrios abbumbu, ambua.

ambrullànsa, ambrullànta, ambrullàtza , nf: ambuàcia, ambuatza, ambulartza, ambulatza, amburlassa, ammulartza, ammulatza Definitzione genia de erba bona po ebrúgiu Sinònimos e contràrios aburlanta, ambrutatza, ammuratza*, irimulata Frases no fait prus mancu a papai ambuàcia comenti festus una borta…◊ s'ambulartza si coghet e si papat crua puru ◊ si segaus duas ambuàcias e prandeus ◊ totus regolliant aschione, altzigusa, ammulartza, tzòcoro Terminologia iscientìfica rbz, Raphanus raphanistrum Tradutziones Frantzesu radis sauvage Ingresu wild radish Ispagnolu rabanillo Italianu ramolàccio selvàtico Tedescu Hederich.

ambrústia , nf: imbrústia Definitzione ispumadore de cuadhos, genia de istrígiula de passare in su pilu Sinònimos e contràrios brossa 1, brusca, brústia*, indrústia 1, irbrossa 1, isprumadore 1.

ambrutàtza , nf Definitzione genia de erba bona po ebrúgiu Sinònimos e contràrios aburlanta, ambrullansa, ammuratza*, irimulata Terminologia iscientìfica rbz, Raphanus raphanistrum.

àmbu , nm Definitzione genia de macarrone minudedhu chi si faet ponendho aintru de unu tianu largu unu pagu de símbula e unu pagu de abba apitzu e murigandho a lébiu e impresse cun sa punta de is pódhighes de una manu: essit a granighedhos piticos che gràndhile (o de diferente mannària comente si bolet) Sinònimos e contràrios frégua, pistizone, sucu Frases is ambus funt bonus po fai minestroni ◊ lah ca a papai dhoi at unu paghedhu de cíxiri cun ambus chi est abarrau! Sambenados e Provèrbios smb: Ambu, Ambus Terminologia iscientìfica mng.

ambúa , nf Definitzione cosa a bufare Sinònimos e contràrios abbumbu, ambrui.

ambuàcia, ambuàtza ambrullànsa

ambucòdhos , avb Definitzione lobu mannu de fune (o àteru deasi) postu de traessu de unu codhu a asuta de su subrecu de s'àteru codhu (ma podet èssere fintzes una tira de cosa de passare in codhos, una in cada, po mantènnere bestimentu coment’e apicau) Sinònimos e contràrios almugodhu Frases est ghirau chin sa soca ambucodhos e a tasca ◊ cherzo ispilla de conca e de petorra, unu zunchillu de ses ambucodhos! (M.Fronteddu)

àmbula , nf: àmpula Definitzione genia de istregighedhu de imbidru / min. ambuledha, ambulita Sinònimos e contràrios ampudha Frases a su frastimu faghiat ballare totu sos càlighes e sas àmpulas de sos parastàgios Terminologia iscientìfica stz Ètimu srd.

ambulabútzu , avb Definitzione peri su logu, a trevessu, nau de su istare andhandho Sinònimos e contràrios perilloiberillai.

ambulambía , nf Definitzione nau a disprétziu, cafei o un'assimbígiu de cafei fatu cun calecunu ammesturu de cosas diferentes (coment'e àmbulu 1) Frases fit istau menzus una tzíchera de cafè e po ambulambia est menzus nudha (P.Pireddu).

ambulànte , agt, nm Definitzione chi camminat, chi andhat in giru (nau prus che àteru de chie bendhet cosa peri is orrugas o in su mercau chi faent in pratza) Sinònimos e contràrios bendhiolu, bituleri, giranteri Ètimu itl. ambulante.

ambulàntza , nf Definitzione màchina adata e acumbeniada po ingòllere malàidos fintzes graves Tradutziones Frantzesu ambulance Ingresu ambulance Ispagnolu ambulancia Italianu ambulanza Tedescu Ambulanz.

ambulàre , vrb Definitzione andhare, èssere a tràvigu, in movimentu Sinònimos e contràrios andai, caminai | ctr. firmai Frases àmbula, pede meu, fintzas a domo de Deus! ◊ abbarreit paritzos meses chena recuire, ambulendhe peressiberessi ◊ sa cosa li àmbulat ifatu ◊ gràscias a Deus so ambulendhe (S.Seu) Ètimu ltn. ambulare.

ambulàrtza ambrullànsa

ambulàrzu , nm: ambulazu Definitzione parte de sa chedha de calesiògiat genia de bestiàmene chi no at angiau Sinònimos e contràrios istoighiu, lachinza Frases in cussa mindha bi at ambulazu meda Terminologia iscientìfica pst Ètimu srd.

ambulatóriu , nm Definitzione logu fatu adatu ue su dutore arrecit sa gente po vísita o cura Tradutziones Frantzesu ambulatoire Ingresu ambulatory Ispagnolu dispensario, consultorio Italianu ambulatòrio Tedescu Praxis.

ambulàtza ambrullànsa

ambulàu , nm Definitzione genia de papare fatu cun símbula grussa chi essit coment'e pulenta Terminologia iscientìfica mng.

ambulàzu ambulàrzu