Ditzionàriu in línia
de sa limba e de sa cultura sarda

imparaméntu , nm Definition su imparare Synonyms e antonyms imparonzu, imparu, istrutzione Sentences pro crèschere sos donos de natura bi cheret de iscola imparamentu (L.Marteddu)◊ sa cani mia est maista de imparamentu, ghia po is àterus canis ◊ s’obispu de Ales iat fatu su catechismu in campidanesu po èssiri prus praxili s’imparamentu de su pópulu Etymon srd. Translations French apprentissage English apprenticeship Spanish aprendizaje Italian apprendistato German Lehre.

imparanigiài , vrb Definition pònnere imparanígius, improèglios, ingiúlios, númenes a befa Synonyms e antonyms allomingiai, annomingiai, aparalumenare, aproegliare Sentences no creu chi in Tedéschia siant imparanigiaus Etymon srd.

imparanígiu, imparaníxu , nm Definition genia de númene chi si ponet a pitzu de su chi unu tenet, e chi si narat in càmbiu mescamente a befa, po erríere de calecunu difetu o piessignu (a bortas po distínghere de àtera persona de matessi númene e sambenau) Synonyms e antonyms allomíngiu, annomíngiu, aproégliu, impróveru, istevíngiu, paranòmini Sentences cussu imparanixu curriat peri a sa bonànima de babbu Etymon srd.

imparàre imparài

imparàtu , nm: imperartu, imperatu Definition css. intrajamentu, fatu mescamente cun petzos de linna, cuncordau po serbire a pònnere calecuna cosa: su parcu po fàere is garas poéticas si podet cunsiderare un'imperatu, deasi etotu sa màchina de ferrare, sa carruga, fintzes mobbília (ma fintzes cuncordu de gente po calecuna faina) Synonyms e antonyms aparatu, intrajamentu / retaulu Sentences in d-un'imperatu cuncodrau cun tàulas dhue furint is poetas cicidos in iscannos ◊ su fogu at abbruxau medas imparatus de sa sagristia 2. su giugi, si nci torrit a Castedhu cun totu custu imparatu de giustítzia! Translations French échafaudage English planking, framework Spanish andamio Italian impalcatura German Gerüst.

imparàu imparàdu

imparcadúra , nf Definition su imparcare; genia de ponte chi si faet a inghíriu de calecuna cosa po dhue trebballare o àteru Synonyms e antonyms imperatu, parcu, ponte.

imparcàre , vrb Definition fàere su parcu a calecuna cosa.

impàre , avb, prep: impai, impari, umpare Definition unu cun s'àteru, cun is àteros, is unos cun is àteros in su própriu logu o in su matessi tempus; coment'e prep. bolet puru sa prep. a o cun Synonyms e antonyms paris, patabari Sentences cun issos dhue aiat Asunesos benidos a sa festa po promiténzia e brindhaos dhos ant a chenare impare ◊ chelu e terra parent impare unidos in pregadoria ◊ su chi contat, pro totu sa vida, est su èssiri impari ◊ si nd'eus arriri impari de sa furchéntzia allena! ◊ su frutu betzu cun su nou impare osservo in sa matessi chima ◊ dèu cun issa seus cument'e sorris, pesadas impari in su própiu bixinau 2. Giacu e Giuanni impari a Zebedeu aconciànt is retzas ◊ andhamus impare cun Pedrànghelu ◊ a bortas si poniat a cantai impari cun issus ◊ andaus cras etotu impari cun su secretàriu ◊ mi arregollit a corcai impari cun su cuadhedhu? ◊ est murghenne sa robba impare chin su babbu ◊ est vienne in su tzilleri impare a tziu Gregori Etymon srd. Translations French ensemble English together Spanish juntamente, junto, juntos Italian insième, assième, unitaménte German zusammen, mit.

imparedhàre , vrb Definition imparare etotu, ma nau unu pagu cun tzacu Synonyms e antonyms imparai Sentences s'italianu commo za l'amus imparedhau! Etymon srd.

imparentài, imparentàre , vrb Definition fàghere a parente, intrare in sa parentella de un'àteru Synonyms e antonyms aparentai Etymon srd.

imparesài , vrb Synonyms e antonyms aggualai, apalisare, aparinare Etymon srd.

impàri impàre

imparigadúra , nf Definition su aparigiare cosa o logu Synonyms e antonyms aparisadura, imparisadura, splanadura.

imparisàda , nf Definition su imparisare, faina de imparisadura Synonyms e antonyms aparigiada, spranamentu Sentences a su logu inoghe li cheret dadu un'imparisada pro assentare sa linna Etymon srd. Translations French aplanissement English levelling Spanish allanamiento Italian spianaménto German Ebnung.

imparisadúra , nf Definition su aparigiare, fàere in paris Synonyms e antonyms aparisadura, splanadura Etymon srd.

imparisài, imparisàre , vrb Definition aparigiare, fàere in paris su logu, istèrrere cosa ammuntonada in manera parívile de arresurtare in paris Synonyms e antonyms apalisare, apianare, arrepranai, ispeagnare, ispianare, parizare, splanai | ctr. ifossare Sentences pro fàghere arzoledha sa terra si depet imparisare ◊ ue colamus cheret imparisadu ca est totu tzumbas e fossos Etymon srd.

imparónzu , nm Definition su imparare Synonyms e antonyms imparamentu, imparu, insegnamentu, istrussione Sentences s'imparonzu de custas mastras at dau frutos bonos Etymon srd. Translations French enseignement, étude English teaching, study Spanish enseñanza, estudio Italian insegnaménto, stùdio German Unterricht, Lernen.

imparrucàre , vrb Definition pònnere sa parruca, sa piluca.

impartíre , vrb Definition ispartzire, fàere is partes Synonyms e antonyms dividire, paltire, spartiri Sentences s'ant impartidu sas bestimentas mias (N.Fois).