A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Abbreviazioni | Legenda Simboli

scotzinài, scotzinàri , vrb: iscocinare, scutzinai Definizione bogare cotzighina; iscaviare sa conca, comente faent is animales / scutzinai a unu po si mòviri = fàghere pesare, fàghere andhare, scotzai Sinonimi e contrari ilciacarare, iscossighinare, sconchedhai / iscotzinare Frasi sa forestali no mi lassat scotzinari 2. is mallorus funt scotzinendi Etimo srd. Traduzioni Francese essoucher Inglese to grub Spagnolo cabecear Italiano dicioccare Tedesco ausstocken.

scotzuladúra , nf Definizione parte de sa farra: sa símbula prus fine.

scòva , nf, nm: iscoba*, scovu, scòvua Definizione genia de aina chi s'intrat in punta de unu fuste, coment'e unu matzu o pinzellu mannu mannu, tundhu o alladiau, de materiale longu e fine, cracu, po pinnigare àliga passandhodha in terra a frigadura / genias de iscova: de domu = iscóbulu, de forru = iscobile, de giminera = iscobuledhu, de pértia, de chimas fines de linna = iscobarzola / genias de linna chi si narant cun custu númene: scova = castagnarza, ghidhostra (Erica arborea, E. scoparia), s. burda = scovitzi (Erica terminalis), s. de bíngia, de bòi, de preidi, de argiolas = scovioi (Osyris alba), s. de campagna, de forru = nebriatza, iscobile de signora (Thymelaea hirsuta), s. de santa Maria = abbruschiadinu, alchemissa (Helichrysum italicum), scovas de forru = carabbineris (Bassia scoparia) e tabbacu burdu (Nicotiana glauca)/ portai a unu coment'e s. = fàgherendhe su chi si ndhe cheret fàghere Sinonimi e contrari iscóbulu Frasi chi torrit a fai scovas! ◊ at pigau sa canna de su scovu po nc'istratallai su tzurrundedhu (A.Garau)◊ donamidha cussa pudatza, ca mi fatzu una pariga de scovas de modhitzi! 2. no ses capatzu de nci bogai músciu aranti de issu: po cussu ti potat coment'e una scova Cognomi e Proverbi prb: scova noa scovat bèni ◊ Bernardu mi at biu, scovas de forru.

scòva 1 , nf Definizione una calidade de martigusa Sinonimi e contrari àdanu, inestra Terminologia scientifica mt, Genista aetnensis.

scovàciu , nm: scovatzu Definizione iscova de argiola, aina de cambos fines fata a sa bona po iscovare / su scovàciu de su gurdoni = carena, sporra Sinonimi e contrari iscobalzola Etimo srd.

scovadòri , nm Definizione chie tenet s'impreu de iscovare, de pinnigare o mundhare s'àliga Sinonimi e contrari algaju, aligheri, barramaju, mundhadore, scoveri Etimo srd. Traduzioni Francese balayeur Inglese road-sweeper Spagnolo barrendero, basurero Italiano spazzino Tedesco Straßenfeger.

scovadúra , nf Definizione su iscovai; s'àliga mundhada Sinonimi e contrari scovamentu / alga, mundadura Etimo srd. Traduzioni Francese balayage Inglese sweeping, garbage Spagnolo barredura Italiano scopatura, spazzatura Tedesco Kehricht, Müll.

scovài , vrb: iscobare* Definizione passare s'iscova o s'iscóbulu po ndhe pinnigare s'àliga Sinonimi e contrari afachiare, mundai Frasi tocat a scovai ma chen'e fai pruini! ◊ ajó, scova in pratza e s'àliga iscudindedha a innòi!

scovàja , nf Definizione fémina chi faet iscovas Etimo srd.

scovaméntu , nm Sinonimi e contrari mundadura, scovadura Etimo srd.

scovàtzu scovàciu

scovecài scobercài

scovédu , nm Definizione una genia de túvara o ghidhostre chi narant iscova burda Sinonimi e contrari iscobarzu, salinamascu, scovitzi Terminologia scientifica mt, Erica terminalis Etimo srd.

scovéri , nm Definizione chie de mestieri mundhat su logu Sinonimi e contrari algaju, aligheri, barramaju, scovadori Frasi mellus m'imprassu sa vida de sorteri ca a fai su scoveri no nci seu avesu (R.Locci) Etimo srd.

scoviadòri , agt, nm: iscoviadori* Definizione chi o chie iscóviat totu, chi istat contandho totu in giru, fintzes su chi no depet Sinonimi e contrari contaredhu, iscobiante, lendharzu, sciaidori, sciodheri, scoviaredhu.

scoviài , vrb: iscobiare* Definizione nàrrere o pònnere in giru is segretos o cosas chi no si bollent nàrrere; fàere ischire, o fintzes arrennèscere a ischire Sinonimi e contrari iscassetare, ispiare, lendhare / iscobèrrere Frasi apustis de tempus meda si dh'ia scoviau e a prim'apuntada fiat acanta de m'istochigiai ◊ de custu bolemu a no scoviai!

scoviànciu , agt Sinonimi e contrari iscobiante, lendharzu, scoviaredhu Frasi citiridha, tui, scoviànciu! Etimo srd.

scoviarédhu , agt, nm Definizione chi o chie iscóviat totu Sinonimi e contrari contaredhu, iscobiante, lendharzu, scorruledhu, scoviadori, scoviànciu Frasi si unu iscóviat po no acabbai in galera no podit èssiri cunsiderau unu scoviaredhu Etimo srd.

scovíi , nm: iscovile*, scovíle, scovíli Definizione iscopa de àchina o de sarmentu, sa carena de unu gurdone de àghina, su chi abbarrat apustis bodhios is pibiones (ma si narat de àteru frutuàriu puru, es. cheréssia): a logos est fintzes sa tupighedha de s'isparau Sinonimi e contrari coscovatzu, iscovàtzulu, sporra Terminologia scientifica rbr Traduzioni Francese rafle Inglese grape stalk Spagnolo racimo Italiano graspo Tedesco Traubenstiel.

scovilài , vrb Definizione pulire, illimpiare a scovilitu, cun calecuna cosa a bisura de iscova pitica; foedhandho de àghina, seberare e bogare su scovili Sinonimi e contrari scovilitai, scovitai Etimo srd.