A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Incurtzaduras | Legenda Sìmbulos

pointàdis , avb Definitzione p. ca… = no est debbadas chi…, tandho est pro cussu chi… Frases bonu cust'arrosógliu: pointadis ca dogna tanti cussa s'arrúsciat s'iscraxu! (M.A.Cappai)

poínus , avb Definitzione essire mudadu a poinus = bestiu bene meda, totu bene postu.

póis pói

poíta , avb, cng, nm: poiti, prite, proite, pruite, pueta, puita, puite Definitzione po ita = foedhu chi s'impreat mescamente in is dimandhas, ma fintzes in is arrespostas cun idea de iscopu, de càusa o intzimia: si est cng. inditat solu càusa, intzimia, motivu; coment'e númene, dónnia cosa o motivu chi si podet cunsiderare càusa o iscopu Sinònimos e contràrios ellea / ca Maneras de nàrrere csn: iscipiaus poita seus benius! = comintzu o istérrida de chistione chi si faghet candho si andhat a chircare a ccn., prus che àteru pro cosas de importu; si no fut poita… = ite mi tantat chi…, gei mi parit ca… Frases poita no benis cun mimi? ◊ proite mi cherias, chi mi as cramadu? ◊ poita si est firmau inguni, fustei? ◊ proite no bufas? 2. fato goi proite mi andhat bene ◊ fostei si depit cuntziderai fortunada pueta dhi est andada bèni 3. in s'andhare dudosu de custa vida cantos "proites" chena una risposta! (A.Porcheddu)◊ su proite faghet gai no bi lu dimandho ◊ no dhu scit mancu issu su poita ◊ pro l'ischire apo mastuladu puites mannos ◊ tropus poitas barrinant sa menti mia ◊ candho si fit acrarau a s'ispuntone aiat cumpresu su proite sos canes fint apedhandhe 4. si no fut poita, si nd'iat a èssiri pesau Ètimu srd. Tradutziones Frantzesu pourquoi, parce que Ingresu why, because Ispagnolu por qué, porque Italianu perchè Tedescu warum, wieso, weil, da, damit, als daß, Warum, Grund.

poíta 1 palíta

poitecòe , cng Definitzione po calesiògiat motivu Frases poitecoe siet, immoe ist deosi!

poitéi, poitéu , avb, cng: proiteu, priteu Sinònimos e contràrios poita / ca Frases sentza ischire proiteu amus dadu trotza e borta! (P.Pisurzi)◊ nos semus lassados sentza ischire proiteu (Grolle).

poíti poíta

poítia pobítia

póitu , pps Definitzione de pòtere Sinònimos e contràrios pódidu Frases si sont postos a cúrrere a cantu ant póitu ◊ sos sónnios narant su chi sa zente no at póitu àere ◊ lis aiat póitu contare sos contos chi no aiat póitu contare a sos nepotes ◊ nche l'aiat frunnitu pro cantu li fit póita sa manu (A.Pau).

poixédhu podhixédhu

pòja , nf Definitzione orrolu de unu bestire; genia de bestimentu largu de pònnere asuta de sa gunnedha, is féminas, de pònnere a denote po crocare / pònnere sa p. = impojai Sinònimos e contràrios ispojadura / ghilone, rodeu Frases passendi acanta, agiummai timiat de mi atumbai cun sa poja de sa fardeta Ètimu ltn. podia.

pòja 1 pógiu

pojàle , nm Definitzione terrenu inue apaulat abba Sinònimos e contràrios allagarzu, benassu, mara, peschina Ètimu srd.

pojòla, pojólu pajòla

pojólu 1 , nm Definitzione fossighedhu; su gúturu, mescamente su tretu inue passant is artérias e venas prus grussas chi andhant a conca, acanta a s'origa, asuta Sinònimos e contràrios bula, ispojoladolzu, spojolu Frases sas voghes tene in pojolu! ◊ su procu de pressorju trumbuscadu chin su tirju si arràsciat su pojolu Terminologia iscientìfica crn Tradutziones Frantzesu fossette jugulaire Ingresu jugular fossa Ispagnolu fosa yugular Italianu fossétta giugulare Tedescu Jugulargrübchen.

pojònca , nf Definitzione calanca, genia de buidedhu Frases sa pojonca de sos ocros.

póju pógiu

pojúcula , nf Definitzione fossighedhu chi si dhue faet in is orrocas e si prenet de abba, madrina, una pauledha Ètimu srd.

pojútulu , agt Definitzione chi est fatu coment'e poju, a bessu de ajona, a fossu / piatu p. = fucudu Sinònimos e contràrios acogalzadu, cafudu, copudu, cunculutzu, cupútzulu, putudu Ètimu srd.