Ditzionàriu in línia
de sa limba e de sa cultura sarda

cadredhài , vrb: cadredhare, cardedhai, cardidhari, cradedhare Definizione fàghere de ancas, mòvere is cambas iscudendho is peis a terra, prus che àteru po tostorrudéntzia o protesta o dolore; istare a su brínchida brínchida Sinonimi e contrari catrichidhare, ispeinchinare, istrumpidare, matanare, scadronai / iscradedhiare Frasi si ndhe pesat calchidendhe e andhat cadredha cadredha ◊ chi dhi ponit sabi, a sa ferida, su sannori gei cadredhat! ◊ dh'at aferrau a sa braba e dh'at fatu cadredhai: fiat acanta a s'imbrutai puru! ◊ su porcu fit male trobeidu e cadredhendhe s'est isortu ◊ is animalis arestis cadridhant si dhus aferras ◊ axiu tenit sa croxueta cardedhendi candu est cassara a soga a conca!… 2. candu su craboni est malu a tenni tocat a cardedhai cun su sulavogu ◊ chi is predis si podiant cojai, cussu no iat a cardedhai meda po agatai fémina Traduzioni Francese se démener Inglese to fidget Spagnolo agitar Italiano agitarsi, dimenarsi con i pièdi per insofferènza di qlcs Tedesco sich hin und her bewegen.

cadredhaméntu , nm Definizione su atripare is peis a terra comente faet chie no bolet abbarrare o no bolet calecuna cosa Sinonimi e contrari acuadhinadura, cadredhada, cadredhadura, cadredhu Etimo srd. Traduzioni Francese remuement de pieds par souffrance Inglese fidgeting Spagnolo forcejeo de los pies Italiano dimenìo con i pièdi per insofferènza di qlcs Tedesco Schlenkern.

cadredhàre cadredhài

cadredhòne , agt Definizione chi dhu tenet a vítziu a cadredhare Sinonimi e contrari cadredhosu Terminologia scientifica ntl Etimo srd. Traduzioni Francese impatient Inglese craving person Spagnolo agitado, inquieto Italiano che ha il vìzio di smaniare Tedesco erregt.

cadredhósu , agt Definizione chi de naturale costumat a cadredhare, chi no tenet passiéntzia Sinonimi e contrari cadramissosu, cadredhone, latranghigultzu Frasi sa crapita si est posta a cúrrere, cadredhosa, e nch'est sadhida a intro de un'àtera tanca ◊ unu de sos frades fuit ideosu, fogaritzu, cadredhosu e presumidu Terminologia scientifica ntl Etimo srd. Traduzioni Francese impatient, nerveux Inglese eager Spagnolo impaciente Italiano impaziènte, che ha il vìzio di smaniare Tedesco ungeduldig, aufgeregt.

cadrédhu , nm, agt Definizione su cadredhare, fintzes una genia de tostorrudéntzia, de murrúngiu Sinonimi e contrari cadredhada, cadredhadura, cadredhamentu 2. lassàdemi su cadredhu, no est comente nades bois! 3. custa teraca fit cadredha Etimo srd. Traduzioni Francese remuement des pieds par souffrance Inglese fidgeting Spagnolo forcejeo de los pies Italiano dimenìo con i pièdi per insofferènza di qlcs Tedesco Schlenkern.

cadreèdha , nf Definizione min. de cadrea, cadira pitichedha (sa de duas /e/, cussa de su sufissu, no s'intendhet e po cussu su foedhu est fintzes iscritu cun d-una sola)/ min. cadredhutza Sinonimi e contrari cadreighedha, catriedha Frasi intro a coghina e mi tratenzo solu cun d-una cadredhutza iscarrugada (P.Zenzero) Traduzioni Francese petite chaise Inglese small chair Spagnolo sillita Italiano seggiolina Tedesco kleiner Sthul.

cadregòne cadreòne

cadreighèdha , nf Definizione min. de cadrea, cadira pitichedha Sinonimi e contrari cadreedha Traduzioni Francese petite chaise Inglese small chair Spagnolo sillita Italiano seggiolina Tedesco kleiner Stuhl.

cadrelína cadrallína

cadrenànca cadànca

cadreólu , nm Sinonimi e contrari cadreone Etimo srd.

cadreòne , nm: cadregone Definizione cradea manna, mescamente de unu logu comente est una crésia, unu tribbunale, inue cicit un'autoridade Sinonimi e contrari cadirone, cadreatu, cadreolu Traduzioni Francese chaise haute Inglese big chair Spagnolo silla grande Italiano seggiolóne Tedesco Lehnstuhl.

cadría , nf Definizione cadriga, tretighedhu chi po comente si arrennescet a mantènnere s'arau a manu, arandho, abbarrat chentza arare.

cadría 1 , nf Definizione pruna aortitza, chi no sèberat s'ossu de sa prupa e si sicat Sinonimi e contrari tacatia.

cadriagàdria , avb Definizione mandhare una cosa c. = illascinandho Etimo srd.

cadriàre , vrb Definizione andhare, mòvere in pitzu de unu logu lisu chentza ndhe pesare is peis Sinonimi e contrari allescinai, fugire, illascinare, illiscigare, iscadriare, iscalusciare, istrissinare, lascinare, lassingiare, lissiniri Traduzioni Francese glisser Inglese to slide Spagnolo deslizar Italiano scivolare, sdrucciolare Tedesco rutschen.

cadriàtza , nf Definizione genia de erba Frasi papant lisporra, cadriatza, gicória, martutzu Terminologia scientifica rbz.

cadríga, cadrígia , nf: cadrixa, cardia, cardiga, catrica, catrígia, cradica, cadrícia, cradiga, gratica Definizione trastu a ferrighedhos cantepare coment'e ferrada pitica de pònnere crocada po orrostire cosa cun sa braxa asuta; àndhia, genia de aparatu ue ponent su santu po dhu bogare in crufessone leau in bàtoro; a logos, alabinna, muru po fàere aprigu ananti de unu barracu; nau in cobertantza, un'improdhu in su trebballu fatu de malesaura, chentza dhu bòllere, mescamente su chi si faet arandho candho s'arau si che andhat a contu suo coment'e pigandho unu surcu prus largu e lassat unu tretighedhu de terra chentza arare (= arai a coa de margiani, fàghere cadrija) Sinonimi e contrari grabíglia, grèglia / prana 1 / alabinna / indróvigu, sucrone Frasi sa cardiga depit èssiri bèni imbudhidada po pònniri su pisci a fai arrustu, ma frida po sa petza ◊ a prandi at fatu trota a cardiga 2. cussu santu est totu farratzau, est abarrada isceti sa cadriga 3. no bi at cadrixas in su sulcu meu! ◊ su terrinu arvatadu a marrinfatu l'ischerviaiant, ndhe betaiant sas cadrijas e sas pedighinas Cognomi e Proverbi smb: Cardia, Cardias Etimo ltn. cratic(u)la Traduzioni Francese gril Inglese grill Spagnolo parrilla Italiano gratìcola Tedesco Rost.

cadrigiàre , vrb Definizione passare unu pagu a fogu, orrubiare, nau de cosas de papare chi pigant colore ponendhodhas acostias a su fogu Sinonimi e contrari arrostire Frasi su casighedhu nou est bellu a dhu papare cadrigiadu in su fogu ◊ cadrigiànt su casu in s'ischidone fintzes a pigare colore de oro Etimo srd.