A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Incurtzaduras | Legenda Sìmbulos

barratzellàu barracellàu

barratzéllu barracéllu

barratzéllu 1 , nm Definitzione calidade de àghina bianca Sinònimos e contràrios albaranzéliu*.

bàrre , nm: barri Definitzione genia de butega inue bendhent cosas de bufare Sinònimos e contràrios cilleri Frases Sarbadori est passau a bufai in su barri ◊ cussus tenint unu barri in bidha mia.

barrédhu , nm Definitzione genia de panneananti chi ponent a is pipios; fintzes una genia de pantalones de orroda, de bragas po is piciochedhos Sinònimos e contràrios orredhu Sambenados e Provèrbios smb: Barreddu Ètimu itl. guarnello

barrédhu 1 , agt Definitzione nau de ccn., chi giughet sa barra (de fundhu) chi essit de prus, prus ladina, iscarraitza Frases su babbu si che fit imbetzadu, fit diventadu barredhu, no zughiat mancu dentes.

barrèla , nf Definitzione foga o barra de muru, tretu o parte de unu muru orruendhondhe o orruta Frases una barrela urruta est dannu in cumone… (A.Marceddu).

barrèra , nf Sinònimos e contràrios minda Frases sa tràvile abbitat in sa barrera de su bidatone, ue b'at boe Sambenados e Provèrbios smb: Barrera.

barréscu , agt Definitzione nau de piciochedhu, chi est barrosu, chi si credet unu pagu tropu.

barresólu barrasólu

barrètu , nm: berretu Definitzione pinzos de pònnere po ammontare sa conca, is ómines Sinònimos e contràrios bonete Frases fiat bistiu de istràcius, fintzas su barretu totu arroghigiau portàt (S.Leo).

bàrri bàrre

barriadòri , agt, nm Definitzione chi o chie carrat sa cosa, mescamente in is binnennas Sinònimos e contràrios carradore Ètimu srd.

barriadòrza , nf: barriadroxa Definitzione pértiga de bide chi si lassat prus longa po bogare frutu; calidade de àghina bianca Sinònimos e contràrios cabidiana, carriadòrgia Terminologia iscientìfica bng Ètimu srd.

barriadórzu , nm Definitzione logu o tretu inue andhat bene a carrigare, inue si càrrigat cosa Sinònimos e contràrios carrigadolzu Ètimu srd.

barriadròxa barriadòrza

barriàdu , pps, agt Definitzione de barriare; chi portat càrrigu; chi ndhe portat meda (frutu, machiori, pinzos de… mascu) Sinònimos e contràrios carrigadu / gàrrigu, frunidu | ctr. líchidu 1, iscàrrigu Frases fimus in medas e amus barriadu coitendhe ◊ tue za as barriadu, a machine! ◊ lampu a barriadu chi at cussu: no ndhe narat una zusta! 2. ocannu sas olias sunt barriadas meda ◊ semus barriados de males e no ndhe podimus a fàghere ispesa manna 3. cussu za nachi est barriadu e la cuntentat sa muzere! Tradutziones Frantzesu chargé Ingresu load (ed) Ispagnolu cargado Italianu caricato, càrico Tedescu geladen, voll.

barriadúra , nf Definitzione su barriare, nau prus che àteru de sa manera de carrigare Sinònimos e contràrios barriamentu, carrigamentu Ètimu srd.

barriaméntu , nm Sinònimos e contràrios barriadura Ètimu srd. Tradutziones Frantzesu chargement Ingresu charging Ispagnolu carga Italianu caricaménto Tedescu Laden.

barriàre , vrb Definitzione pònnere càrrigu apitzu (nau fintzes de frutuàriu po matas, de impícios e fainas po gente); giare a pitzu a unu po dhi fàere male, cracare / barriare s'àinu, su cadhu = barriare sa cosa a subra de s'àinu, a subra de su cadhu Sinònimos e contràrios achidire, atuai, carriai* / carrabbugliai, crazugai | ctr. irbarriare, scarrigai Frases ant fatu sas cosas in mannu ma si sunt barriados de dépidos ◊ su carru l'aiant barriadu a ponte de incunza ◊ no mi bàrries de cumandhos ca so essindhe pro torrare luego ◊ abbàida comente at barriadu cuss'olia, ocannu: che pilu in pedhe ndh'est! ◊ s'aera est barriendhe e fossis proet 2. su cane li at barriadu a mossos a s'animale istranzu ◊ sos leones ant barriadu a un'animale mannu e si l'ant manigadu ◊ li sunt barriados sos canes ◊ l'at barriadu sa frebba e postu l'at in letu Tradutziones Frantzesu charger Ingresu to charge Ispagnolu cargar Italianu caricare Tedescu laden, angreifen.