A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Abbreviazioni | Legenda Simboli

manighínzu mandhichíntzu

manighíta, manighítu , nf, nm Definizione genia de orrolu largu chi si faet a is mànigas de unu bestimentu, in is brúcios Sinonimi e contrari manighedha, manissu Terminologia scientifica bst Traduzioni Francese manchon Inglese muff Spagnolo manguito Italiano manicòtto Tedesco Ärmelbesatz.

manighizàre mandhighinzàre

manígia , nf Definizione su manigiare / èssiri de manígias bonas (nau in cobertantza) = tènnere abbitúdines malas, unu fàghere malu Sinonimi e contrari manígiu*.

manigiàda , nf: manizada Definizione su manigiare; sa móvia de sa manu po fàere calecuna cosa, fintzes chentza dha fàere de abberu Sinonimi e contrari ammiada, ingestu, mesurada, movitada, tramesada Frasi ti ses che colora ischirchinadu ebbi'ebbia pro sa manizada de duas "capas" e duas "tizetas" 2. si li fato sa manizada, cussu cane si che fuit ◊ ti bastet sa manizada! ◊ sa gente fut totu a manigiadas e a boghes po su piciochedhu a cuadhu ca fut binchendho Etimo srd. Traduzioni Francese signe, geste de la main Inglese wave (of the hand) Spagnolo ademán, seña con la mano Italiano cénno della mano Tedesco Handzeichen.

manigiài, manigiàre , vrb: manitzare, manixai, manizare Definizione pigare o portare in manu cosa po si ndhe serbire, po dh'impreare, po fàere, ma fintzes solu impreare, nàrrere; rfl. moveresindhe, fàere in lestresa Sinonimi e contrari ammaunire, impleai, maniestare Modi di dire csn: manigiai sa terra = arare, triballare sa terra; isciri m. su telefoninu = ischire totu ite e comente si faghet cun su telèfono cellulare; manizàresi a ccn. = chircare de dhu cumbínchere fintzas a fàere su chi no est giustu o no andhat bene, currúmpere puru Frasi arendi manígiat s'arau bèni meda ◊ manitzaiat sa urvajola a sa tzeca, canno fit arrabbiatu ◊ no manizant sos fusiles, ma pagu tziviles etotu sunt! ◊ su pei chi si manígiat de prus po guidai sa màchina est su deretu ◊ is fuedhus chi prus manixaus funt in sardu 2. cussa est genti chi viàgiat, bandat a teatru, si bistit bèni: si bit ca manígiat dinai meda! ◊ a chini no est abbituau, a manixai dinai dhi donat a conca 3. si no mi manizo, sos puzones no mi lassant ua in binza! ◊ manízadi, già los bides continu tuca tuca, sos colvos a su tou!…◊ mi apu a irballiai, ma in mangasinu dhui manígiat topis! 4. sa terra no fiat istétia manixada in s'istadi e po cussu no boliat arriscai a ndi seminai meda Etimo itl. Traduzioni Francese manier, manipuler, manœuvrer, mettre tout son œuvre Inglese to use, to manipulate Spagnolo manejar Italiano maneggiare, manipolare, manovrare, adoperare Tedesco hantieren (herum), handhaben, gebrauchen.

manígiu , nm, nf: manixu, maniza, manizu, meixu Definizione su manigiare, su faimentu, trebballu o movimentu de manos prus che àteru nau in su sensu de impreare cosa, de dha pònnere a fàere, a si ndhe serbire, o fintzes solu de istare faendho faina, trebballandho cosa; manera de fàere; fintzes cuncordu de calecuna faina pagu onesta, unu pagu a trassa, unu pagu a iscúsiu, a ingannu Sinonimi e contrari contibizu, faina, impreu, maniestu, magoninzu, manucu, trabàgiu / alvatadura, barbatada / transa Modi di dire csn: tènnere una cosa meda a manizu = pònnerela o impreàrela meda, in cosas de donzi die; cosa, trastu de manígiu (es. tialla, bestimenta) = de pònnere a fitianu, a donzi die, pro donzi bisonzu (ctr. de càstigu); terra de bonu manizu = bona a triballare; manixu, meixu (de sa terra)= aronzu, aradura; àere manizu de una cosa = ischírela leare, èssere pràtigos a si ndhe serbire; su manizu de sa domo = su comente si muntenet e contivizat sa domo, sas cosas de domo; leare, ghiare su carru a manizu de nanti = sétidos a cara a punta, acurtzu a sa forchidha; su cane poltat manígiu = at leadu sa trata de sa fera, est ponindhe ifatu a sa fera Frasi in su cuile istabat petzi a s'ora de su manizu ◊ tziu Berte, fatu su manizu, si sediat ◊ fachendhe carbone, sos ómines che fint in sa coa de su padente, in su manizu ◊ si s'animale no afilat a manu de su mere, peus si bidet manizu de fune anzena! 2. bellu manizu pro bínchere sa tentassione, Elias Portó!…◊ gei dh'apu biu su manígiu, acomenti ispendit su dinai! ◊ cun tzertos manizos sos fizos los guastant ◊ si bi at manizu sa cosa resessit ◊ contivizare e muntènnere sa paghe fit su manizu de babbos e mamas 3. no ti fides a bi andhare: cue bi at manizu! ◊ mi so abbistu chi in cussa béndhua bi at manizu mannu ◊ sos chi votant in sa Giunta istant fatendhe manizu ◊ cussu faghet manizos finas in crésia e peri sos caminos! 4. in domu lassaus isceti su dinai de manígiu: s'àteru in banca ◊ sa tialla bona dh'allogu: de manígiu gei ndi tengu ◊ custu est unu cuadhu de manígiu, cudhu est de istadha ◊ no pongais su servítziu nou a manígiu! ◊ custa est s'àcua de manígiu, cussa po bufai ◊ sas cobertedhas chi zuto a manizu las apo samunadas Etimo itl. Traduzioni Francese maniement, manipulation, travail, procédé, intrigue Inglese use, manipulation, procedure, intrigue Spagnolo manejo, procedimiento Italiano maneggiaménto, manipolazióne, lavorazióne, manéggio, procediménto, trésca Tedesco Handhabung, Methode, Machenschaft.

maníglia , nf: manilla, maníllia Definizione parte de unu trastu, de un'apertura, fata adata po dha pigare cun sa manu Sinonimi e contrari manècia Frasi a su guardarrobba lis at avitau maníllias lúchidas Etimo itl.

maníglia 1 , nf: maríglia 1 Definizione prendha fata a lóriga chi si ponet in su brúciu; lóriga chi poniant a is presoneris in cambúcios Sinonimi e contrari bratzale / griglione 2. a ti bídere in cambas sa maríglia! Etimo ctl., spn. manilla.

manigónzu manicónzu

manigòtu , nm: maningotu Definizione genia de brúciu largu e longu de su bestimentu, o fintzes una genia de màniga istacada, curtza, de intrare in brúcios Sinonimi e contrari manghitu Frasi po messai a fraci ponestus is maningotus e su panneananti.

mànigu mànicu

mànigu 1 maínga

manilàlgu, manilàrgu , agt Definizione chi est de manos largas, de bonu coro, chi giaet a meda, a tropu Sinonimi e contrari dadivosu, maniapertu, manibrenu / sperditziau | ctr. limidu, manistrintu, susuncu Frasi s'annada si presentat tropu trista e pagu manilargu est su Segnore Terminologia scientifica ntl Etimo srd. Traduzioni Francese prodigue, généreux Inglese generous Spagnolo pródigo, generoso Italiano pròdigo, generóso Tedesco verschwenderisch, großzügig.

maníle , nm, agt Definizione sa màniga a ue si pigat s'arau po dhu manigiare arandho; genia de guantu; chi faet a dhu pigare a manos, si manígiat cun facilidade Sinonimi e contrari manaxili, manghitu 2. sa contzadura de sa pedhitza cheret fata impreendhe maniles de gumma e caratza pro no ndh'alenare sos popores (G.Addis) 3. li pisteit sos ossos chin d-unu ramu manile ◊ po sa pultascione ant bogadu s'istàtua piús lezera e manile Etimo srd.

maniléstru , agt Definizione lestru de manos, nau de unu malu: chi est lestru furandho Sinonimi e contrari manilongu Etimo srd.

manílla, maníllia maníglia

manilóngu , agt Definizione chi portat manos longas (po furare) Sinonimi e contrari furuncu, manilestru Etimo srd.

manimancósu , agt, nm Definizione chi o chie manígiat méngius sa manu manca Sinonimi e contrari mànchinu, mancosu.

manimbèsse , nm Definizione istuturrada chi si giaet a manu furriada, de fèrrere própriu is ossos a is trempas / corpare a m. = a manu furriada Sinonimi e contrari bussinada, cabbessu, ciafu, irbatulada, iscavanada, mantuada, sporsugada Etimo srd.