A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Abbreviazioni | Legenda Simboli

pagellída, pagellína, pagellíra , nf: pagialida, paxalida, pazellita Sinonimi e contrari padedha 1, vagellira / istarràsciu, seca, tòllere Terminologia scientifica crx, patella coerulea Etimo ctl. pagellida Traduzioni Francese patelle Inglese limpet Spagnolo lapa Italiano patèlla Tedesco Napfschnecken.

pagéllu , nm: pazellu Definizione genia de pische de mare: pagellu ’eru Sinonimi e contrari basocu Frasi ammisturu prupu, sépia cun pagellu, gallinetas cun sorellu, vacas, òrgunus… una bella cassola! Terminologia scientifica psc, pagellus erythrinus Traduzioni Francese pagel Inglese sea bream Spagnolo breca Italiano pagèllo fragolino Tedesco Rotbrasse.

pagéri , agt, nm: palgeri, palleri, paxeri, pazeri Definizione chi o chie est prenu de braga, chi si bantat o credet meda Sinonimi e contrari bantaditu, bantageri, blagheri, bragosu, crétidu, ispacone, scaviau, spaxeri Frasi candu passas in pratza fais passus palleris ◊ at a èssi pagu pallera, cun totu cussu bèni chi dh'ant lassau!…◊ chini si vantat ricu est palleri (E.Loni) Terminologia scientifica ntl Etimo srd. Traduzioni Francese vaniteux, fanfaron Inglese vain person, blusterer Spagnolo vanidoso, creído, fanfarrón Italiano vanitóso, fanfaróne Tedesco eitler Mensch, Prahler.

pàghe pàche

paghedhédhu , nm Definizione unu tanti pagu pagu Sinonimi e contrari paghitzedhu.

paghédhu pachédhu

paghennennúdha , nm Definizione ne pagu e ne nudha, pagu de abberu, nau de una persona puru: nau in cobertantza, meda Frasi su chi mi at dadu est paghennennudha 2. cussu paghennennudha no ndhe faghet de cosa in adderetu (G.Ruju) 3. li ponzeit custu paghennennudha de sa timória chi comintzeit a titillias de fritu Etimo srd. Traduzioni Francese très peu Inglese very little Spagnolo muy poco Italiano pochìssimo Tedesco sehr wenig

paghessòra , avb Sinonimi e contrari comogomo, issara, tandhodandho Frasi paghessora fia cun issa Etimo srd.

pàghi pàche

paghidàde pachitàte

pàghidu , agt Sinonimi e contrari chetu, glianu, pàsidu, pàsigu, selenu 1, séliu | ctr. càdriu, forte Frasi pàghida e serena che lentore una rusina tépia e lezera bagnat sa terra e mi allegat de amore (G.Deriu).

paghiósu pachiósu

paghítu , agt, nm Definizione min. de pagu Sinonimi e contrari pachitzedhu, paghedhu, pagonzu.

paghitzédhu pachitzédhu

pàgi pàche

pàgia , nf: paja, pàlgia, palla, patza, paxa, paza Definizione restrugu o canna de laores pistau àrridu treulandho (ma a logos est fintzes sa terga de su moriscu); in cobertantza (bista coment'e su contràriu de su granu, chi est su chi si arregollet e balet), idea presumia chi unu tenet de issu etotu, coment'e candho si giaet bàntidos, fintzes chentza méritu Sinonimi e contrari bàntidu, blaga | ctr. ranu Modi di dire csn: s'andàena, su caminu de sa paza o bia de sa palla = passada de istedhos in s'aera, a medas de pàrrere un'ormina de paza (itl. Via làttea); o est babbu o est cerda ’e palla! = si no est una cosa… est un'àtera!; mastru de paza = mustajoni; fai palla = bragare, ispazare; cadira a fundu de palla = cadrea de fenu profizadu e téssidu; palla o paza marina = zenia de erba chi creschet in mare a foza lada e longa longa: si narat mescamente de sa chi s'abba ammuntonat sica e chimentada in oros bassos; sa domu de sa palla = pazarzu; segai su tzugu in d-unu filu de palla = pèrderesi in nudha, iscollàresi in su paris netu; fàere in paza = chircare in s'arzola carchi ranu cambadu apustis collidu su laore, una zenia de ispigonzu, de chirca in su pagu Frasi moliat su pòberu animale po unu púngiu de pàgia aungiale ◊ pro dh'ammantare no portant pannos: de pàgia dh'ant fatu acostamentu, unu lachedhu fatu che brassolu ◊ molenti portat palla e molenti si dha papat 2. cussus funt cuntentus ca, po fai palla, depint bogai a pillu su bestiri nou ◊ s'àtera tenet paza sentza ranu e si presumit meda, che a tie chi giughes paza in conca e rista in manu (A.Dettori)◊ totu su chi as nau est paza! Cognomi e Proverbi smb: Paggia, Palla / prb: chie servit a segnore sa domo sua la frazat: in s'órriu ponet paza e in sa cuba lentore ◊ a paza sola si ammasetat su cadhu Etimo ltn. palea Traduzioni Francese paille Inglese straw Spagnolo paja Italiano pàglia Tedesco Stroh.

pàgia 1 , nf, nm: paja 1, paju, paxa 1, paxu, paza 1, pazu Definizione su tanti de duos (de calesiògiat cosa) de sa matessi genia pigaos impare coment'e una cosa ebbia Sinonimi e contrari duos, pariga / cioba Modi di dire csn: dua paja, tre paja, bato paja, chimbe paja, se paja: sa /s/ de su pl., comente si podet bídere, in custa peràula no si ponet candho l'acumpanzant sos agt. numeràrios, cussos puru chentza sa /s/; una paja de voes = una loba Frasi onzi pàgia de meses si faghiat a bíere ◊ cantas paja de cartzitas as comporadu? ◊ ghiraiat unu paju de vias a s'annu ◊ mi apo comporadu una pàgia de caltzones 2. intègralas pajas, si sunt mutias e issias (F.Cambosu) 3. ghiraiat unu paju de vias a s'annu Etimo itl. Traduzioni Francese paire Inglese pair Spagnolo par, pareja Italiano pàio, còppia Tedesco Paar.

pagiagòda , nf Definizione palla de codi, crosta de conca, pigighedhu de carre morta Sinonimi e contrari atiza, atògia, cadassa, crosta, freadu, muga, solla, tizola Etimo srd.

pagialída pagellída

pagíli , agt Definizione chi est de paghe, nau de ccn. Sinonimi e contrari pachiosu | ctr. brigantinu, gherristu Etimo srd.