A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Abbreviations Legenda | Symbols Legend

tramesónzu , nm Definition su tramesare, nau de unu manígiu metzanu, a face manna, chentza contivígiu Sentences si a maniale anzenu ses torradu no est pro malu tramesonzu meu! Etymon srd.

tramésu , prep: tramesus Definition in mesu de…, in mesu a…, cun… Synonyms e antonyms intremesu Sentences unu sirione imbirdinne tramesus de duas pretas ◊ no est petzi pro mene su chi ti so pedindhe tramesu de custos surdos pedrajos ◊ aiat abbubbulicatu sa vusina in buca e nche l'aiat sutzata a intro tramesus de sa limba e de sas duas dentes de dainnantis ◊ fiat bíviu sèmpiri tramesu de bòis e brebeis.

tramésu 1 , nm: trammesu Definition muru de mesu, mescamente fine, po ispartzire logu in aposentos; àtera cosa de pònnere in mesu po istagiare duas cosas, duos logos o tretos e àteru (es. in bíngias in costera, traessa, muru a istúturu tra birada e birada) Synonyms e antonyms tabbicu, tremesana / cdh. stramezu Sentences in cussa domu s'annu passau dhus ant fatus, is tramesus, ocannu ndi dhus ant isciusciaus: si bit ca ant cambiau idea Etymon itl. Translations French cloison English partition Spanish tabique Italian tramèzzo German Zwischenwand.

tramésus tramésu

tramíchi trambíche

tramíngiu , nm Definition arretza a tres telos po piscare e po cassare pigiones Sentences si bidiant paradas de tramíngius e retzas de piscadoris ispartas po asciutai.

tramíntere , vrb: tramítere, tremíntere Definition passare s'ordiu in mesu de is litzas isterrendhodhu de un'ixubru a s'àteru, aprontandhodhu po tèssere Synonyms e antonyms intremissiri Sentences est in su telarzu tramitindhe.

tramintónzu , nm Definition su tramíntere Etymon srd.

tramítere tramíntere

tràmma tràma

trammadhéri , nm Definition (t. de sobi) basca forte Synonyms e antonyms caldana, cama.

trammésu tramésu 1

tràmmudu , nm: tràmunu Definition bestimentu càmbiu, límpiu Synonyms e antonyms mudadura, mudóngiu, tramudu Sentences dàemi su tràmunu ca sa bestimenta chi zuto in dossu est bruta! ◊ Gantine est torradu de cuile pro si che leare su tràmmudu Etymon srd. Translations French vêtements propres, changer le linge English change of clothes Spanish ropa limpia para cambiarse Italian vestiti di ricàmbio German Kleider zum Wechseln.

tramòglia, tramòja, tramòlla , nf: tremoja Definition cosa chi si faet a ingannu de s'àteru; fintzes chie acostumat a ingannare s'àteru Synonyms e antonyms abberintu, afrascu, cumpoltura, estremagiogu, imbovu, ingànniu, mangorra, tràglia, tramperia, troga / tramperi, trasseri Sentences sas tramojas de sas lezes ◊ cussa tramoja no bi lis ischiat neunu, in sa Comune Etymon spn. tramoya Translations French fraude, piège English trick Spanish fraude, trampa Italian fròde, tranèllo German Betrug, Falle.

tramorítu tamaríciu

tràmpa , nf Definition cosa chi si faet o chi si narat a dannu de s'àteru, contra a sa volontade sua, faendho crèdere una cosa po un'àtera, e fintzes sa malidade, su vítziu de trampare / leare o picare a unu in t. = bínchere, cumbínchere, pigare cun s'ingannu, contandho fàulas, presentandhodhi una cosa po un'àtera Synonyms e antonyms abberintu, afrascu, cadràbula, estremagiogu, imbovu, ingànniu, màngana, maragna, tarasca, tràglia, trampadoria, trapassa, transa, trebedhu, troga Sentences mundhu traitore: totu trampas, totu ingannia! ◊ labai de no arrui in sa trampa malladita de nc'iscavuai sa língua nosta! 2. mancu delincuentes podent leare in trampa cun su diritu a s'informatzione (L.Ilieschi)◊ in trampa che apo giutu a su mare a Bustiana, chi est birgonzosa meda Surnames and Proverbs prb: su matzone perdet su pilu ma no sas trampas Translations French escroquerie, piège English prank Spanish estafa, trampa Italian gherminèlla, truffa, tranèllo German Schlich, Betrug.

trampadòre , agt, nm Definition chi o chie trampat Synonyms e antonyms ingabbadore, tramperi, tramposu Etymon srd.

trampadoría , nf Synonyms e antonyms trampa, tramponzu Sentences cussu est abbituadu a fàghere bufos e trampadorias Etymon srd.

trampadúra , nf Definition su trampare Synonyms e antonyms ingannamentu, trampa Sentences s'incapat no mi est costada sa trampadura de custu: muzere mia de s'assustu contat mesu furriada! (Limbudu)◊ a compare l'aviamus picau a trampadura Etymon srd.

trampài , vrb: trampare Definition odringiare o fàere trampas, pigare a ingannu Synonyms e antonyms abbovai, coglionai, colovrinare, imbusterai, imbuvonare, ingannai, ingheniare, istusciare, mariolare, stafai 1, trambollai, trapulare / trampistare, tramputzare Idioms csn: trampare su tempus = chircare de che colare su tempus cun ispedientes, male comente si podet, o fintzas pretenindhe de fàghere su chi… no faghet!; genia de annomíngiu: Trampasusole Sentences su malu pagadore tenet s'abbitúdine de trampare ◊ in su denuntziare trampant a mesapare servèndhesi de cifras piús minores ◊ no ti fides de cussu, mighi ti trampat! 2. cun sas provistas chi tenet che trampat su zerru ◊ a s'edade nostra, goi betzos, no s'ischit comente che trampare sa die ◊ oto séculos ritzu, custu castedhu trampat su tempus resistendhe ancora Etymon srd. Translations French escroquer, tromper English to trick Spanish estafar Italian truffare German betrügen.