Ditzionàriu in línia
de sa limba e de sa cultura sarda

illisiàre , vrb: illissiare Definition aparigiare, fàere lisu, passare ccn. cosa po fàere bellu; fintzes fuire de manos, nau de cosa lisa Synonyms e antonyms allisai Sentences innantis de rispòndhere, mannoi si at illissiadu sa barba ◊ seo abbaidanne una codedha illisiada de riu 2. custa cosa ti che illísiat che un'ambidha! Translations French lisser English to smooth Spanish alisar Italian lisciare German glätten, polieren.

illizàre , vrb Definition sufrire po mancamentu de abba, nau de is erbas / cara illizada = cara chei sa tela, cara mala de bisura Synonyms e antonyms acalamai, agurgire, allacanae, allebigiare, allizare, calighinare, pansiri Etymon srd. Translations French se faner, se flétrir English to wither Spanish marchitar Italian appassire, avvizzire German verwelken.

illoíre , vrb: illuire Definition torrare in posse, po dinare, de su chi unu aiat pérdiu o giau, pagare su dépidu; iscabbúllere de un’afrinca; torrare agoa Synonyms e antonyms alloire, ischitare, luire Sentences bi tenzo obbligassione cun chie mi at agiuadu a illuire su dépidu Etymon srd. Translations French racheter English to release, to redeem Spanish redimir Italian riscattare, svincolare un cènso German ablösen, freimachen.

illomeràre , vrb: illorimare, illorumare, slomburai Definition istèrrere su filu de su lómburu; ispainare, istèrrere Synonyms e antonyms irgromerare | ctr. allomborae Sentences illorimare su cabu ◊ bides, in su pasu de su sero sa lóriga tzega de su denegu s'illórimat lestra peri sas carrelas (G.Elies) 2. s'abba illorumendhe abbratzat sa rena, s'isterret e poi torrat a mare Etymon srd. Translations French dérouler, dépelotonner English to unroll, to unwind Spanish desarrollar, desovillar Italian srotolare, sgomitolare German aufrollen, entknäueln.

illongàre , vrb: illonghiae, illonghiare, islongare Definition essire prus longu, fàere prus longa una cosa, nau fintzes in su sensu de dh’istirare, de dh’apèrrere totu, de nàrrere cosa meda, prus de su chi serbit, de istentare Synonyms e antonyms allongare, istirare, istiriolare | ctr. acurtzai Idioms csn: i. su bratzu, sa manu = istirare su bratzu, sa manu; i. su passu = andai prus allestru; illonghiae su tzugu = istare chentza manigare, coment'e ingullindhe salia, ma fintzas disizare carchi cosa in debbadas Sentences sa pasta cariada si depet irfinigare e illonghiare pro fàghere sos macarrones tundhos ◊ a colare inoghe s'istrada illónghiat meda ◊ sa bete barva si li fit illonghiada fintzas a grenucos ◊ coladu nadale sas dies illongant 2. su ferenu dhi est passau e no si dha sentit de faer síghere a illonghiae su tzugu a su fizu, chi est sentza papae ◊ candho si tratat de pretèndhere unu diritu, tandho ndhe as aju de illongare tuju! 3. po no illonghiare, bos ammento duas brullas ebbia ◊ tziu Bantoni aiat bestiu in mesu àteru nàrrere pro secare in curtzu unu negóssiu chi zuchiat su grabbu de s'illonghiare ◊ apenas poto su "emmo" ti lu do, ne ti l’illongo cun "ne" e ne cun "ma" Etymon srd. Translations French allonger English to lenghten Spanish alargar Italian allungare, dilungare German verlängern.

illorigàre , vrb Definition istèrrere, ispràghere o istirare cosa pinnigada; rfl. si narat fintzes in su sensu de fàere impresse Synonyms e antonyms ilboligare, istirare | ctr. alloricare Sentences como faghimus una bella caminada ca nos illorigamus sas ancas 2. pesa, illorigadindhe, ca est tardu! Etymon srd. Translations French étendre English to stretch Spanish desentorpecer Italian sgranchire German recken.

illuchèschere , vrb: illucrèschere, illuèschere Definition cumenciare a fàere lughe, su mengianu chitzo, nau de sa die acanta a essire su sole, e fintzes de sa luna; fàere lughe, illuminare Synonyms e antonyms abbrèschere, abrurai, albeschire, illughintinare, intrabatzinare, isgrinare, ispanigai / ilgiarare, iscrariai | ctr. iscuricare Sentences atacabant a traballare illucheschendhe e acabbabant a s'intríghinu 2. sa luna illucreschiat in su monte: a cussu lucore bidu che apo tres sàgomas benendhe ◊ su locu est mesu iscuru: sa luche illucheschet sa prata ◊ sa domita de tiu Bachis est illuéschida dae una téula de bidru Etymon srd. Translations French faire jour English to dawn Spanish amanecer Italian albeggiare German dämmern.

illudràre , vrb: illudriare, illurdiare, illutriare Definition imbrutare cun su ludu, de ludu, ma fintzes imbrutare bastat chi siat Synonyms e antonyms afangaciai, alludrae, allurdagai, ammodhocare, illudratzare, illudrionare, illurdinare, illustriare, infangaciai, ludai Sentences colendhe in su caminu totu ludu mi apo illudriadu sos cambutzos Etymon srd. Translations French crotter English to muddy Spanish embarrar Italian infangare German mit Kot beschmutzen.

illudratzàre , vrb rfl Definition imbrutare cun su ludu, fàere a ludu Synonyms e antonyms illudrare, illurdagai, illustriare / ammodhocare Sentences a bortas fachiat fritu e proghiat, illudratzandhe su terrinu Etymon srd. Translations French éclabousser English to splash with mud Spanish embarrarse, enlodarse Italian impillaccherare German mit Kot besudeln.

illugerrài , vrb: illugherrare, illuxarrai, illuxerai, illuxerrari Definition fàere lughe meda; pigare a ogos, coment’e leare sa vista po sa lughe tropu Synonyms e antonyms alluinai, allutzerrare, illughentare, illughinare, impannare, lugerrai, slugerrai Sentences su soli at illuxerau prus de milli orbescidroxus ◊ sos lampos illugherrant sas nues 2. femu totu illugerrau de su luxentori ◊ su sole m'illugerrat ◊ no castis su soli, lah ca t'illuxerrat! ◊ seo totu illugerrau: sos ogos meos sunt brusaos! Etymon srd. Translations French éblouir English to dazzle Spanish deslumbrar Italian abbacinare, abbagliare German blenden.

illughentàre , vrb Synonyms e antonyms brigliai, illampizare, illugerrai, lúchere Sentences deo in saltu e binzas so sempre afatzendhada, goi o gai, e tribagliendhe etotu m'illughento (Piras) Translations French resplendir English to shine Spanish resplandecer Italian risplèndere German glänzen, strahlen.

illughinàre , vrb: illuinai, illuinare, illuinari, illuniare, irluinai Definition fàere lughe meda, pigare a ogos, leare o annapare sa vista po sa lughe a tropu, leare a su sentidu; cumbínchere a ccn. cun calecuna cosa prus che àteru po su malu, cufúndhere sa mente; fintzes illuinare Synonyms e antonyms allampiai 1, alluinai, illugerrai, illughentare / improsae, incegai, ingannai, slugerrai / ingadhinae, scimingiai Sentences su sole fit gai luchente chi illughinabat ◊ sigomenti no bidia prus, poita cuss'astru sighiat a m'illuinai, is cumpàngius m'iant pigau a sa manu (Atus)◊ sa pitzinna fughendhe trambucat e rughet, coment'e illughinada ◊ mi at illuinadu sa cara de risitos (L.Brozzu)◊ su soli cumenciaiat a irluinai e de sa fentana intraiant is istriuledhus de is curculeus 2. illuinant che sole sas richesas ◊ dhus iat illuinaus cun is maias suas ◊ macari sa zente t'illúinet nendhe, l'isco deo comente est sa chistione ◊ medas si lassant illuinai de giogus e cassai de meris abbramius (G.Moi)◊ su bufóngiu fut cumenciandho a dhos illuinare 3. fipo totu sa die illughinau: nen crapas nen crapitos distinghio (T.Ziranu) 4. a su cadhu inghirianne sa mola dhi poniant una paja de atzales de pedhe po non s'illuinare Etymon ltn. in *lucinare Translations French éblouir English to dazzle Spanish deslumbrar Italian abbagliare, abbacinare German blenden.

illumbài, illumbàre , vrb: illummare, islumbare, slumbai Definition pònnere dolore a lumbos, acropare a lumbos, a is errigos Synonyms e antonyms iderrigari, illumbedhare, irrenare, isarrigai, iscumbarare, lumbai Sentences illissinu a peis paris, in s'oru de m'illummare! ◊ sétzidi in su liminaxu de s'enna: chi ti movis, custus mengianu t'illumbu! ◊ iscudidhu de perda, illumbadhu cussu cani! Etymon srd. Translations French s'éreinter English to strain one's back Spanish derrengar Italian dilombare German sich abmühen.

illuminài , vrb: illuminare Definition ispannare s'iscuru, giare lughe Synonyms e antonyms allugare, allumae, allúxiri, illucherare Translations French éclairer English to illuminate Spanish alumbrar, iluminar Italian illuminare German beleuchten.

illustràre , vrb Definition frigare, pònnere sa lustra a sa pedhe, pruschetotu a is botinos, po dhos fàere lughentes e ca aguantat de prus sa pedhe Synonyms e antonyms allucidai, allustrai, illutzidare Etymon srd. Translations French astiquer, cirer English to polish Spanish lustrar Italian lucidare German glänzen, wichsen.

illutonàre , vrb Definition essire o bogare un’arremu de su lutone (mescamente su de sa camba) Synonyms e antonyms iscrocare 1 Etymon srd. Translations French se luxer les hanches English to dislocate one's hips Spanish dislocar las caderas Italian lussare le anche German sich die Hüften verrenken.

ilmagnàre , vrb: immagnare, immannare, immanniare, irmagnare, irmanniare, ismanniare Definition fàere a mannu, fàere mannu, prus mannu, fintzes errichire; nau de persona, fàere crèschere de carena e de conca, de giudítziu Synonyms e antonyms acrèschere, ammanniae, ammannire, immagnire, immannitare | ctr. ilminorigare, impiticai Sentences immagnendhe, su sèmene creschet dedioi ◊ mi at penadu tribbulendhe sa vida pro m'immannare in pannos de decoro (G.Branca)◊ deo apo immannadu a fizos mios ◊ cherfendhe totu a corpu ismanniare de manu tua bufas su velenu! (P.Sulis)◊ sos fizos candho irmànniant si cojubant ◊ sa famíllia est creschendhe e chin issa est irmanniandhe su bisonzu ◊ sa morte de su babbu lu fateit irmagnare prima de su tempus ◊ su tempus at imbetzadu a mamma ilmagnendhe a mie Etymon srd. Translations French grandir, mûrir English to grow Spanish crecer, madurar Italian créscere, ingrandire, espàndere, maturare German wachsen, vergrößern, erweitern, reifen.

ilmaladiàre , vrb: immabadiai, immalaidare, irmadaliare, irmaladiare, irmalaidare, irmalavidare, ismalaidare Definition orrúere malàidu, ingòllere maladia Synonyms e antonyms ammagagnare, ammaladiai, apuntorai, demare, inciacai, tunconire | ctr. sanai Sentences si est immalaidau de malària ◊ maigantas cosas podent fàghere immalaidare ◊ s'erba frita de ghidhighia podet irmadaliare sas crapas ◊ pro cuss'istrachiore si est irmalaidatu ◊ custu tempus a mufore irmalàidat sas binzas ◊ cust'ómine si immalaideit duas bias ◊ babbu si fiat immabadiau meda ◊ si est irmalavidadu mamale Etymon srd. Translations French tomber malade English to fall ill Spanish enfermar Italian ammalare German krank werden.

ilmanchinàre , vrb: immanchinare, ismanchinare Definition coment’e mancare, essire de su camminu giustu, andhare aorza, passare fora de su camminu, nau mescamente de animale; nau de un’arremu de sa carena, essire o mòvere de s’incàsciu suo Synonyms e antonyms cansai 1, irvertzare, stressiai / innoigai, irbesciai Sentences su cadhu at immanchinadu ◊ a chie est cun megus insolente lu lasso ismanchinare… pro no fàghere a ríere tanta zente Etymon srd. Translations French s'écarter du bon chemin, détourner English to deviate, to mislead Spanish desviar, dislocar Italian deviare, traviare German verführen, vom rechten Wege abbringen.

ilmarríre , vrb: irmarrire, ismarrire, smarriri Definition istasire de su fàdigu, de su istare male de nutrimentu o fintzes de maladias Synonyms e antonyms illangiare, indisichire, irromasire | ctr. abboniare, ammidudhare, ingrassai Sentences chentza pàsculu su bestiàmine si che irmarrit a prus de no dare frutu ◊ sa carena tua si ch'est ismarrida e imbeciada Etymon srd. Translations French dépérir English to waste away Spanish decaer, desgastarse Italian deperire German verfallen.