A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Incurtzaduras | Legenda Sìmbulos

modhèsa , nf Definitzione su èssere modhe Sinònimos e contràrios modhore, modhura / ternura | ctr. duresa, teteresa, tostore Frases delicadura e modhesa fint in nois e nos pariat totue cun su colore de s'atunzu Ètimu srd. Tradutziones Frantzesu douceur, tendresse Ingresu softness Ispagnolu blandura, suavidad, ternura Italianu morbidézza, tenerézza Tedescu Weichheit, Zartheit.

mòdhi mòdhe

modhía , nf Definitzione su èssere modhe, su si lassare atrotigare, indrúchere, nau de cosas e de gente; cosa modhe (pruschetotu is puntas modhes de is linnas, de su matedu) Sinònimos e contràrios modhore / modhímene Ètimu srd.

modhiàcu , agt Definitzione chi est modhe, modhe meda, nau mescamente de su naturale de ccn. chi no si arrempedhat mai Ètimu srd.

modhiànu modhànu

modhiàtu , agt Definitzione chi est modhe Sinònimos e contràrios modhanu, modhichinu | ctr. tostadu, tostichinu Frases su cumassu fit gai modhiatu chi pro no si apitzigare s'imbrortzinaiat in sa farina Ètimu srd.

modhichínu , agt Sinònimos e contràrios madhitzosu, modhanu, modhitzu | ctr. tostadu, tostichinu Ètimu srd.

modhíci, modhícia , nf, nm: modhissi, modhita, modhitza, modhitzi, modhítzia, mudhitzina Definitzione chessa mudhícia, genia de linna lenta (modhe) connota meda in Sardigna: faet a tupa e fintzes a matighedha, un'arraighina a cotzighina in su tretu prus in pitzu, corgiolu a parte de fora orrubiastu, frutu a pibionedhu pitichedhu aggurdonau e bonu po fàere ógiu Sinònimos e contràrios chessa, gessamodhícia, lentíschinu, ollestincu Frases pasches a landhe, ti cuntentas de ozastru e de modhita ◊ lassade chi cussu ramu muschet galu de lustínchinu e mudhitzina ◊ dhoi est sa modhici mascu e sa modhici fémina ◊ sa modhici est linna lenta ◊ sa lughe fut a lampadina cun ógiu de modhitzi ◊ po abbasciai su fogadoni de su sàngui si fait unu decotedhu de cima de lampatzu e coramedhu de modhítzia (Fr.Onnis)◊ Cucudedhu si dh'at incannugada e si cuat apabas de una moba de modhítzia Terminologia iscientìfica mt, Pistacia lentiscus Ètimu srd. Tradutziones Frantzesu lentisque Ingresu lentisk Ispagnolu lentisco Italianu lentisco Tedescu Mastixbaum, Mastixstrauch.

modhicòre , nm Definitzione su èssere modhe; nau de sentidu, su tènnere piedu Sinònimos e contràrios modhore / ternura 2. mi sont assénnitos sos modhicores de coro e tocat de àere passéntzia (A.Pau) Ètimu srd.

modhighína , nf: modhigina, modhixina, modhixini Definitzione pane modhe, una calidade de pane: pane piticu de mesu chilu o pagu de prus, fatu cun símbula solu, pruschetotu po is festas e isposòngios Sinònimos e contràrios madhitzosu Frases su pedidore cheriat una sisina e una modhighina ◊ custu merí sa Luna est unfrada coment'e una modhixina! ◊ apu fatu modhixinis biancas ◊ unu civraxu dhu tenis? O chinonca una bella modhixina de Sedhori! Terminologia iscientìfica pne Ètimu srd.

modhíghine , nm: mudhíghine Definitzione cosa modhe, fintzes linna noàdile, cambos noos Sinònimos e contràrios modhímine, modhore, mudhitza Ètimu ltn. *molligine(m).

modhigína modhighína

modhímene, modhímine , nm: mudhímini Definitzione cosa modhe, su èssere modhe de sa cosa, fintzes ossu modhe e mescamente su tretighedhu de mesu de cúcuru de is pipios, itl. fontanèlla; is puntas noas de matas e tupas / m. de origa = sa puntighedha de s'origra, su tretu modhe prus in bassu (itl. lòbo) Sinònimos e contràrios leina, modhesa, modhia, modhíghine, modhore, mudhitza / tinziu Frases dh'ant iscuta a su modhímene de conca e ch'est orruta morta Ètimu srd. Tradutziones Frantzesu tendron, cartilage Ingresu soft part, cartilage Ispagnolu cartílago, ternilla Italianu tenerume, cartilàgine Tedescu Weiche, Knorpel.

modhína , nf: moidhina, mudhina, mundhina Definitzione abbighedha chi proet lena a istidhighedhos piticos, o fintzes istídhigos matucos ma pagos Sinònimos e contràrios arrosina, chischixina, irmimisia, modhaca, modhura, papuschina, paspia, proischina, tzibina / cdh. muidhina Frases sa modhina paret unu lentore ◊ tota sa note at sighidu dae chelu a rúere selena una mudhina a butiu a butiu (G.Cherchi)◊ cale próidu? pagas modhinas at betadu! ◊ pustis de una note de modhina che esseit a chilcare monzeta Terminologia iscientìfica tpm Ètimu srd. Tradutziones Frantzesu bruine Ingresu sprinkling Ispagnolu llovizna Italianu spruzzàglia Tedescu Sprühregen, Nieselregen.

modhína 1 , nf Definitzione ossu modhe de is annoigadòrgios, inue is ossos faent giogu Sinònimos e contràrios dúrgalu Terminologia iscientìfica crn.

modhinàre , vrb: ammodhinae, mudhinare, mundhinare Definitzione cumenciare a pròere, fàere pagos istídhigos, pròere a fine, a istídhigos lascos, fintzes betare àteru a ispergiadura che istídhigos de abba Sinònimos e contràrios aciaviai, arrosinai, cibinare, isprinzulare, istedhiare, lentinare, mirmisiare, pispisinare, proighinai Frases custu manzanu at modhinadu 2. s'aera est modhinendhe piúere niedhu Ètimu ltn. *molliginare Tradutziones Frantzesu pleuviner, pleuvasser Ingresu to drizzle Ispagnolu lloviznar Italianu piovigginare Tedescu nieseln, sprühen.

modhinàu , pps, agt Definitzione de modhinare; chi est isciustu de modhina 2. su logu est modhinadu.

modhíncu , agt Definitzione chi est modhe modhe, cun abba meda Sinònimos e contràrios ledreledre, modhanu, modhatzu, modhecu | ctr. tostichinu 2. su linu abarrat tétiu, ma su cotoni est modhincu Ètimu srd. Tradutziones Frantzesu mollasse Ingresu softish Ispagnolu blanduzco Italianu mollìccio Tedescu schwammig.

módhine , agt Definitzione chi est modhe, nau de su pane modhighina o modhitzosu Sinònimos e contràrios modhe Ètimu srd.

modhinósu , agt Definitzione nau de su tempus, chi est o istat a su proe proe Sinònimos e contràrios modhocosu, pioinosu Frases su tempus est modhinosu Ètimu srd.