A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Abbreviazioni | Legenda Simboli

stracài , vrb: istracare*, stragai Definizione fàere a immarritzone, fàere sentire sa pelea de si pàrrere de no pòdere sighire a fàere cosa, de si dèpere pausare; fintzes orròschere, passare sa gana de fàere cosa / stragai una cosa = cossumire, imbetzare Sinonimi e contrari afadiai, cansai, fadiae, strachedhai | ctr. pasai Frasi su trabballu chi fait cussu stragat ◊ seus aici de nant'e orbesci, sempri insissiligandu e stragandusí 3. sa tzerga chi stragàt su tzeracu in s'annada dha pagàt su meri Traduzioni Francese épuiser Inglese to tire (out) Spagnolo cansar, agotar Italiano spossare Tedesco erschöpfen.

stracaméntu , nm Sinonimi e contrari cansàntzia, fiachesa, istrachidúdine, mugna, stracadura | ctr. pàsiu Etimo srd.

stracànu , nm Definizione pedhe de angione pili anedhau fata a cropete Terminologia scientifica bst.

stracasciàu , pps, agt: istracassau Definizione de stracasciai Sinonimi e contrari iscossiminzadu, scancarau, scarrabeciau, scarrugau 2. is matas funt càrrigas de frutu totu stracosciaras che féminas parturendi ◊ lah ca dèu fatzu meigama, seu totu stracosciau!

stracàsciu , nm: istracassu*, strecàsciu Definizione genia de taschedha: istúgiu tundhu e longu, de pedhe, fatu a bestire in codhos (po chistire is launedhas); nau de unu, piticu e légiu de carena, pagu crabbosu in su fàere: si narat fintzes in su sensu de mannu meda; fintzes cosa stracasciada, iscosciada Sinonimi e contrari carcassu, giarcassu Frasi si fut postu a isceberai is launedhas aintru de su stracàsciu prenu de tumbus, mancosas e viudas 2. fiat un'ómini coment'e is atrus… unu stracàsciu mannu, grussu, cun sa faci manna, mancu bellu Traduzioni Francese carquois Inglese quiver Spagnolo carcaj, aljaba Italiano turcasso, farètra Tedesco Köcher.

strachedhài , vrb Definizione istracare, immarrire meda Sinonimi e contrari afadiai, cansai, fadiae, istracare Etimo srd.

strachedhàu , agt Definizione chi est ledreledre, modhe meda, tropu cotu Sinonimi e contrari irfatu, modhincu Etimo srd.

strachédhu , nm Definizione nau de unu, chi est légiu de preséntzia e pagu de giudu Etimo srd.

strachèsa , nf: istrachesa* Definizione su èssere immarrios, immarritzone Sinonimi e contrari cansesa, fadiori, istrachidúghine, istrachidúmine, istrachiore, istracúmene.

strachiciólu , nm Definizione chígula, sa prus pitica de is sonàgias Sinonimi e contrari tringhitu, trinnedhu Terminologia scientifica snl.

strachimèngia , nf Definizione cambiamentu in méngius o acónciu malu a fàere.

strachímini , nm: istracúmene* Definizione su èssere immarrios Sinonimi e contrari cansesa, fadiori, istrachesa, istrachidúdine | ctr. pàsiu Frasi no mi sumbullit meda, gopai, ca no mi arreu in cambas de su strachímini! ◊ no potzu tirai is cambas de su strachímini.

stracía , nf: istrachia Definizione tempus malu meda, passada de bentu e abba forte o fintzes nie; fintzes dannu, dispraxere Sinonimi e contrari istrasura, trarchia* Frasi proit e sa stracia ammuinat in pratza e si atzàpulat asuba de sa fentana ◊ bentu mau e stracia ndi dhu pighit! 2. no apu acurtu mancu a dha basai, sa nennedha: ahi ita stracia de coru!

straciàda , nf: (stra-cia-da) Definizione su straciai; fintzes segada in su bestimentu Sinonimi e contrari iscorriolada, iscorrioladura, iscórriu Etimo srd.

straciài , vrb: (stra-ci-a-i) istraciai* Definizione pròere o fintzes niare a istrasura, a istrachia Frasi mi parit ca apu inténdiu mumudinu, o straciendi est? ◊ cumenti fut fatuvatu straciendu no mi at nau s'idea de mi movi, ariseu.

straciài , vrb: (stra-cia-i) istratzare* Definizione tirare forte a cropu (fintzes po ndhe iscabbúllere cosa a chie dha portat o no dha bolet lassare), pigare a fortza, a segadura, a iscórriu Sinonimi e contrari afrapare, illatzare, iscrúfere, iscúrpere, isfrapare, stiritzai.

straciaràna , nm: istrociarranas*, strociarrana Definizione aina po sonare in chida santa: est una genia de matraca fata cun tres tauledhas chi faent sonu iscudendhosi apare, o est fata de canna (rana de canna) Sinonimi e contrari cianciarra, forriarjola, furriola, scociarrana, tzacaredha, tzirriajolu Frasi is dentis mi tzichírriant in buca cument'e unu strociarrana ◊ gei dh'apu disigiadedhu a tenni su strociarrana!… Terminologia scientifica sjl Traduzioni Francese crécelle Inglese rattle Spagnolo carraca Italiano raganèlla, crepitàcolo Tedesco Knarre.

straciósu , agt: (stra-ci-o-su) Definizione nau de tempus, chi est malu, chi faet a istrachia, stracias Frasi friaxu est mesi friru e straciosu (S.Diana) Etimo srd.

stràciu , nm: istraciu*, stràciulu Definizione bículu o coígiu de orrobba, fintzes bestimentu béciu, chi si ponet po frobbire, samunare, betare tzàpulos e àteru.

straciulài , vrb: istratzolare* Definizione segare s'orrobba, su bestimentu a iscórriu, a tiradura Sinonimi e contrari ischirriolai, iscorriai Frasi segandedha tui sa cresuri, ca cudhus dha straciulant! ◊ segandi su gurdoni a ferrus, no dhu straciulist!