A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Incurtzaduras | Legenda Sìmbulos

isciontàre iscontàre

isciopài, isciopàre , vrb: iscopiai 1, iscopiare, issopare, ixopare, sciopai Definitzione su si apèrrere a crepadura, a tzàcurru, po sa fortza chi ispinghet de sa parte de aintru, o fintzes po pesu meda de fora; su si pesare o pònnere a s'ingrundha a nàrrere, cumenciare calecuna cosa de forte o grave totinduna / isciopa! = foedha! (nau cun tzacu) Sinònimos e contràrios cherpai, ciopai, scuartarai Frases gei nau ca funt isciopendusí, in cussa bidha: gei ses un'isparatoriedhu!…◊ no cabet su coro in sa càscia e si no làgrimo isciopat ◊ s'ambesue daghi si atatat meda ixopat ◊ arresètadi, gai no iscópias che sa buscica de su porcu! ◊ una granata dhi fut iscopiada a pagu tretu e dh'iat pesau a bolai ◊ mi apo issopau unu fruschedhu cun s'agu (P.La Croce) 2. gasi isciopesit pro tantu penare isfoghendhe in piantos e lamentos ◊ si trínnigat, no podet faedhare, poi isciopat in risu tristu e feu ◊ in cussu prammu de terrinu fit iscopiada sa gherra ◊ cudhas si sunt pilisadas chi pariat iscopiandhe su locu Ètimu itl. schioppare Tradutziones Frantzesu éclater, crever Ingresu to explode, to crack Ispagnolu reventar Italianu scoppiare, crepare, esplòdere Tedescu bersten.

iscioperadòre, iscioperadòri , nm: issoperadore Definitzione chie isciòperat, est faendho isciòpero Sinònimos e contràrios issoperante Frases is iscioperadoris ant fatu firmai is minadoris e is cerridoras (F.Perella) Ètimu srd. Tradutziones Frantzesu gréviste Ingresu striker Ispagnolu huelguista Italianu scioperante Tedescu Streikende.

iscioperài, iscioperàre , vrb Definitzione firmare su trebballu (mescamente dipendhente), prus che àteru coment'e protesta po calecuna chistione.

isciòpero , nm: isciòpiru, issòpero Definitzione genia de protesta chi si faet abbarrandho unu tanti de oras o fintzes dies chentza trebballare, o fintzes de àtera manera, nau pruschetotu de dipendhentes Sinònimos e contràrios iscioperonzu / ttrs. isciòparu Frases su trenu arribbat a is tres, isperendi chi no ci siat isciòpiru Tradutziones Frantzesu grève Ingresu strike Ispagnolu huelga Italianu sciòpero Tedescu Streik.

iscioperónzu , nm Definitzione su iscioperare, su istare iscioperandho Sinònimos e contràrios isciòparu Ètimu srd. Tradutziones Frantzesu action de faire grève (la) Ingresu on strike Ispagnolu el hacer huelga Italianu scioperìo Tedescu Streiken.

isciopète isciapète

isciópidu , nm Definitzione tzàcurru forte, fintzes de isparu Sinònimos e contràrios ilbómbiu, iscópiu, tzocu Frases sa matraca si girat de botu faendho dus isciópidus ◊ s'intendhet isciópidus fortes coment'e tronàcius atesu Ètimu srd. Tradutziones Frantzesu détonation Ingresu detonation Ispagnolu detonación, estampido Italianu detonazióne Tedescu Knall.

isciòpiru isciòpero

isciópu , nm Definitzione su isciopare Ètimu srd.

isciorài , vrb: sciorai Definitzione fàere iscioru, braga, giare a bíere sa cosa, bantandhosi Sinònimos e contràrios abantai, bagianai, isfartzare Frases no po isciorai, ma est méritu miu puru! Ètimu itl. sciorare Tradutziones Frantzesu arborer, étaler Ingresu to flaunt Ispagnolu hacer gala, presumir Italianu sfoggiare Tedescu prunken mit.

isciorbedhàu ischerbedhàdu

iscioriàre , vrb Sinònimos e contràrios assucare, igiucare, iscioriare, isciucare, sciampuinai Frases candho andhaiat a iscioriare sos pannos a sos rios cun cumpagnas, sas sonnionas badhes e montagnas murmutendhe soliat ischidare (B.Truddaju)◊ tratat cussu lavamanu pro donzi bisonzu, ma no est sempre chi l'iscióriat!

isciòro insòro

iscioródhiu, iscioródhu , nm: scioródhiu Definitzione cosa chi narat unu chi no est arrexonandho bene, chi est pagu giustu de crebedhu, chi no est atinandho Sinònimos e contràrios dellíriu, ischíssiu, varione Ètimu srd. Tradutziones Frantzesu radotage Ingresu delirium Ispagnolu delirio, desvarío Italianu farnètico Tedescu Irrsinn.

isciorrài , vrb: sciorrai Sinònimos e contràrios irfurrare* | ctr. iforrare.

isciorrocài isciarrocài

isciorrócu isciarrócu

isciorrógu , nm Definitzione isforrogu, corrovu (fintzes in su sensu de su chi s'animale papat forrogandho) Frases is pegus de procu dhus tengiaiaus a passiu e campànt a làndiri, ollestincu e a isciorrogu.

iscióru , nm: scioru Definitzione su isciorai Sinònimos e contràrios pompa Frases no po iscioru, ma femu apretziau de totu sa natzioni! ◊ fiat narendi, cun iscioru, ca fiat impiegau e bèni istipendiau Ètimu srd. Tradutziones Frantzesu faste, ostentation Ingresu pomp, ostentation Ispagnolu ostentación, pompa Italianu fasto, ostentazióne Tedescu Prunk, Schaustellung.