A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Incurtzaduras | Legenda Sìmbulos

noantàmas , cng: nointamas, nointames, nointàmene, nontamus, notammis Definitzione (cng. cuncessiva) genia de foedhu chi giaet un'idea de cosa contrària: cun totu cussu…, no solu de…, no solu no…; po giare prus fortza a su chi si narat, s'impreat coment'e po repitire unu foedhu / noantamas de... antzis = no de..., no solu… antzis, fintzas Sinònimos e contràrios tamen*, mancumale, prusaprestu / cdh. nointamu Frases nointamas sas cosas sunt andhadas a su revessu (G.Ruju)◊ si est cugudhadu in cara che batia frisca, nointamas l'ant connotu ◊ no apo mai crétidu in cussos contos, nointamas in su pessamentu mi prammizaia totu sas naravellas intesas dai sos mannos 2. nointamas at faedhadu male de me, ma de tota s'eréntzia ◊ nointames de sere a cadhu a sa nuda, no rezo mancu in sedha! ◊ nointamen de mi frimmare, devia andhare piús lestru ◊ notammis a no torrare a nàrrere nudha, ma fut issu etotu a andhare in agiudu a chie ndhe teniat bisóngiu 3. no solis ant bidu sa pupa de s'ómine, ma l'ant finas connotu, nointamas! Tradutziones Frantzesu cependant, malgré, néanmoins Ingresu in spite of, however Ispagnolu sin embargo, a pesar de Italianu tuttavìa, nonostante, nondiméno Tedescu auch wenn, obwohl, trotzdem.

nòba nòa

nobàdile noàdile

nobàle noàle

nobànta , agt, nm: nonanta, noranta Definitzione su tanti de noe bortas deghe (in números àrabbos 90, in números romanos XC) Frases cumpridu at deris nonanta ses annos però gràscias a Deu ancora est forte ◊ po noranta ses annos chi tenet est de bonu sensu!◊ tziu Antiogu s'est mortu candho at crómpiu noranta duos annos 2. su noranta semus bénnidos a istare a inoghe ◊ babbai at lómpidu sos naranta Ètimu ltn. nonaginta Tradutziones Frantzesu quatre-vingt-dix Ingresu ninety Ispagnolu noventa Italianu novanta Tedescu neunzig.

nobantésimu , agt Definitzione cussu de noranta.

nobantína , nf Definitzione unu tanti a giru de noranta, ccn. de prus, ccn. de mancu Ètimu itl. Tradutziones Frantzesu à peu près quatre-vingt-dix Ingresu about ninety Ispagnolu unos noventa Italianu novantina Tedescu etwa neunzig.

nóbbile , agt, nm: nóbbili, núbbile Definitzione nau de cosa e pruschetotu de sentidu e manera de fàere o de fata, chi est de grandhe valore, de arrespetare meda po su chi tenet de giustu, de bonu e de bellu; nau de gente, chi o chie aparteniat a famíglia potente, chi cumandhàt / conca nóbbile = in cobertantza, conca mesu maca, pessone irzudissiada Sinònimos e contràrios pretziadu, valoradu Frases est núbbile sa vida e su rispetu (A.Marceddu) 2. is nóbbilis sardus teniant su "don"◊ su nóbbile marchesu Franchiscu Urru fut connotu cun su paralúmene de Múrtinu Mannu Tradutziones Frantzesu noble Ingresu noble (man) Ispagnolu noble Italianu nòbile Tedescu adlig, edel, Adlige.

nobbilèsa , nf: nubbilesa Definitzione su èssere nóbbile; is nóbbiles Frases su truncu chi l'aiat generadu teniat nobbilesa a fundhamentu 2. nerimí, tot'is piciochedhus de sa nobbilesa faint iscola de cantu? Tradutziones Frantzesu noblesse Ingresu nobility Ispagnolu nobleza Italianu nobiltà Tedescu Adel.

nóbbili nóbbile

nobbilía , nf, nm: nobbiliu Definitzione is nóbbiles Frases irrocat a sa nobbilia ca at torrau a sant'Andria dae mere a pedidore ◊ a cumandhare cumandhavant cussizeris e nobbilia, chi fint sa matessi zente Ètimu srd.

nobbilitài, nobbilitàre , vrb Definitzione essire o fàere nóbbile, giare nobbilesa.

nobbilíu nobbilía

nòbe , agt, nm: noe, noi, nove Definitzione su númeru intremesu de oto e deghe, s'unidade contada una borta de mancu de is pódhighes de is duas manos pigaos impare (in números àrabbos 9, in números romanos IX); nau a solu cun art. pl. e fatu a nf., oràriu, is noe oras Frases in cussa famíllia fint noe frades ◊ semus andhados in noe a fàghere sa faina ◊ aundi funt is atrus noi? ◊ sa mama istat nove meses cun su fizu in sinu aspetandhe a naschire 2. che sunt sas noe de sero ◊ a is noi oras de mengianu fut torrau a sa pratza Ètimu ltn. novem Tradutziones Frantzesu neuf Ingresu nine Ispagnolu nueve Italianu nòve Tedescu neun

nobédhu , agt, nm: noedhu, noellu, novedhu, nubedhu, nuedhu Definitzione chi est nou, essiu de pagu o fatu a nou; vitellu de unu a tres o bàtoro annos Sinònimos e contràrios noale, noàdile, nobu 1, noiciolu, núvulu | ctr. béciu Maneras de nàrrere csn: bíngia noedha = pàstinu, binza bogada a nou, pastinada de pagos annos; is noedhus (faedhendhe de pische) = muscionalla, pischighedhu de naschidorzu Frases fiat sempri prontu a narri fuedhus pitziosus a is bagadias e a is isposas nuedhas ◊ peri pro custu sufrides sa pena de chie una domo at fabbricadu e dae noedha sorte cumandhadu la lassat pro andhare a terr'anzena (A.Casula)◊ custa bíngia portat sempri frutu meda ca est noedha 2. a s'arvorinu, candho si nch'est ischidadu, bi mancaiat una cropa de noedhos ◊ nuedhos rudes in tanca ndhe apas unu milione! Ètimu ltn . novellus Tradutziones Frantzesu nouveau Ingresu spring Ispagnolu recién hecho, novillo Italianu novèllo Tedescu neu, jung, frisch.

nobèna , nf: nobina, noena, noina, novena, nughina, nuina, nuvina Definitzione pregadoria chi si faet noe dies aifatu de pare po devotzione a unu santu, a Nostra Segnora, po Paschighedha; pregadoria longa, su istare a su prega prega a ccn. chi no bolet intèndhere, chistione longa / èssere/istare in su mundhu una nobena = pagas dies Sinònimos e contràrios precadoria Frases sos mannos nostros faghiant nuinas pro bídere sa fine de sa sicagna ◊ fàghere depo noina a calchi santu chi acanse su disizu de ti mirare 2. za bi ndhe cheret de nuinas pro ti fagher mòere!…◊ custa novina, tandho, paret prus longa de su chi crediamus totus finas a oe! 3. in custu mundhu bi semus una nobena e no zusta! Ètimu itl. Tradutziones Frantzesu neuvaine Ingresu novena Ispagnolu novena Italianu novèna Tedescu Novene.

nobenànte , nm: noinante, novenante, nughinante, nuinante Definitzione chie andhat a nuinare, a is festas Sinònimos e contràrios noineri Frases che fiant sas nuinantes andhàntiles, chi andhànt, faiant sa funtzione e si che torrànt Ètimu srd.

nobenàre , vrb: nobinare, noinare, nughinare, nuinare Definitzione fàere is nuinas; istare a su prega prega aifatu de ccn. de malintesa, chi no bolet iscurtare Ètimu srd. Tradutziones Frantzesu faire une neuvaine Ingresu to pray novenas Ispagnolu hacer novenas Italianu fare le novène Tedescu die Novene beten.

nobenaría , nf: novenaria Definitzione su nuinare, su istare nuinandho Sinònimos e contràrios nuinonzu Ètimu srd.

nobergàles , nm pl Definitzione noe reales, bíndhighi centésimos de unu francu sardu Frases est zubilandhe chi no bazo nobergales ◊ corjolu de arantzu ndh'apo comporau nobergales ◊ su late si bendhiat a nobergales su litru Ètimu srd.