A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Abbreviazioni | Legenda Simboli

incarnàdu , pps, agt: incarnau Definizione de incarnare Sinonimi e contrari incragnadu 2. zughet un'ungra incarnada in d-unu pódhighe de su pè chi lu faghet dilliriare!

incarnài, incarnàre , vrb: incarrare Definizione intrare o fichire in mesu de sa carre, nau prus che àteru de cosa chi creschet; torrare a crèschere sa carre; fàere a carre, pigare carres Sinonimi e contrari incarnie Frasi sos ogros tuos mi ant fatu efetu e s'amore in coro est incarnadu ◊ est gai bella chi paret una dea incarnada ◊ a isse si li incarnant sas ungras ca las zughet totu dortas e allachedhadas 3. su Cristos si est incarnadu in su sinu de sa Vírzine Maria Etimo itl. Traduzioni Francese s'incarner Inglese to grow in, to thrust into the flesh Spagnolo encarnarse Italiano incarnire, incarnare Tedesco ins Fleisch eindringen lassen.

incarnatziòne, incarnatziòni , nf Definizione su s'incarnare, nau de sa divinidade de Cristos chi si est fata a corpus umanu in is intragnas de Maria.

incarnàu incarnàdu

incarníe, incarníre , vrb: incarrire, incarriri Definizione intrare in sa carre, pigare carres / incarrire sas peràulas = nàrriri is fuedhus bèni crarus a manera chi s'àteru si dhus pongat bèni in conca Sinonimi e contrari incarnai Frasi s'ispíritu umanu est destinadu a s'incarrire in corpos diferentes apenas chi su sou apat lassadu (S.Casu) Etimo srd.

incarrabàu , agt Definizione coment'e carrapau? incarrebau? Modi di dire csn: incarrabau ses!… = gei ses a frori!…, za ses acontzu!…, istas male abberu!

incarradàda , nf Definizione its, bisura? incarrerada? Frasi tanti portaus incarradada bella!…

incarragiàre, incarralzàre , vrb: incarrarzare Definizione carragiare betandho o ponendho cosa apitzu (o fintzes ponendho bestimentu) Sinonimi e contrari acarragiai, acuguzare, assacarrare | ctr. iscarrarzare 2. de is de domo no si ndhe at bistu incarragiaos in mantu tristu! Etimo srd.

incarràlzu , nm: incarrazu Definizione su incarralzare; trastos po ammontare Sinonimi e contrari acavannu, ammantadroxu, assacarru, coguzu, cubutóngiu, cucutzura, cuzicadura, cuzicura Frasi sa pasta cariada si ammuntat cun s'incarrazu po fàghere una bona pesadura ◊ tenzo custas fàunas de incarrazu Etimo srd.

incarramacinài , vrb Definizione betare a s'afaiu trastos bècios o arrimaos, impreare su logu cun carramatzinas Sinonimi e contrari imbarratzare Etimo srd. Traduzioni Francese encombrer de fanfreluches Inglese to hamper with trifles Spagnolo llenar un lugar de baratijas Italiano ingombrare di cianfrusàglie Tedesco mit Krams überfüllen.

incarràre incarnài

incarrarzàre incarralzàre

incarrazàre , vrb Definizione iscúdere o andhare cun fuliesa a subra de s'àteru o de calecuna cosa; carragiare puru Sinonimi e contrari assaltizare, carrabbusai, imbestire, ruciare / incarralzare Frasi cun sos cadhos sunt faghinne atintzione pro no incarrazare a nemos colanne in sas carrelas ◊ po sorte no at passadu màchina, sinono dh'iat incarrazadu! Etimo srd. Traduzioni Francese heurter, tamponner Inglese to run into Spagnolo atropellar Italiano investire Tedesco anfahren.

incarràzu incarràlzu

incarrebài, incarredài, incarrelài, incarrelàre , vrb: incarrerai Definizione cumenciare calecuna cosa, aprontare una faina, cumenciare a andhare, pigare s'orruga o su camminu po andhare a logu, ghiare o fàere andhare a una filada fintzes in su sensu de giare annestru, imparu, currègere su cumportamentu; pònnere a filera Sinonimi e contrari abbiare 1, abiai, comentzari, coviare 1, imbrocare, impostai, incaminare, irvinghinzare, temperare, tocai 1 | ctr. iscaminai Modi di dire csn: i. una faina, una festa = comintzare una faina, una festa; èssiri piciochedhu incarrerau = piciocu mannu; incarrerai a ccn. = dàreli annestru, briga, fàgherelu andhare o èssere adderetu, fintzas catzarechelu; su tempus est incarrerendu = est benindhe, est bénnida s'ora, s'est faghindhe tardu, ch'est colendhe; incarrebendi a… (una tzerta ora, tempus) = faci a… a oras de…; incarrelàresi bi'e… = comintzare a tucare a sa bandha de…, incarrerai a andai a…; portai sa brenti incarrerendu = creschindhe, ingrassendhe; no incarrerist! = no comintzes, no torres a comintzare (a chircare chistiones, murrunzare, e gai) Frasi ias giai serrau is ogus po t'incarredai citiu faci a su soli…◊ a passu a passu si est incarrerau faci a domu ◊ andeus a biri no siat incarrerendu a innòi ◊ in monti incarreramu su bestiàmini e dèu mi setzemu a ligi ◊ est incarrebau totu a passu de portanti ◊ piciochedha de doxi annus drommit in su letu de sa mama… gei mi dh'emu incarrerada! ◊ apu incarrebau in su mori de monti po ti atobiai ◊ incarrelamus a cara a s'oriente 2. s'ischiliai de unu muntoni de genti chi dhoi fiat benia iat incarrerau s'intrada de su palàtziu, is iscaberas, ascensoris, ufícius 3. si seus cravaus apari e eus incarrerau a si basai ◊ de sa dí mammai at incarrerau a tenni pensamentus ◊ at incarrerau a tocai su tratori totu timi timi ◊ duas diis dhui funt… istau ca est incarrebendi cuatru mesis! ◊ cumentzai a si codromingiai ca s'ora est incarrebendi! ◊ sa cummédia incarrerat immoi ◊ incarrerat a proi… e at fatu una strossa 4. prus incarrerat s'edadi e prus benint is maladias ◊ tzia Vitória est incarrerendi a is cent'annus ◊ est incarrerendi s’ora de prandi Etimo ctl. encarrerar Traduzioni Francese acheminer, s'acheminer Inglese to route Spagnolo arrancar, encaminar Italiano instradare, avviarsi Tedesco sich auf den Weg begeben.

incarreràda , nf Definizione su incarrerare, nau fintzes in su sensu de curretzione, imparu, briga, ammonestu / gei portaus incarrerada bella!… = andhandho male seus! Frasi portadhi sa manera a pobidhu tuu, assinuncas ti arroscit e ti donat una bella incarrerada! (M.A.Cappai) Etimo srd.

incarrerài incarrebài

incarreraméntu , nm Definizione su incarrerare o cumenciare fintzes una faina, una chistione Sinonimi e contrari comintzu, incamminamentu Etimo srd. Traduzioni Francese mise en train, orientation Inglese start Spagnolo arranque, guía Italiano avviaménto, indirizzo Tedesco Anbahnung.

incarréru , nm Definizione su incarrerare Sinonimi e contrari comintzu, incarreramentu Etimo srd.

incarrída , nf Definizione su incarrire, su che intrare in mesu de sa carre / un'i. de peràulas, de averténtzias = avertimentos Sinonimi e contrari incarridura Etimo srd.