A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Abbreviazioni | Legenda Simboli

ganghèdha , nf Definizione afidura, istrinta a su gúturu fata cun ambaduas is manos / pònnere sa (finas sas) ganghedha a unu = istrínghere in su gúturu po dh'allupare Sinonimi e contrari atzavoga, caspa, gangalita, puligada, tzoga 1 Frasi si sunt gherrados e si fint ponzendhe sa ganghedha paribari.

ganghilédhu , nm Definizione genia de arretza coment’e sacu, po piscare Sinonimi e contrari arraciallu, arretza, filau, óbiga Etimo ctl. gánguil Traduzioni Francese guideau (pêche) Inglese kind of fishing net Spagnolo red para pescar Italiano àngamo Tedesco eine Art Reuse.

gangòrra , nf Definizione genia de pigione mannu chi faet in logos de benatzu (istagnu, lagu, girí), dormit e faet su nidu in s'abba: est pigione chi in Sardigna nidat puru e faet is pudhighinos a ispertiadas biancas e niedhas (a mannos su colore est de totunu andhare, iscurosu a parte de palas); si narat fintzes de àteras arratzas de pigiones prus mannos, de mare (colymbus immer, arcticus, c. stellatus) Sinonimi e contrari malgone Terminologia scientifica pzn, podiceps cristatus Etimo srdn. Traduzioni Francese grèbe (zool.), plongeon Inglese loon Spagnolo somormujo lavanco Italiano svasso maggióre, stròlaga Tedesco Haubentaucher.

gangorrèdha , nf Definizione genia de pigione Sinonimi e contrari catzolu, coaciolu Terminologia scientifica pzn.

gangósu , agt Definizione nau de ccn., chi portat gangas, trempas grassas Sinonimi e contrari trempedhudu.

gangrèna , nf: cangrena*, granghena Definizione male mandhigadore, candho sa carre bia si guastat e morit de infetu Frasi su bratzu chimentau a balla li fit fachendhe granghena, chentza curau Terminologia scientifica mld.

gàngu gànga

gàngula , nf Sinonimi e contrari ganga Frasi si ti ponzo manos in gàngulas t'uchio!

gangúle , nm Definizione su pannenanti o pannixedhu de is boes e bacas, sa pedhe chi portant asuta de su tzugu pendhe pendhe (de longu) Sinonimi e contrari arràndula, gangale Terminologia scientifica crn Etimo srd. Traduzioni Francese fanon de taureau Inglese dewlap Spagnolo cadena Italiano giogàia, pagliolàia Tedesco Wamme.

gangulíta, gangullíta gangalíta

gangulústas gangalústas

ganía , nf Definizione gana manna, disígiu meda, prus che àteru de genia sessuale Sinonimi e contrari gana / insoadura Frasi sa gania disizosa de su càntigu e s'irbadhinamentu de sa cursa che li fint pigados a conca ◊ a dommo de sa gania ch'est andhau su fàmmene… Etimo srd. Traduzioni Francese grand plaisir sexuel Inglese intense lust Spagnolo libídine, lujuria Italiano intènso desidèrio sessuale Tedesco Geilheit, Begierde.

ganíle , nm Definizione fàmene, gana manna de papare Sinonimi e contrari fàmene, gana Frasi nessune travagliaiat pro produire mànnicu, ma metas fint apretatos dae su ganile (A.Pau)◊ su ganile non mi dat pasu Etimo srd.

gannaròtza , nf: cannarotza* Definizione sa canna de su gúturu Sinonimi e contrari bula, gúturu Frasi crachissinci su didu in buca fintzas a sa gannarotza, ca gei dhi fait efetu! Terminologia scientifica crn Traduzioni Francese gorge, gosier Inglese windpipe Spagnolo garganta Italiano gorgòzzo Tedesco Speiseröhre.

gànnas , nf Definizione nau prus che àteru pl., totu is cannas de su gúturu / cumprendherebichela in g., a ccn. = cumprèndhere a ue cheret assuprire, ite bolet, ite bolet nàrrere chentza chi mancu acabbet de s'ispiegare, fintzes solu po calecunu foedhu chi at nau Sinonimi e contrari gannighina Frasi l'at bínchidu passèndheli sa rasorza in gannas 2. cussa pisedha ti che at cumpresu in gannas totu sas fàulas chi ancora as de nàrrere!(S.Saba)◊ custa faghiat unu muntone de dispetos, pariat chi ti che la cumprendhiat in gannas sa cosa, e piús timias e piús ti ndhe faghiat Terminologia scientifica crn.

gannèdha , nf: cannedha* Definizione ossu a cannedhu (de sa serra de sa camba) Sinonimi e contrari cambedha, tílviu, tínchinu Frasi su latzu dh'intràt in gannedhas, cassau a cambas.

gànnida , nf: gànnita Definizione genia de apédhidu airadu chi faent is canes candho funt currendho sa fera; nau de gente, boghes de dolore forte Sinonimi e contrari agiannitu, giànnida Frasi sos posteris sont avisatos dae sas gànnitas de sos canes apenas chi pesant a sirvone Terminologia scientifica bga Etimo srd.

gànnidu , nm: gannitu Definizione genia de apedhóngiu chi faent is canes cracandho sa fera Sinonimi e contrari ganninzu, túnchiu Frasi ch'essit su sirvone ispaventau e comintzant sos canes a gannitos Terminologia scientifica bga Etimo srd.

gannidúra , nf Definizione su gannire de su cane, su istare gannindhe Sinonimi e contrari gànnidu, túnchiu Etimo srd. Traduzioni Francese gémissement, glapissement Inglese whining, howling Spagnolo gañido Italiano mugolaménto Tedesco Winseln.

gannighína , nf: cannighina* Definizione nau prus che àteru pl., totu is cannas de su gúturu (ingurtidórgiu, canna de is prumones, venas e artérias); fintzes gúturu, su tretu de ananti in su tzugu, fora / leare a gannighinas = pònnere s'atzavoga, istrínghere su gúturu cun ambaduas manos, fàere allupare Sinonimi e contrari ganga, ganna, neba Frasi unu ciopu biancu at cunzau sa gannighina a unu poete nighedhu 2. s'orcu, ponindhe sa manu in gannighinas, afogaiat sos chi aiant bidu su sidhadu Terminologia scientifica crn.