A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Abbreviazioni | Legenda Simboli

pichetài, pichetàri , vrb Definizione fàere sa pichetada, prus che àteru papare a meda, genia de festa, in cumpangia Sinonimi e contrari arrebbotare, sbirrendai, sciaballabatai Frasi tristu chi no podit pichetai, càstiat su pratu e lingit sa frochita ◊ andai a pichetai cun is amigus fut sinnu de libbertadi po is giòvunus Etimo spn. picotear Traduzioni Francese banqueter Inglese to banquet Spagnolo banquetear Italiano banchettare Tedesco an einem Bankett teilnehmen, schmausen.

pichète , nm Definizione puntedhu piticu a punta chi si fichit in su puntu ue si depet prantare sa bide, o fintzes po singiale pigandho misuras in terra; in cobertantza, fintzes frastimu Sinonimi e contrari cràdiu, fichete / frastima Etimo spn. piquete Traduzioni Francese piquet Inglese peg Spagnolo estaca Italiano picchétto Tedesco Pflock.

pichetéri , agt Definizione chi dhi praghet a pichetai, a rebbotare Sinonimi e contrari birranderi, rebboteri, sciaballabateri, todoneri Etimo srd.

pichetóngiu , nm Definizione su pichetai, su istare faendho pichetadas, de una pichetada a s'àtera Frasi po istasiri unu pagu tocat assumancus a menguari su pichetóngiu! Etimo srd.

pichetósu , agt, nm Definizione chi o chie costumat a fàere pichetus, dispetos Sinonimi e contrari crepuru, puntigliosu, strempiadori, strempiosu Terminologia scientifica ntl Etimo srd.

pichètu , nm Sinonimi e contrari brulla, dibbetu, trémpiu Etimo spn. piquete.

pichètu 1 , nm Definizione cambarada de sordaos, prus che àteru cudhos chi assentaos a iscuadra presentant s'arma o acumpàngiant a ccn. po dhi fàere onore Etimo itl. Traduzioni Francese piquet Inglese picket Spagnolo piquete, guardia Italiano picchétto Tedesco Trupp.

pichètu 2 , nm: pichiete Definizione su pichetai, ma fintzes acirrada de cosa bufandho / èssiri de p. = rebbotendhe Sinonimi e contrari pichetada Etimo srd.

pichiàda , nf: pichiara Definizione genia de cropu, nau in su sensu de prova, fata de balentia, fintzes sonandho; sonada, nau fintzes in su sensu de sonadura, manera de sonare Sinonimi e contrari sonada Modi di dire csn: in d-una p. de ogus = in d-unu sinnu; cumprèndhere sa p. = cumprèndhere s'antífona Frasi est istétia una fortuna po mei a connosci una língua chi ti permitit sa pichiara vera 2. sa maista at cuncodrau una pichiadedha cun sa piciocalla ◊ pighit is launedhas e si fatzat intendi una pichiadedha! ◊ su sonadori sonat imbriagu, ma no fadhit una pichiada ◊ is balladores ant cumenciau a sa séria, sighindo sa pichiada de su sonadore.

pichiadórzu , nm Definizione genia de lóriga grussa in portales e gennas de cropare pedindho de intrare a una domo Sinonimi e contrari pícula Frasi si che fuit atacadu a su pichiadorzu fintzas a candho no aiat apertu Etimo srd.

pichiadròxa , nf Definizione torrai a sa p. = e drínghili!, torrare a su chi si boliat, sèmpere a su matessi puntu o chistione chi interessat Frasi eh, fustei torrat sempri a sa pichiadroxa! Etimo srd.

pichiagiólu , nm Definizione orrugu de ossu, de ferru o àteru chi si ponet apicau aintru de is sonàgias po dhas fàere sonare Sinonimi e contrari antarzu, limbassa, limbedha, trantallu Etimo srd.

pichiàra pichiàda

pichiàre picàre 2

pichibíchi , avb Definizione èssiri a su p. = istare tastandho sa cosa de papare, a su tasta tasta, segare e papare calecunu orrughedhu chentza si cicire a mesa (podet èssere fintzes ca est cosa chi no praghet, po crisu), nau fintzes in su sensu de istare faendho cosighedhas, de una cosa a s'àtera Etimo srd.

pichícu , agt, prn: biticu, picicu, piticu, pitiu, pitzicu Definizione chi (o unu chi) tenet pagu mannària: nau cun ironia, su foedhu podet bòllere nàrrere mannu, meda, ma fintzes própriu minore, antzis minore meda, nudha puru, fintzes segundhu ite si iat a bòllere (es.: piticu su fàmini!… = meda (nau de unu chi giai si biet ca tenet fàmene); piticu su prexu!… = pagu, própriu nudha (nau de unu chi giai si biet chi no est prexau)/ min. piticadhedhu, pitichedhedhu, pitierredhedhu, pitiedhedhu, pitiridhedhu, pitirrinchinu; famíllia pitia = cun totu is fígios minores Sinonimi e contrari minore, minudu, picocu, pistirincu, pistiringhinu | ctr. mannu Frasi s'ierru fait is dis tanti pitias chi apena orbésciu bis iscurigai ◊ est piticadhedhu aditzu si bit! ◊ su fuedhai meda fait sa dí pitia 2. at donau su bistiri a sa manna, sa rosa a sa pitica ◊ mellus a morri a pitiu po no sufriri a mannu tanti pena ◊ andat bèni po mannus e pitius 3. piticu s'arrogu de casu chi si at segau… agiummai no mi ndi lassat! Cognomi e Proverbi smb: Pitiu, Pittiu / prb: mellus chi pràngiant is piticus chi no is mannus Etimo srd. Traduzioni Francese petit, moins grand, moindre Inglese small Spagnolo pequeño Italiano pìccolo, minóre Tedesco klein.

píchidu , agt: pícidu, pídicu, pídigu, píghidu, pígidu, píjidu, píxidu Definizione niedhu che pighe, niedhu meda, bene, parívile, e fintzes lúghidu (e po cussu a bortas nau cun significau de bonu, imbénnidu, cotu, nau de colore càrrigu)/ niedhu píghidu (nau de unu po su tzacu) = arrennegau meda Sinonimi e contrari pighidosu, píghinu, pigorinu Frasi tota píghida est s'aera ◊ sa cusséntzia nostra càmbiat a s'imbesse: prus est píchida e prus sos pilos sunt biancos ◊ nues píghidas ant iscorvuladu bírridos de abba ◊ sont cambiandhe intinu cudhos píghidos pilos issipios 2. comente at próidu, sas àrbures zughent sa foza bella píghida Etimo ltn. *picidus Traduzioni Francese noir comme de la poix Inglese piceus Spagnolo píceo Italiano pìceo Tedesco pechig.

pichiédhu , nm Definizione min. de píchiu, cropighedhu a tochedhadura.

pichiète pichètu 2

pichifàtu , nm Definizione picu in fatu, avatu = trebballu (e chie dhu faet puru) po pistare a marrone is leas de sa terra arada Sinonimi e contrari marrinfatu, tzapifatu Terminologia scientifica mssr.