A | B | C | D | E | F | G | H | I | J | L | M | N | O | P | R | S | T | TZ | U | V | X | Z
Legenda Incurtzaduras | Legenda Sìmbulos

girài , vrb: girare, girari, zirai Definitzione andhare peri su logu, istare in giru, abbaidare a un'àtera bandha, furriare de parte una cosa, andhandho fàere unu movimentu tundhu coment’e cricu, a inghíriu de calecuna cosa, o fintzes solu cambiandho filada; nau de chistionu, de foedhare, cricare unu muntone de chistiones, fàere bíere una cosa po un'àtera; atacare, lòmpere a ccn. difendhendhosi Sinònimos e contràrios furriai, furrietare, ghindhare / arringai Maneras de nàrrere csn: girare de manu = cambiare manu, lassare fàghere a un'àteru; girai de palas = andaisindi; girare su chervedhu, s'iscàtula = ammachiai, fariare Frases at girau debressi totu su paisu ◊ isceti chini no at girau su mundu podit fuedhai aici! 2. at girau de palas e si ndi est andau ◊ e proite mi mirades ojos chi deo no miro, proite sos chi suspiro a mie no bos girades? (Grolle)◊ giradí a custa parti! ◊ sa ferida no dhi permitiat de girai su bratzu a parti de palas 3. dae comente giravat s'arresonu pariat un'avocau 4. m'imbolo pro lu chiscire e si est giradu a mossu a mie, su cane meu etotu! ◊ cussu si est giradu fintzas a su babbu 5. cantu mi fit simpàtica Maria: ndhe fia a ndhe girare su chervedhu! Ètimu itl. Tradutziones Frantzesu tourner Ingresu to turn, to rotate, to revolve Ispagnolu girar, rodar Italianu girare, virare, ruotare Tedescu wenden, drehen, umkreisen.

giraítzos garaítzos

giraméntu , nm Sinònimos e contràrios furriamentu, girada, ibbadhinamentu Frases mi pigat a giramentus de conca segundu acomenti mi pongu Ètimu srd.

giràndula , nf Sinònimos e contràrios furrialledha, furriete Ètimu itl. girandola.

girantéri , agt, nm Definitzione chi o chie istat in giru, prus che àteru bendhendho cosa; chi istat sèmpere in giru Sinònimos e contràrios arringau, arroliadori, arrugaju, camminante, curriolu 1, rundhanu, rundhellu / bendhiolu, bituleri Frases ses fraitzosu e giranteri e cun iscujas nos bendhes cosa mala ◊ podes fàghere achistos a sa tzega sentza ingannias de su giranteri 2. su crabitu giranteri brincat su muru e curret a su monte Terminologia iscientìfica prf Ètimu srd. Tradutziones Frantzesu colporteur, ambulant Ingresu strolling, pedlar Ispagnolu ambulante Italianu ambulante Tedescu Wander…, Straßenhändler.

girànti , nm Definitzione chie andhat in giru bendhendho cosa; nau de un'aparíciu de làuna (capedhu giranti) chi si ponet in punta de is fumajolos po agiudare a che bogare su fumu, comente dhos faet girare s'ària chi passat Sinònimos e contràrios bendhiolu, bituleri, giranteri Frases a is arremonajus chi bendiant s'arràmini dhis narànt "girantis" Ètimu srd.

giràntibi , nm Definitzione una genia de pane grussu (cocòi) Terminologia iscientìfica pne.

giraòlta , nm Definitzione furriada, tretu de camminu o istrada chi faet a furriadas Sinònimos e contràrios biabbólica, biraorba, busada, cabagosta / cdh. catraolta Frases s'istrada est a giraolta pro pigare a bidha ◊ falat su nie dae sas aeras a giraolta, a brincos e a bolos ◊ sas carrelas sunt totu a giraolta in bidhas de monte.

giraoltàre , vrb Sinònimos e contràrios bandhulare, corruntonai, perdulare, tzincavesare Tradutziones Frantzesu vagabonder, flâner Ingresu to wander Ispagnolu vagar Italianu girovagare Tedescu wandern.

giràre, giràri girài

girasòle, girasòli, girassòle, girassòli , nm: zirassole Definitzione erba de soli, genia de erba chi faet frore grogo e su sèmene ogiosu, dhu sèmenant difatis po fàere ógiu / girasoli arrúbiu = Echinacea purpurea Frases su girassole cun rara frimmesa si addorat su sole! Terminologia iscientìfica lrs, Helianthus annuus Ètimu itl. Tradutziones Frantzesu tournesol Ingresu sunflower Ispagnolu girasol Italianu girasóle Tedescu Sonnenblume, Helianthus.

gircannoèu , nm: circannoeu* Definitzione su circu o arcu de Noè, arcu de chelu, de sole, de s'abba, de Donnu Deu: s'arcu chi essit in s'aera in tempus de abba, totu a colores (sete) Sinònimos e contràrios alcubbalenu, arcubaradu, arcunieri, circhiola, circuvròngia.

girèdha , nf: airedha, iredha Definitzione genia de friscu po serrare, in is gennas Sinònimos e contràrios craedhu, crica, giótula, lótura, zócula Terminologia iscientìfica srr Ètimu srd. Tradutziones Frantzesu loquet Ingresu latch Ispagnolu aldabilla Italianu nòttola Tedescu Klinke.

girèlla , nf, agt Definitzione orrosinita, rodighedha; nau de gente, chi no tenet firmesa, chi girat coment'e una bandheredha de campanile Sinònimos e contràrios barabàtula, bolabbola, bolanderu, liriliri.

girelléri , agt, nm Definitzione chi o chie andhat in giru Sinònimos e contràrios andariegu, zirellu Frases issu fait su bendhidori girelleri Ètimu srd.

girí , nm: girili Definitzione paule de abba in logu o tretu fintzes largu inue su terrenu faet a fossu / lon'e irí = loni de girí, pische, una genia de lissa Sinònimos e contràrios bedile, pajola, prògola, putziaghe Frases innòi su logu fait a fossu e unu tempus fiat totu unu girí ◊ ingunis fiat unu girí e dhoi cresciat su giuncu benemindi! Terminologia iscientìfica slg Tradutziones Frantzesu marécage Ingresu marsh, morass Ispagnolu charca Italianu acquitrino, pantano Tedescu Lache, Pfütze.

gíri , nm: chiri Definitzione genia de pigionedhu de unu coloredhu orrúbiu coment'e de aràngiu in su petus e in su gúturu Sinònimos e contràrios barbarrúbia, brinchidhi, brinci, chilisi*, cridhi, dhodhi, grisoni, grisoti, iscalzurúgiu, petiruju, princiotu, tintillu, tradhera, tzichi Terminologia iscientìfica pzn.

giridòja giradòa

giriédhu , nm Definitzione su cuménciu de sa tessidura de pertiedhas faendho s’iscartedha, in su fundhu, a bisura de cricu Sinònimos e contràrios trotilli.

girigíri , nm: tziritziri 2 Definitzione genia de gana chi benit biendho una cosa / fai su girigiri = fai piubiu, tantare, fagher bènnere su disizu Frases dhi fait su girigiri candu bit de custas cosas chi dhi praxint! Ètimu srd.