Ditzionàriu in línia
de sa limba e de sa cultura sarda

inchimerài, inchimeràre , vrb: inchimeriare Definizione pigare chimera, pigare o giare arennegu, fintzes pònnere in conca calecuna idea a bisura de chimera Sinonimi e contrari abbetiae, achibberare, acroconai, afutare, airai, aorcare, arrabbiai, arragiolire, arrannegai, inchietae, inchimerire, infelai, infuterare, insutzuligai, intziminire, renignai Frasi sendhe míseru isciau, t'inchimeras e ti faghes padronu in prepoténtzia (P.Casu)◊ su chelu si fit inchimeradu e caleit de botu sa irada de s'abba ◊ si bulluzat su mare, dae subra l'inchimerant sas nues… in pag'ora est un'inferru! ◊ sas aeras inchimeradas no faghent isperare in dies bonas ◊ si inchimeras a mie, ti zuro chi non cantas prus in logu! (M.Z.Funedda) Etimo srd. Traduzioni Francese s'obstiner, s'irriter Inglese to be obstinate Spagnolo obstinarse, empeñarse Italiano incaponirsi, alterarsi Tedesco sich versteifen, sich erregen.

inchínghere , vrb Definizione coment'e pigare a chintzu cun is bratzos, pònnere a inghíriu / pps. inchintu Sinonimi e contrari achintorzare, aggrapiare, atrotzigonare, chígnere Frasi so inchintu de cadenas ◊ cust'àrbure no l'inchinghent duos ómines Etimo ltn. incingere Traduzioni Francese entourer, ceindre, embrasser Inglese to embrace Spagnolo rodear, ceñir Italiano cìngere, avvòlgere, avvinghiare Tedesco umfassen, umarmen.

inchinisàdu , pps, agt: inchisinau, inchixinatu Definizione de inchinisare; totu brutu de chinisu, fatu a chinisu Sinonimi e contrari cinisosu 2. lampant fogos in calchi rutu muru de sa citade totu inchinisada (S.Lay Deidda) Traduzioni Francese qui est réduit en cendres Inglese reduced to ashes Spagnolo quemado, encenizado Italiano incenerito Tedesco mit Asche bedeckt, eingeäschert.

inchizolàre , vrb: incozolare, incuzolare Definizione cuare, pònnere, abarrare o istare in d-unu cugigone (chizolu), a una parte Sinonimi e contrari acantonai, achizolare, achizonare, acorrunconare, acuzonare, arreconai Frasi intro tou s'est incuzolada cudha ojada Etimo srd. Traduzioni Francese cacher, rencogner Inglese to put in a corner Spagnolo arrinconar Italiano rincantucciare Tedesco in eine Ecke drängen.

inciassàre , vrb Definizione pònnere o abbarrare istrintu in mesu de duas cosas coment'e istrecandho Sinonimi e contrari aggafiare, incasciae 2. in sa ruta de su muru so restadu inciassadu tra duos cantones Etimo srd. Traduzioni Francese rester pris, s'accrocher Inglese to get entangled Spagnolo enredarse, engancharse Italiano rimanére impigliato Tedesco verfangen bleiben.

inciauài, inciaulài , vrb: insaulai, intzaulai, issaulai, itzabai, itzaulai Definizione su abboghinare de is canes, fintzes po dolore, iscrammentaos, iscutos Sinonimi e contrari alloroscare, apedhae, atocare, aciaulai, baulai, imbauai Frasi cani chi inciàuat no mússiat ◊ cussu est cani chi itzàulat ma no móssiat ◊ su piciochedhu atacat a intzaulai pariat unu cani de càstiu ◊ dhu pigant e dh'acollant a itzabai coment'e canis 2. su cani dh'ant iscutu e s'est fuiu intzaulendi Etimo srd. Traduzioni Francese aboyer Inglese to bark Spagnolo ladrar Italiano abbaiare Tedesco bellen.

incidài , vrb: incidiare, incirai 1, insidai 1, intzediare, intzidare, intzidiare, intziliare, intzirai 1, intzitai, intzitare Definizione mòvere o fàere mòvere s'àteru atzitzandhodhu, naendho e faendho e ofendhendho puru, ponendho s'unu contras a s'àteru / incirai su logu = pònnere sa zente, sos àteros, o fintzas solu s'àteru in buluzu, fàghere pessare in su malu Sinonimi e contrari aciopai, ateneae, atiare, auntzare, imbriscare, incirigare, inciulai, insissiligai, intrulliare, intzifrire, intzigare, intzudie, intzullire, issolociare, pretzipitare, sotae, tzintzigare, ubetzare, umprigare / intriscare, mincidiare, suberiare, purruntzare, tinghitare Frasi un'ora ses intzidiendhe: ma si ti aferro ti ndhe passo sa gana! ◊ a filla mia est sa cumpàngia chi dha incidat a fai cussas cosas ◊ ti pregu chi no insidis de fronti a custa disputa, chi no fatzas su disconnotu! (Pani)◊ prus de unu l'intzediaiat pro la cherrer fàghere cantare ◊ non m'intzédies: menzus mudu ti abbarra!◊ no dhi neris cosa, a su pipiu, ca dh'incidas, ca est dormendisí! 2. at incidau totu su logu chi depit andai a s'èstero ◊ su piciochedhu est incirendi is fradis a pedí dinai a sa mama ◊ ant iscambillau is pipius… funt giogus de natura…: ita bollis intzirai?! Etimo itl. incitare Traduzioni Francese provoquer Inglese to cause Spagnolo provocar, atizar Italiano provocare, rinfocolare Tedesco provozieren, wieder entzünden.

incignàre , vrb: incingiai, incingiare, inciungiae, inciungiai, inciungiari Definizione cumenciare a pònnere, a impreare, si narat meda po pònnere sa primu borta bestimentu nou (ma si podet nàrrere de css. cosa, es. sa carrada, un'istrégiu, sa domo noa) Sinonimi e contrari inchingiare 1, istrinai Frasi gunnedha de cincu telus incíngiu sa dí chi isposu…◊ no tengu un'arregordu de èssiri incingiau bistimenta noa ◊ cussa domu fiat apenas fata, dh'emus incingiada nosu ◊ custus lentzorus nous no dhus apu mancu inciungiaus Etimo ltn. encaeniare Traduzioni Francese inaugurer Inglese to inaugurate Spagnolo inaugurar, estrenar Italiano inaugurare, incignare Tedesco einweihen.

incillíri , vrb: incixie, incixiri Definizione ammostare o fàere cara de inchietu istringhendho is chígios; pònnere pentzamentu Sinonimi e contrari achizare, acristai, inchigiare, inchizire, increstare, ingrispire Frasi candu nant cancuna cosa po issa s'incillit e s'inchietat, ma est pronta a perdonai Etimo srd. Traduzioni Francese froncer le sourcil (s) Inglese to frown Spagnolo fruncir el ceño Italiano accigliare Tedesco ein finsteres Gesicht machen.

incincinnàre , vrb Definizione allorighedhare is pilos Sinonimi e contrari allorichitare, anedhai, arrullai, frisai, riciulare | ctr. istirai Etimo itl. cincinnare Traduzioni Francese anneler, boucler Inglese to curl Spagnolo ensortijar Italiano inanellare Tedesco ringeln.

inciolài , vrb: insolae, insolai, insolare, issolare Definizione pònnere sa sola una segundha bortas a is iscarpas Sinonimi e contrari assolare, impetare Frasi su cartzeraju est insolendhe unu paju de cracas ◊ su sabbateri at insolau is crapitas a pedhi grussa ◊ cantu mi costat a inciolai custas crapitas? Etimo srd. Traduzioni Francese ressemeler Inglese to resole Spagnolo remontar Italiano risuolare Tedesco neu besohlen.

inciorài , vrb: insorai, insuorae, intzorai, intzuorai Definizione isciúndhere de sudore (po pelea, múngia, disisperu)/ i. piu piu = fàgheresi a una murca de suore, suerare meda Sinonimi e contrari impodhorare, suderare Frasi si papat de custa cosa s'intzorat totu piu piu ◊ candu apu inténdiu chistioni de abbruxai femu giai intzorendumí ◊ si t'insoras e pigas frius ti fait mali Etimo srd. Traduzioni Francese transpirer Inglese to sweat Spagnolo sudar Italiano sudare Tedesco schwitzen.

inciorodhàre , vrb: intzarodhai, intzorodhare, intzurudhare Definizione betare apare a s’afaiu, chentza critériu, fàere un’ammesturitzu de cosas diferentes, fàere un’atzorodhu trebballandho, foedhandho; fintzes isciúndhere a meda, a tropu, cosas de papare Sinonimi e contrari aciapuciae, ciorodhai, impiastai, improdhai, inciapugliare, inciobodhare Frasi ita totu est intzarodhendu cussu fac'e tontu?! Etimo srd. Traduzioni Francese gâcher, faire grossièrement Inglese to mess up Spagnolo chapucear Italiano fare pastìcci Tedesco Pfuschereien machen.

inciovài , vrb Definizione pònnere is oos, nau de su pische e de àteros animales de mare (es. càvuru) Sinonimi e contrari sciovai Etimo ctl., spn. Traduzioni Francese pondre des œufs (poisson) Inglese to lay eggs Spagnolo desovar Italiano depórre, eméttere le uòva (détto dei pésci) Tedesco Eier laichen.

incirài , vrb: insidai, intzidai, intzirai Definizione pònnere cambu nou, un'iferta, in sa linna de àtera mata po dhi fàere bogare frutu diferente; fintzes giare a pentzare una cosa chentza dha nàrrere ladina o apostadamente Sinonimi e contrari iferchire, innastare Frasi no s'iscít chini dh'at intzirau cuss'olivàriu Etimo ltn. insitare Traduzioni Francese greffer Inglese to graft Spagnolo injertar Italiano innestare Tedesco veredeln.

incispíre , vrb Definizione coment'e mandhare o bogare cispa, ischintídhias, catzare fogu, nau in cobertantza de una manera de fàere fogosa, forte, airada Etimo srd. Traduzioni Francese flamboyer, faire fureur Inglese to blaze, to be the rage (all) Spagnolo chispear Italiano fiammeggiare, furoreggiare Tedesco aufflammen, großen Erfolg haben.

inciulài , vrb: (in-ciu-la-i) insulai insullai, intullae, intzugliai, intzulai, intzullae, intzullai, intzullare, untzulai Definizione betare o pònnere su cane a ccn. o a unu pegus; nàrrere, fichire ideas in conca a unu po dhu cumbínchere a fàere calecuna cosa, po dhu pònnere contra a s'àteru Sinonimi e contrari aciopai, aggussire, atiare, auntzare, birbillare, incidai, inciliare, incirigare, insissiligai, intzullire, inzibbire, issolociare, ubetzare / intriscare, mincidiare, suberiare, tinghitare / insuai | ctr. caciare Frasi dh'iant intzullau unu cani, datu ca no dhu podiant sighiri ◊ po dhu cassai dh'intzullant unu cani fonnesu in fatu 2. is domínius ant fatu destrossu insulendi chi sa língua sarda est nemiga de su progressu! (G.Lilliu)◊ a sa pessone chi si lassat intzullare li narant chi est unu tzullu ca lu picant comente cherent Etimo srd. Traduzioni Francese inciter, pousser Inglese to urge Spagnolo instigar Italiano istigare Tedesco verleiten.

inciumíre , vrb: inciummire Sinonimi e contrari abbumbare, aciumai, inciummare, trincai, tzumire Frasi si atelat sa cariadura de sa símula annanghendhe ozu porchinu in cantidade pro chi ndh'inciumat fintzas a violare ◊ inciumit su mucarolu in s'abba pro infúndhere sa meragna a su cumpanzu Traduzioni Francese imbiber Inglese to soak Spagnolo embeber Italiano imbévere Tedesco tränken.

inciummàre , vrb Definizione bufare (binu) meda Sinonimi e contrari abbumbare, acirrai, aciumai, bufae, imbreacare, inciumire*, ingullire, trincai Traduzioni Francese pinter Inglese to booze Spagnolo empinar el codo Italiano sbevazzare Tedesco saufen.

inciupài, inciupàre , vrb Definizione fàere una cosa (abba, late o àteru deasi) coment'e a suspidura, comente podet fàere un'istràciu, un'ispòngia o àteru Sinonimi e contrari aciupae, assuspiri, impapare, imbibbiri, sultzire, sulviare, surbare 1, surbiri, suspiare Frasi deris tota sa note at sighidu a rúere selena una mudhina e sa terra si ndh'est inciupada in dogni vena ◊ no arresistis a sa fortza manna de is montis chi ti s'inciupant coment'e una proja Etimo spn. chupar Traduzioni Francese imbiber, absorber, tremper Inglese to soak Spagnolo embeber, empapar Italiano imbévere, assorbire, inzuppare Tedesco tränken.